சீனா தனது தொழில்துறை வலிமையைப் பயன்படுத்தி, தனது இறக்குமதியை நம்பியுள்ள நாடுகளுக்கு அழுத்தம் கொடுக்கிறது. இந்தியா போன்ற நாடுகள் இந்தக் கட்டுப்பாடுகள் தங்கள் பொருளாதார வளர்ச்சியைப் பாதிக்கலாம் என அஞ்சுகின்றன.

“சீனா இந்தியாவுக்கு எதிராக வர்த்தகத்தை ஆயுதமாகப் பயன்படுத்துகிறது. அரிய மண் காந்தங்கள் மற்றும் உரங்கள் போன்ற முக்கிய ஏற்றுமதிகளை நிறுத்துவது, இந்தியாவின் உற்பத்தி மற்றும் விவசாயத் துறைகளைப் பாதிக்கலாம்,” என்கிறார் முன்னாள் தூதர் ஃபன்சோக் ஸ்டோப்டன்.

ஆட்டோமொபைல், வீட்டு உபயோகப் பொருட்கள் மற்றும் சுத்தமான எரிசக்தி துறைகளுக்கு அரிய மண் காந்தங்கள் மிகவும் முக்கியம்.

ஏப்ரல் 2025 முதல், சீனா இவற்றின் இறக்குமதிக்கு கட்டுப்பாடுகள் விதித்து, நிறுவனங்கள் அனுமதி பெற வேண்டும் என உத்தரவிட்டுள்ளது.

இந்திய ஆட்டோமொபைல் தொழில் சங்கம், சீனாவின் இறக்குமதி கட்டுப்பாடுகள் விரைவில் தளர்த்தப்படாவிட்டால் உற்பத்தி கடுமையாக பாதிக்கப்படும் என எச்சரித்துள்ளது. இதையடுத்து, இந்திய அரசு சீனாவுடன் பேச்சுவார்த்தை நடத்தி வருவதாகக் கூறியுள்ளது.

சீனா வணிகத்தை மேம்படுத்த ஆர்வமாக இருந்தாலும், இந்தியாவுடனான பிற பிராந்திய சிக்கல்களில் சமரசம் செய்ய எந்த அறிகுறியும் காட்டவில்லை. சமீப ஆண்டுகளில், அருணாச்சல பிரதேசம் (சீனா இதை ‘தெற்கு திபெத்’ என அழைக்கிறது) மீது முழுமையாக உரிமை கோருவதை சீனா தீவிரப்படுத்தியுள்ளது.

அருணாச்சல பிரதேசம் இந்தியாவின் ஒருங்கிணைந்த பகுதி என இந்தியா உறுதியாகக் கூறுகிறது. அந்த மாநில மக்கள் தவறாமல் தேர்தலில் வாக்களித்து தங்கள் அரசைத் தேர்வு செய்வதாகவும், இதில் எந்த சமரசத்திற்கும் இடமில்லை என்றும் இந்தியா வலியுறுத்துகிறது.

“சீனாவும் இந்தியாவும் இறையாண்மை என்ற கருத்தை விடவில்லை என்றால், அவர்கள் எப்போதும் மோதிக்கொண்டே இருப்பார்கள். ஆனால், அருணாச்சல பிரதேசம் (சீனாவின் ‘தெற்கு திபெத்’) குறித்து உடன்பாடு எட்டினால், இரு நாடுகளுக்கும் நிரந்தர அமைதி கிடைக்கும்,” என ஷாங்காயின் ஃபுடான் பல்கலைக் கழக பேராசிரியர் ஷென் டிங்லி பிபிசியிடம் கூறினார்.

தற்போதைக்கு, இந்தியாவும் சீனாவும் தங்கள் எல்லைப் பிரச்னையை விரைவில் தீர்க்க முடியாது என்று உணர்ந்துள்ளன. இருப்பினும், இரு நாடுகளும் பரஸ்பர நன்மை தரும் உறவை உருவாக்க விரும்புகின்றன. உலகளாவிய வல்லரசுக் கூட்டணிகளை நம்புவதற்குப் பதிலாக, பதற்றங்களை முற்றிலும் தவிர்க்கவே அவை முயல்வதாகத் தெரிகிறது.

இது, பிபிசிக்காக கலெக்டிவ் நியூஸ்ரூம் வெளியீடு