ஆனால், கடந்த மே 14 ஆம் தேதி முதல் ஜூன் 13 ஆம் தேதி வரையிலான ஒரு மாத காலத்துக்கு மட்டுமே சுற்றுலா விசாவில் இந்தியாவில் தங்கியிருக்க பவித்ரா கீத்தீஸ்வரனுக்கு அனுமதியிருந்ததாக, அயல்நாட்டவருக்கான மண்டல பதிவுத்துறை அலுவலர் தரப்பு வழக்கறிஞர் நீதிமன்றத்தில் தெரிவித்தார்.

“பயண அனுமதியின் நிபந்தனைகளை மீற முயல்வதாகவும் அனுமதிக்கப்பட்ட காலத்தை மீறி இந்தியாவில் அவர் தங்கியுள்ளதால் நாடு கடத்த வேண்டும்” என அவர் கூறினார்.

இந்தியாவில் உரிய அனுமதியின்றி வசிப்பது சிக்கலை ஏற்படுத்தியதால், செப்டம்பர் மாதம் 9-ஆம் தேதி உயர் நீதிமன்ற மதுரைக் கிளையில் ரிட் மனு ஒன்றை பவித்ரா கீத்தீஸ்வரன் தாக்கல் செய்தார்.

அந்த மனுவில், அருண்குமாருக்கும் தனக்கும் இடையிலான திருமணத்தை ஏற்று பரிசீலித்து சிறப்பு திருமணச் சட்டம் 1954-இன் கீழ் பதிவு செய்து தருவதற்கு லால்குடி சார் பதிவாளருக்கு உத்தரவிடுமாறு கோரியிருந்தார்.

அவ்வாறு பதிவு செய்யப்பட்ட திருமணத்தின் அடிப்படையில் தனது விசாவை நீட்டிப்பது அல்லது முறைப்படுத்துவது தொடர்பான விண்ணப்பத்தை பரிசீலித்து அனுமதிப்பதற்கு அயல்நாட்டவருக்கான மண்டல பதிவுத்துறை அலுவலருக்கு உத்தரவிடுமாறும் மனுவில் குறிப்பிட்டிருந்தார்.

பவித்ராவின் வழக்கறிஞர் ஜே.கே.ஜெயசீலன் வாதிடும்போது, “பவித்ராவுக்கும் அருண்குமாருக்கும் இடையில் நடந்த திருமணத்தை 1954-ஆம் ஆண்டு சிறப்பு திருமணச் சட்டத்தின் 15 மற்றும் 16வது பிரிவுகளின் கீழ் பதிவு செய்ய முடியும்.” எனத் தெரிவித்தார்.

அதற்கான நிபந்தனைகளைப் பற்றியும் அவர் நீதிமன்றத்தில் குறிப்பிட்டார். அவை பின்வருமாறு…

அந்தவகையில், சிறப்பு திருமணச் சட்டத்தின்படி அருண்குமார்-பவித்ரா தம்பதிக்கு திருமணச் சான்றிதழை வழங்குவதற்கு பத்திரப்பதிவுத் துறைக்கு உத்தரவிடுமாறு பவித்ராவின் வழக்கறிஞர் ஜே.கே.ஜெயசீலன் வாதிட்டார்.

இதனை ஏற்க மறுத்த பத்திரப்பதிவுத் துறைக்கான அரசு வழக்கறிஞர், “ஜூன் 24-ஆம் தேதி திருமணச் சான்றிதழ் கோரி பவித்ரா கீத்தீஸ்வரன் மனு அளித்துள்ளார். அதில், கிறிஸ்தவ மத நம்பிக்கையின்படி தங்களுக்கு திருமணம் நடைபெற்றதாக ஒப்புக் கொண்டுள்ளார்” எனக் கூறினார்.

“ஆனால், இந்திய கிறிஸ்தவ திருமணச் சட்டம் 1872-இன் விதிகளின்படி இவர்களின் திருமணத்தை அங்கீகரிக்கும் வகையில் மனுதாரர் தனது மதத்தை கிறிஸ்துவ மதத்துக்கு மாற்றிக் கொண்டதற்கான எந்த ஆவணமும் இல்லை. ஆனாலும் மனு குறித்து பரிசீலிக்க வேண்டியுள்ளது.” என அவர் தெரிவித்தார்.

இதனைத் தீர்ப்பில் குறிப்பிட்ட நீதிபதி, சிறப்புத் திருமணச் சட்டம் 1954-இன் விதிமுறைகளை முறையாக பின்பற்றாததன் மூலம் தம்பதிகள் தங்கள் திருமண உறவைச் சிக்கலாக்கிக் கொண்டதாகக் கூறியுள்ளார்.

இதுகுறித்து பிபிசி தமிழிடம் பேசிய பவித்ரா கீத்தீஸ்வரனின் வழக்கறிஞர் ஜே.கே.ஜெயசீலன், “கிறிஸ்தவ முறைப்படி திருமணம் செய்வதாக இருந்தால் இரண்டு பேரில் ஒருவர் கிறிஸ்தவராக இருக்க வேண்டும். மதபோதகர் அல்லது திருத்தல பதிவாளர் செய்து வைத்தால் மட்டுமே திருமணம் செல்லும்.” என்கிறார்.

“அவ்வாறு திருமணம் செய்து வைக்கப்பட்டால் அதற்கான சான்றை சமர்ப்பித்து பதிவு செய்யலாம். ஆனால், அருண்குமார் – பவித்ரா திருமணத்தில் அப்படி எந்தவித ஆவணமும் இல்லாதது சட்டவிரோதமாகப் பார்க்கப்பட்டது.” எனவும் அவர் தெரிவித்தார்.

நீதிமன்றத்தில் நடந்த வாதத்தின்போது, எட்டு வார கர்ப்பிணியாக பவித்ரா உள்ளதாக அவரது வழக்கறிஞர் ஜெயசீலன் தெரிவித்தார். “தமிழ்நாட்டில் கர்ப்பிணி பெண்களுக்கு கரு உருவான தேதியில் இருந்து குழந்தை பிறக்கும் வரை பல்வேறு நலத்திட்டங்களை தமிழ்நாடு அரசு செய்து கொடுக்கிறது” என அவர் வாதிட்டார்.

“தம்பதியினர் மிகவும் ஏழ்மை நிலையில் வசிக்கின்றனர். அவர்களால் தனியார் மருத்துவமனையில் சிகிச்சை பெறுவதற்கான சூழல் இல்லை. அரசு ஆரம்ப சுகாதார நிலையத்தில் சிகிச்சை பெறுவதற்கு ஆவணங்கள் தேவைப்படுகின்றன,” என நீதிபதியிடம் ஜே.கே.ஜெயசீலன் தெரிவித்தார்.

இதையடுத்து, “மனுதாரரை (பவித்ரா) இலங்கைக்கு அனுப்பும் நடவடிக்கையை மேற்கொள்ள வேண்டாம். அதற்கான நடவடிக்கையை செப்டம்பர் 30-ஆம் தேதி வரை நிறுத்தி வைக்க வேண்டும்” எனக் கூறிய நீதிபதி சி.சரவணன், அவரின் உடல்நிலையை பரிசோதித்து அறிக்கை சமர்ப்பிக்குமாறு ஆரம்ப சுகாதார நிலைய மருத்துவருக்கு உத்தரவிட்டார்.

நீதிபதி உத்தரவையடுத்து, கடந்த செப்டம்பர் 28 அன்று லால்குடி புதூர் உத்தமனூர் அரசு ஆரம்ப சுகாதார நிலையத்தின் வட்டார மருத்துவ அதிகாரி நீதிமன்றத்தில் அறிக்கை ஒன்றைத் தாக்கல் செய்தார்.

அதில், பவித்ரா கர்ப்பமாக இருப்பதும் 2027 ஆம் ஆண்டு அவருக்கு குழந்தை பிறக்கும் என்று எதிர்பார்க்கப்படும் தேதியையும் அவர் குறிப்பிட்டிருந்தார்.

வழக்கில் அனைத்து தரப்பு வாதங்களையும் கேட்ட நீதிபதி, ‘சட்டரீதியாகப் பார்த்தால் அங்கீகரிக்கப்பட்ட எந்தவொரு திருமண வடிவத்தின் கீழும் தம்பதியினரின் திருமணம் வரவில்லை. ஆனால், இந்த உறவைச் சிதைப்பதற்கு நீதிமன்றம் விரும்பவில்லை’ எனத் தீர்ப்பில் குறிப்பிட்டார்.

அருண்குமார் உடன் ஜூன் 4-ஆம் தேதி நடைபெற்றதாகக் கூறப்படும் திருமணத்தைக் குறிப்பிட்டுள்ள நீதிபதி, ‘திருமண முறையை முழுமையாகச் சார்ந்ததாக அமையாவிட்டாலும் அவர் கர்ப்பமாக இருப்பது தவிர்க்க முடியாத நிலையைக் காட்டுகிறது’ எனக் கூறியுள்ளார்.

அதேநேரம், இந்து திருமணச் சட்டம் 1955, இந்திய கிறிஸ்துவ திருமணச் சட்டம் 1872 அல்லது சிறப்பு திருமணச் சட்டம் 1954 ஆகியவற்றில் எதாவது ஒன்றின்கீழ் செல்லுபடியாகும் திருமணத்தை நடத்தி தங்கள் உறவை சட்டப்பூர்வமாக புதுப்பித்துக் கொள்ளுமாறு நீதிபதி உத்தரவிட்டுள்ளார்.

இதற்காக 60 நாட்கள் அவகாசத்தை தம்பதிக்கு வழங்குவதாகத் தீர்ப்பில் தெரிவித்துள்ள நீதிபதி, ‘அதுவரை நாட்டைவிட்டு வெளியேற்றக் கூடாது. குறிப்பிட்ட காலத்துக்குள் திருமணம் நடைபெற்று பதிவு செய்யப்பட்டால் பொருந்தக் கூடிய சட்டங்களுக்கு உட்பட்டு மனுதாரர் (பவித்ரா) தொடர்ந்து தங்கியிருக்க அனுமதிக்கப்படுவார்’ எனக் கூறியுள்ளார்.

இந்தியாவில் அருண்குமாரை தவிர வேறு எந்த உறவினரும் பவித்ராவுக்கு இல்லை என்பதால் அவரது வயதைக் கருத்தில் கொண்டும் தேவைப்படும் மருத்துவ உதவிகளை வழங்குமாறு லால்குடி புதூர் உத்தமனூர் வட்டார மருத்துவ அலுவலருக்கு நீதிமன்றம் உத்தரவிட்டுள்ளது.

“இதை மனிதாபிமான அடிப்படையிலான தீர்ப்பாகப் பார்க்கிறேன்” எனக் கூறுகிறார் பவித்ராவின் வழக்கறிஞர் ஜே.கே.ஜெயசீலன். “இருவரும் மிகவும் ஏழ்மையான பின்புலத்தைச் சேர்ந்தவர்கள். தனியார் மருத்துவமனையில் சிகிச்சை பெறுவதற்கான வசதிகள் அவர்களுக்கு இல்லை. அதை உணர்ந்து இப்படியொரு தீர்ப்பை நீதிபதி அளித்துள்ளார்” என்கிறார்.

நீதிமன்றத்தின் தீர்ப்பு குறித்து பிபிசி தமிழிடம் பேசிய பவித்ரா கீத்தீஸ்வரன், “அருண்குமாரை பிடித்துப் போனதால் அவருடன் இந்தியா வந்தேன். விசா நீட்டிக்கப்படாததால் மீண்டும் இலங்கைக்கு அனுப்பிவிடுவார்களோ என்ற அச்சத்திலேயே வாழ்ந்து வந்தேன்” எனக் கூறுகிறார்.

தனது சிறு வயதிலேயே தாய் இறந்துவிட்டதால் விடுதியில் தங்கிப் படித்து வந்ததாகக் கூறும் அவர், “12 ஆம் வகுப்பு வரை படித்தேன். அதன்பிறகு தந்தையுடன் தங்கியிருந்த போது அருண்குமாரை சந்தித்தேன். அவருடன் இந்தியாவில் வாழ்வது என முடிவெடுத்தேன்” என்கிறார்.

கர்ப்பமான பிறகு அரசு மருத்துவமனையில் சில சிக்கல்களை பவித்ரா எதிர்கொண்டுள்ளார். “இங்கு சிகிச்சை பெறுவதற்கு ஆதார் அட்டை அவசியமானதாக உள்ளது. அப்போது தான் குழந்தைக்குப் பிறப்பு சான்றிதழ் பெற முடியும் எனக் கூறினர்” எனக் கூறுகிறார்.

நீதிமன்றத்தின் உத்தரவை வரவேற்பதாகக் கூறும் அவர், “இந்தியாவில் தொடர்ந்து வசிக்கவே விரும்புகிறேன். இலங்கைக்கு செல்லும் முடிவில் இல்லை” எனத் தெரிவித்தார்.

– இது, பிபிசிக்காக கலெக்டிவ் நியூஸ்ரூம் வெளியீடு