பிரபலங்கள் மீதான தமிழ் மக்களின் விருப்பத்தின் தொடர்ச்சிதான் தோனியின் ஏற்பு என நுட்பமான பார்வையை முன்வைக்கிறார் எழுத்தாளர் அரவிந்தன்.

“நேரு, இந்திரா காந்தி, அமிதாப், எம்ஜிஆர், ரஜினிகாந்த், ஷாருக்கான், என்று வெற்றிபெற்ற பிரபலங்கள் மீது தமிழ் மக்களுக்கு என்றுமே ஒரு பிடிப்பு உண்டு. தமிழர்களுக்கு பிற மொழியாளர்கள் மீது என்றைக்கும் வெறுப்பு இருந்ததில்லை.

தோனியை ஒரு ஷோமேன் (Showman) என்று சொல்லலாம். இயல்பாகத் தான் அவர் எப்போதும் இருக்கிறார். ஆனால் மக்களுக்கு பிடித்ததை, சரியான நேரத்தில் மிகவும் நுட்பமாக செய்து அவர்களின் அன்பை பெற்றுவிடுகிறார். இதை நேர்மறையான கண்ணோட்டத்தில் தான் சொல்கிறேன். மிகப்பெரிய நட்சத்திர அந்தஸ்து கொண்ட தலைவர்களுக்கு, கலைஞர்களுக்கு மட்டுமே இந்த திறமை வாய்க்கும். எம்ஜிஆரையும் ரஜினிகாந்தையும் போல.” என்கிறார் அவர்.

சென்னை சூப்பர் கிங்ஸ் அணியை தவிர வேறு எந்த அணிக்காக விளையாடி இருந்தாலும் தோனி இவ்வளவு உச்சத்தை எட்டியிருக்க வாய்ப்பில்லை என்கிறார் அரவிந்தன்.

“தமிழ் ரசிகர்களுக்கு திறமையான கிரிக்கெட் வீரர்களை விட தங்களில் ஒருவராக, தங்களைப் பிரதிபலிக்கும் வீரர்கள் மீதுதான் அபிமானம் அதிகம். கபில்தேவ் போன்றவர் மீதான அதீதமான பாசத்தின் தொடர்ச்சி தான் தோனி மீதான கவர்ச்சி. இந்தியாவின் வேறு எந்த மாநிலத்திலும் இதுபோன்ற ரசிகர்களை பார்க்க முடியாது” என்கிறார் அவர்.

இந்திய கிரிக்கெட் என்பது அடிப்படையில் நகரங்களின், நகரவாசிகளின் கிரிக்கெட்டாகத்தான் நீண்டகாலம் இருந்தது. கபில் தேவ் போல ஒரு சிலர் அத்திபூத்தாற் போல நுழைந்தாலும் புத்தாயிரத்தின் தொடக்கம் வரை, அது பெரும்பாலும் அப்படித்தான் இருந்தது. இந்தியாவில் ஜார்கண்ட் போன்ற ஒரு பின்தங்கிய மாநிலத்தில் இருந்து உச்சத்துக்கு சென்ற முதல் நவீன கிரிக்கெட் நட்சத்திரம் என்று தோனியையே சொல்ல முடியும்” என்கிறார் சசி தரூர்.

தோனியை முன்மாதிரியாக வைத்துதான், பின்தங்கிய பிராந்தியங்களில் இருந்து நிறைய வீரர்கள் இந்திய அணிக்கு படையெடுக்கத் தொடங்கினர். ஒருவகையில் ஜெய்ஸ்வால், சர்ஃபராஸ் கான், ஆகாஷ் தீப், துருவ் ஜுரெல் போன்றவர்களின் ‘ரோல் மாடல்’ தோனிதான்.

– இது, பிபிசிக்காக கலெக்டிவ் நியூஸ்ரூம் வெளியீடு