துருக்கியில் உள்ள கடும் பொருளாதார நெருக்கடியும், வெளிநாட்டு முதலீடு சார்ந்திருக்கும் நிலையும், கடன் நிதியுதவியைச் சார்ந்திருப்பது போன்றவையின் காரணமாக துருக்கி உலக அரசியலில் சமநிலையில் இருக்க விரும்புகிறது.

சர்வதேச நாணய நிதியத்தின் தகவல்படி, உலகின் 17வது பெரிய பொருளாதாரமாக துருக்கி இருக்கிறது.

சர்வதேச அமைப்பின் புள்ளிவிவரங்கள்படி, அதிகாரப்பூர்வ வருடாந்திர சில்லறை விலைப் பட்டியலில் ஜிம்பாப்வே, அர்ஜென்டினா, சூடான் மற்றும் வெனிசுலாவுக்கு அடுத்து 71.6% உடன் துருக்கி இருக்கிறது.

சமீபத்தில் துருக்கியில் எடுக்கப்பட்ட அனைத்து கருத்துக் கணிப்புகளும், அந்நாட்டு மக்களுக்கு மிகுந்த சுமையாக விலைவாசி உயர்வு இருப்பதைச் சுட்டிக்காட்டுகின்றன.

வளர்ச்சியை வலியுறுத்தி, கடனுக்கான வட்டி விகிதத்தைக் குறைவாக வைத்திருக்க துருக்கியின் மத்திய வங்கிக்கு அந்நாட்டின் அதிபர் ரிசெப் தையிப் எர்டோகன் அறிவுறுத்தினார். அவர் வட்டி விகிதத்தினால்தான் பணவீக்கம் ஏற்பட்டதாகக் கருதினார்.

ஆனால் அவர் கடந்த ஓராண்டாக அந்நாட்டின் பொருளாதாரக் கொள்கையை மாற்றியுள்ளார். புதிய பொருளாதாரக் கொள்கை மிகவும் பழமைவாத பாதையில் தேர்ந்தெடுக்கப்பட்டுள்ளது. உதாரணமாக, துருக்கி மத்திய வங்கியின் புதிய வாரியம் ஒன்பது மாதங்களில் வட்டி விகிதங்களை 8.5%-இல் இருந்து 50% வரை உயர்த்தியுள்ளது.

தற்போது துருக்கியின் பொருளாதாரம், இந்தப் புதிய திட்டம் மூலம் சிறப்பாகச் செயல்படுவதாகவும், பணவீக்கத்தைப் பொறுத்தவரை அதன் ‘மோசமான காலம் முடிந்துவிட்டது’ என்றாலும் பலருக்கு இன்னும் எதிர்காலம் குறித்து சந்தேகம் உள்ளது”, என்றும் துருக்கியின் தற்போதைய நிதி அமைச்சர் மெஹ்மத் சிம்செக் கூறினார்.

“சிம்செக் நியமிக்கப்பட்டதில் இருந்து, பணவீக்கம் இரட்டிப்பாகியுள்ளது, துருக்கியின் பணமதிப்பு குறைந்துள்ளது, மேலும் வட்டி விகிதங்கள் 8% முதல் 50% வரை அதிகரித்துள்ளது,” என்று பெர்லின் பொருளாதார மற்றும் சட்டத்திற்கான பள்ளியைச் சேர்ந்த முனைவர் உமித் அக்கே தெரிவித்தார்.

“அதிகப்படியான உள்நாட்டு தேவை மற்றும் ஊதிய உயர்வு என்ற நோக்கம் கொண்ட சிம்செக்கின் பழமைவாத பொருளாதார திட்டம்தான் பணவீக்கம் ஏற்பட முக்கியக் காரணமாக இருக்கிறது. அது பயனுள்ளதாக இல்லை என்பதை இது குறிக்கிறது.”

வருங்காலத்தில் துருக்கியின் பொருளாதாரத்திற்கு என்ன நடக்கும் என்பது தெளிவாகத் தெரியவில்லை என்று நிபுணர்கள் குறிப்பிடுகின்றனர்.

“அடிப்படை விளைவு காரணமாக வரும் மாதங்களில் பணவீக்கம் குறையும்” என்று முனைவர் உமித் அக்கே குறிப்பிட்டார்.

“இருப்பினும், பணவீக்கம் குறைவதால் விலைவாசியில் உள்ள நெருக்கடியான நிலை முடிந்துவிட்டதாகக் கருத முடியாது. ஊதிய உயர்வு அல்லது கீழ் வகுப்பினருக்காண உரிய பொருளாதார ஆதரவு வழங்கப்படாத வரை, இந்த இக்கட்டான நிலை தொடரும்.”

மேற்கத்திய நாடுகள் அல்லாத பொருளாதாரக் கூட்டணிகளில் துருக்கி இணைந்தால், அது அந்நாட்டில் உள்ள பொருளாதாரத்தை சமநிலைப்படுத்த உதவும். ஆனால், அரசியல் ரீதியான பலனுக்காகவும், அதிபர் எர்டோகனின் 360 டிகிரி வெளியுறவுக் கொள்கையின் உத்தியை செயல்படுத்துவதுமே ப்ரிக்ஸ் கூட்டமைப்பில் துருக்கியின் நோக்கமாக உள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு.