திரேந்திர குமார் சமீபத்தில் மக்கானா சாகுபடியில் இறங்கியுள்ள விவசாயிகளில் ஒருவர். பண்ணையில் வளர்ந்தவராக இருந்தாலும், தனது வாழ்க்கையில் அவரது தந்தை சென்ற வழியிலேயே செல்ல திரேந்திர குமார் விரும்பவில்லை.

“விவசாயிகளாகிய நாங்கள் எப்பொழுதும் கோதுமை, பருப்பு வகைகள், கடுகு ஆகியவற்றையே பயிரிட்டோம், அதனால் அதிக பணத்தை இழந்துள்ளோம். பெரும்பாலான நேரங்களில் வெள்ளம் பயிர்களை நாசமாக்கியது,” என்று அவர் கூறுகிறார்.

அவர் முனைவர் பட்டத்திற்காக ஆராய்ச்சி மேற்கொள்ளும்போது, ​​மக்கானா சாகுபடி குறித்து ஆய்வு செய்த விஞ்ஞானி ஒருவருடன் தொடர்புகொண்டு, தனது பண்ணையில் இதைப் பயிரிட்டு சோதனை செய்ய முடிவு செய்தார்.

“இதன் முடிவுகள் ஆச்சரியமாக இருந்தன.” முதல் ஆண்டில் தாம் 36,000 ரூபாய் வரை லாபம் ஈட்டியதாகக் கூறுகிறார் அவர். இப்போது அவர் 17 ஏக்கர் (6.9 ஹெக்டேர்) நிலத்தில் தாமரைச் செடிகளை வளர்த்து வருகிறார்.

“அதிக உடல் உழைப்பு கொண்டு பெரும்பாலும் மீனவர்களால் அறுவடை செய்யப்பட்ட இந்த ஃபாக்ஸ் கொட்டைகளை நான் சாகுபடி செய்வேன் என்று கனவில்கூட நான் எதிர்ப்பார்த்தது இல்லை.”

இந்தச் செடியைப் பயிரிடுவதில் கொண்டுவரப்பட்ட மாற்றத்தால் பெண்களுக்கும் வேலை வாய்ப்புகள் ஏற்பட்டுள்ளன. குமார் இப்போது விதைகளை விதைப்பதற்காக உள்ளூரில் 200 பெண்களைக்கு வேலை வழங்கியுள்ளார்.

“விவசாயத்தில் இருக்கும் பிரச்னைகளால் விவசாயம் செய்வதில் இருந்து வெளியேறாமல் இருக்க, முடிந்தவரை பல விவசாயிகளுக்கு வேலை வழங்குவதே எனது நோக்கம்” என்று அவர் கூறுகிறார்.

இதைப் பயிரிடுவதில் மட்டுமே புதுமைகள் செய்யப்படவில்லை. மக்கானா பயிரிடும் நிறுவனங்களில் முன்னணி நிறுவனமான மதுபானி மக்கானா, இதைக் கையாள்வதிலும் புதுமைகளைப் புகுத்தி ஏற்றுமதியும் செய்கிறது.

பாரம்பரியமாக, மக்கானாக்கள் அறுவடை செய்யப்பட்டவுடன், கழுவி, வறுத்தெடுக்கப்பட்டு, பின்னர் அது சுத்தியல் போன்ற கருவியால் உடைக்கப்படுகிறது.

“இந்தச் செயல்முறை சுத்தமற்ற, சுகாதாரமில்லாத மற்றும் ஆபத்தான ஒன்று. இது அதிக உழைப்பு மற்றும் நேரத்தை எடுத்துக்கொள்ளும் முறை, சில நேரங்களில் தீப்புண், காயங்கள்கூட ஏற்படலாம்” என்று மதுபானி மக்கானாவின் நிறுவனர் மற்றும் தலைமை நிர்வாகி ஷம்பு பிரசாத் கூறுகிறார்.

மக்கானாவுக்கான தேசிய ஆராய்ச்சி மையத்துடன் இணைந்து, அவரது நிறுவனம் மக்கானாவை வறுத்தெடுக்கும் இயந்திரத்தை உருவாக்கியுள்ளது.

“இந்த இயந்திரம், மக்கானாவின் தரத்தையும் உற்பத்தியையும் அதிகரிக்க உதவுவதாக” கூறுகிறார் பிரசாத்.

வடக்கு பிகாரிலுள்ள மதுபானியில் இருக்கும் அவரது தொழிற்சாலையில் இதுபோன்ற மூன்று இயந்திரங்கள் பயன்படுத்தப்படுகின்றன.

மக்கானாவின் சாகுபடி மற்றும் தயாரிப்பிலுள்ள புதுமைகள் மூலம் உற்பத்தி அதிகரித்திருந்தாலும், மக்கானாவின் விலை குறைய இந்த உற்பத்தி போதுமானதாக இருக்காது என்று பிரசாத் எண்ணுகிறார்.

“மகானாவுக்கான உலகளாவிய தேவை அதிகரித்து வருவதால், விலை குறைவதற்கு, உற்பத்தி குறிப்பிடத்தக்க அளவில் அதிகரிக்க வேண்டியது அவசியம்” என்றும் அவர் கூறுகிறார்.

மறுபுறம் திரேந்திர குமார் மக்கானா சாகுபடி மிகப்பெரிய மாற்றத்தைக் கொண்டு வரும் என்று நினைக்கிறார்.

“இது, மக்கானா அறுவடைக்காக பிகாரில் நடைபெறும் புதுமைகளின் ஆரம்பம் மட்டுமே. இது மாநிலத்தையே புரட்டிபோடலாம்,” என்று அவர் கூறுகிறார்.