ராய்ட்டர்ஸ் தகவலின்படி, வியாழக்கிழமை அன்று 2,000 முதல் 3,000 பேர் செயுட்டாவிற்குள் நுழைந்ததாக ஸ்பெயின் ஊடகங்கள் மதிப்பிட்டுள்ளன. ஆனால் சிவில் காவல் படை இந்த எண்ணிக்கையை உறுதிப்படுத்தவில்லை என்று அவை கூறியுள்ளன.

இதற்கிடையில், ஸ்பெயினின் பொது ஒளிபரப்பு நிறுவனமான ஆர்டிவிஇ பகல் நேரத்தில் “நூற்றுக்கணக்கானோர்” அந்தப் பகுதிக்குள் நுழைந்ததாக தெரிவித்துள்ளது. கடந்த இரண்டு வாரங்களில் பெரும்பாலும் 1,500-க்கும் மேற்பட்ட இளம் மொராக்கோ புலம்பெயர்ந்தோர் செயுட்டாவை அடைந்துள்ளனர் என்றும் அது கூறியுள்ளது.

சமீபத்திய மாதங்களில் கடலில் இருந்து 60 பேரின் உடல்கள் மீட்கப்பட்டுள்ளதாக விவாஸ் தெரிவித்ததாக ஆர்டிவிஇ செய்தி வெளியிட்டுள்ளது.

அந்தப் பகுதி ஒரு மனிதாபிமான பாதுகாப்பு அவசரநிலையை எதிர்கொள்கிறது என்று அவர் கூறினார். துணையின்றி வரும் சிறாருக்கான தங்குமிட மையங்கள் அவற்றின் நிர்ணயிக்கப்பட்ட திறனை விடப் பல மடங்கு அதிகமாகச் செயல்பட்டு வருவதாக எச்சரித்தார்.

இந்த திடீர் அதிகரிப்பு மே 2021 உடன் ஒப்பீடுகளைத் தூண்டியுள்ளது. அப்போது சில நாட்களில் சுமார் 8,000 பேர் செயுட்டாவிற்குள் நுழைந்தனர். இது மொராக்கோவுடனான ராஜதந்திர பதற்றங்களை மோசமாக்கியது.

வட ஆப்பிரிக்காவில் அமைந்துள்ள ஸ்பெயினின் செயுட்டா மற்றும் மெலில்லா பகுதிகள், ஆப்பிரிக்காவுடனான ஐரோப்பிய ஒன்றியத்தின் ஒரே நில எல்லையாக இருக்கின்றன.

சமீபத்திய ஆண்டுகளில் கண்காணிப்பை அதிகரித்தல், வேலியை வலுப்படுத்துதல் மற்றும் மொராக்கோவுடன் மேம்படுத்தப்பட்ட இருதரப்பு உறவுகள் மூலம் இந்தப் பகுதிகளைச் சுற்றியுள்ள பாதுகாப்பை ஸ்பெயின் அதிகாரிகள் அதிகரித்துள்ளனர். ஆனாலும் மக்கள் தொடர்ந்து எல்லையைக் கடக்க முயற்சிக்கின்றனர்.

இதற்கிடையில், ஸ்பெயினை ஷெங்கன் (Schengen) மண்டலத்திலிருந்து தற்காலிகமாக நீக்க வேண்டும் என்று இத்தாலி கோரியுள்ளது. இத்தாலி பிரதமர் ஜியோர்ஜியா மெலோனி “எல்லைகளையும் குடிமக்களின் பாதுகாப்பையும் காக்க அசாதாரண நடவடிக்கைகளுடன் தலையிடத் தயாராக இருக்கிறோம்” என்று கூறியுள்ளார்.

எக்ஸ் தளத்தில் அவர் வெளியிட்டுள்ள பதிவில், செயுட்டாவின் காட்சிகள் “அதிர்ச்சியளிக்கின்றன” என்றும், ” ஐரோப்பாவின் எல்லைகளின் பாதுகாப்பிற்கு கட்டுப்பாடற்ற சட்டவிரோத குடியேற்றம் ஒரு உறுதியான அச்சுறுத்தலை ஏற்படுத்துகிறது” என்பதை இது காட்டுகிறது என்றும் கூறியுள்ளார்

– இது பிபிசிக்காக கலெக்டிவ் நியூஸ்ரூம் வெளியீடு