“ராணுவ மற்றும் மற்ற பயன்பாட்டுப் பொருட்களுக்கான ஏற்றுமதி குறித்த சர்வதேச சட்டங்களை, எப்போதும் இந்தியா சரியாகப் பின்பற்றி வருகிறது. அதிக அளவில் ஆயுத பயன்பாட்டைத் தடுப்பதற்காக விதிக்கப்பட்ட சர்வதேச சட்டங்களுக்கும் விதிமுறைகளுக்கும் உட்பட்டுதான் இந்தியா ஆயுதங்களை ஏற்றுமதி செய்து வருகிறது” என்றும் அவர் தெரிவித்தார்.

இந்தியா, ஐரோப்பா மற்றும் பாதுகாப்புத் துறையைச் சேர்ந்த 11 அதிகாரிகளுடனான உரையாடல்களின் அடிப்படையில் இந்தச் செய்தியை ராய்ட்டர்ஸ் வெளியிட்டது.

ரஷ்யாவிற்கு எதிராக யுக்ரேனின் பாதுகாப்பை ஆதரிக்கும் விதமாக இந்த ஆயுதப் பரிமாற்றம் ஒரு வருடத்திற்கும் மேலாக நடந்து வருவதாக அதில் குறிப்பிடப்பட்டு இருக்கிறது.

இந்தியாவில் ஆயுத ஏற்றுமதியைப் பொறுத்தவரை, யாருக்கு விற்கப்படுகிறதோ அவர் மட்டுமே அந்த ஆயுதங்களைப் பயன்படுத்த வேண்டும் என்பதே விதியாக உள்ளது. யாரேனும் இந்த விதிகளை மீறினால் அல்லது சட்டவிரோதமாக ஆயுதங்களை விற்பனை செய்தாலோ அவர்களுடனான ஏற்றுமதி நிறுத்தப்படும்.

இந்த விஷயம் குறித்து ரஷ்யா இரண்டு முறை கேள்வி எழுப்பியதாக மூன்று இந்திய அதிகாரிகள் ராய்ட்டர்ஸிடம் தெரிவித்துள்ளனர்.

இந்திய வெளியுறவுத் துறை அமைச்சர் எஸ். ஜெய்சங்கர் மற்றும் ரஷ்ய வெளியுறவுத் துறை அமைச்சர் செர்ஜி லாவ்ரோவ் ஜூலை மாதம் சந்தித்தபோது, ​​​​இதுகுறித்து விவாதிக்கப்பட்டதாக ராய்ட்டர்ஸ் செய்தியில் கூறப்பட்டுள்ளது.

இந்தச் செய்தியில் கூறப்பட்டுள்ள கருத்துகளை இந்திய வெளியுறவுத் துறை அமைச்சகம் நிராகரித்துள்ளது. இந்தியா மற்றும் ரஷ்யாவின் வெளியுறவுத் துறை அமைச்சகங்கள் ராய்ட்டர்ஸின் கேள்விகளுக்கு பதிலளிக்கவில்லை.

“இந்தியா யுக்ரேனுக்கு எந்த பீரங்கி குண்டுகளையும் வழங்கவில்லை அல்லது விற்கவில்லை” என்று ஜெய்ஸ்வால் 2024ஆம் ஆண்டு ஜனவரி மாதம் கூறியிருந்தார்.

“ஐரோப்பா வழியாக இந்திய ஆயுதங்கள் யுக்ரேனுக்கு வழங்கப்பட்டது உண்மையெனில், ஆயுத ஏற்றுமதி விதிகளை மீறியதற்கு இந்தியா எதிர்ப்பு தெரிவித்து ஐரோப்பா உடனான ஒப்பந்தத்தை ரத்து செய்ய வேண்டும்” என்று ராய்ட்டர்ஸ் செய்தி குறித்து மூத்த பத்திரிகையாளர் சுஹாசினி ஹைதர் சமூக ஊடகத்தில் பதிவிட்டுள்ளார்.