5

ஸ்டார் ஸ்டுடியோ 18 -ஏ பார் ஆப்பிள் ஸ்டுடியோஸ் -சினி 1 ஸ்டுடியோ- ஆகிய நிறுவனங்களின் தயாரிப்பில் இயக்குநர் பாலாஜி தரணிதரன் இயக்கத்தில் விஜய் சேதுபதி- லிஜோ மோல் ஜோஸ்- சாய் ப்ரித்வி ராஜ் -ஆகியோரின் நடிப்பில் வெளியான’ பத்தா’ திரைப்படம்- ரசிகர்களின் பேராதரவுடன் விமர்சன ரீதியாகவும், வசூல் ரீதியாகவும் பாரிய வெற்றியை தொடர்ந்து ஈட்டி வருகிறது. இதனால் உற்சாகமடைந்த படக் குழு படத்தை வெற்றி பெறச் செய்த ரசிகர்களுக்கும், ஊடகத்தினருக்கும் நன்றி தெரிவித்துள்ளனர்.

இதற்காக சென்னையில் நடைபெற்ற பிரத்யேக நிகழ்வில் படக்குழுவினர் பங்கு பற்றினர்.

இந்நிகழ்வில் படத்தை வழங்கிய இயக்குநர் அட்லி பேசுகையில், ” இப்படத்தின் கதையை கேட்டவுடன் எமக்கு மிகவும் பிடித்துப் போனது. இந்தத் திரைப்படம் விருதுகளையும் வெல்லும்.

வணிக ரீதியாகவும் பாரிய வெற்றியை பெறும் என அவதானித்தேன். அதே தருணத்தில் இந்த கதையை தயாரிக்கும் அளவிற்கு இவ்விடத்தில் எம்மிடத்தில் நிதி ஆதாரமில்லை.

இதற்காக மும்பையில் உள்ள எம்முடைய நண்பரும், திரைப்பட தயாரிப்பாளருமான முராத் கெடானியை சந்தித்து, இப்படத்தின் கதையைக் கேளுங்கள்.

பிடித்திருந்தால் தயாரிப்பில் பங்கு பற்றுங்கள் என கேட்டு கொண்டேன். முதலில் மறுப்பு தெரிவித்தாலும் பிறகு கதையைக் கேட்டு, இந்தக் கதை நிச்சயமாக வெல்லும் என்றார்.

பால் திரிந்து போனால் தயிராகும். தயிராகும் போது அது மதிப்புமிக்கதாக மாறுகிறது. தயிர் கெட்டுப் போனால் நெய்யாகும். அது நெய்யாகும் போது அதன் மதிப்பு மேலும் உயர்கிறது.

இப்படித்தான் வாழ்க்கையிலும் சில மோசமான அனுபவங்களால்தான் நாம் அடுத்த கட்டத்திற்கு செல்வோம். கடவுள் வழி தவற விட்டார் என்றால்.. அதற்கும் ஓர் அர்த்தம் இருக்கும். அடுத்த கட்டத்திற்கு அழைத்துச் செல்கிறார் என்று அர்த்தம். அப்படிப்பட்ட ‘பத்தா’வின் அனுபவம் தான் இந்தப் படம்.

இத்திரைப்படத்தில் நடித்த விஜய் சேதுபதி- லிஜோ மோல் ஜோஸ்- சாய் பிருத்விராஜ் உள்ளிட்ட அனைவருக்கும், பணியாற்றிய தொழில்நுட்பக் கலைஞர்களுக்கும் நன்றி. இந்தப் படத்தை மிகப்பெரிய அளவில் வெற்றி பெறச் செய்த ரசிகர்களுக்கும், ஊடகத்தினருக்கும் நன்றி.

இந்தத் திரைப்படம் நிச்சயமாக சர்வதேச அளவில் பேசப்படும் படைப்பாக உயரும். அதற்கான அனைத்து முயற்சிகளிலும் நாங்கள் தொடர்ந்து ஈடுபடுவோம். ” என்றார்.