தமிழ்நாட்டின் சமீப கால சட்டப்பேரவைத் தேர்தல் வரலாற்றில் எதிர்பார்க்கப்படாத முடிவுகள் இந்தத் தேர்தலில் வெளிப்பட்டு வருவதாகவும் அரசியல் நோக்கர்கள் தெரிவிக்கின்றனர்.

விஜய் மற்றும் அவரது கட்சி இந்த முறை முடிவுகளைத் தீர்மானிப்பதில் முக்கியக் காரணியாக இருக்கும் என எதிர்பார்க்கப்பட்டு இருந்தாலும், இவ்வளவு பெரிய தாக்கத்தை ஏற்படுத்தியிருப்பது ஆச்சரியம் அளிப்பதாகக் கூறுகிறார் பேராசிரியர் ராமு மணிவண்ணன்.

இளைஞர்கள் மற்றும் பெண்களின் ஆதரவு தவெக-வுக்கு கணிசமாக இருப்பதும், திமுக, அதிமுகவின் வாக்குகளில் ஒரு பகுதி அவர் பக்கமாகத் திரும்பும் எனவும் அரசியல் நிபுணர்கள் பலரால் ஏற்கெனவே கணிக்கப்பட்டிருந்தது. ஆனால், இவ்வளவு பெரிய வெற்றியைத் தரும் அளவிலான ஆதரவு கிடைக்கும் என்று யாருமே எதிர்பார்க்கவில்லை என்கிறார் பத்திரிகையாளர் திவ்யா.

மேலும், “திமுக, அதிமுக ஆகிய கட்சிகளுக்குக் கிடைக்கும் வாக்குகளைப் பார்த்தோமானால், ஸ்டாலின், எடப்பாடி பழனிசாமி ஆகியோரை ஆதரிக்கும் மக்கள், இரு திராவிட கட்சிகளையும் காலங்காலமாக ஆதரித்து வருவோரின் வாக்குகள், ஆட்சி நிர்வாகத்தில் ஒரு சீரான தொடர்ச்சி வேண்டுமெனக் கருதுவோரின் வாக்குகள் எனப் பல தரப்பில் இருந்து கிடைக்கும் வாக்குகளை அடிப்படையாகக் கொண்டது.

ஆனால், தமிழக வெற்றிக் கழகத்தைப் பொறுத்தவரை பெரும்பாலும் விஜயின் ஆளுமையை மட்டுமே வைத்து இவ்வளவு பெரிய ஆதரவைப் பெற்றுள்ளது. மக்களிடையே இருந்த திமுக எதிர்ப்பு மனநிலையின் விளைவுகளை விஜய் அறுவடை செய்திருக்கிறார் என்றாலும், அதைத் தாண்டி, எவ்வித அரசியல் பின்னணியும் இல்லாத, முற்றிலும் புதிய கட்சியைக் கொண்டு, தவெக பெற்றுள்ள இந்த வெற்றி முற்றிலும் ஒரு நட்சத்திர ஆளுமைக்குக் கிடைத்திருப்பதாகவே பார்க்க வேண்டியுள்ளது,” என்று கூறுகிறார் பத்திரிகையாளர் திவ்யா.

திமுக சுமார் 60 தொகுதிகளில் புதுமுகங்களை வேட்பாளர்களாக நிறுத்தியது மற்றும் செந்தில் பாலாஜி போல 24 இடங்களில் அரசியல் தலைவர்கள் தொகுதி மாறிப் போட்டியிட்டனர். இது, தனது ஆட்சிக்கு எதிரான மனநிலை மக்களிடையே நிலவுகிறது என்பதை திமுக முன்பே அறிந்திருந்தது என்பதைக் காட்டுவதாக அரசியல் விமர்சகர்கள் கூறுகின்றனர்.

“ஏற்கெனவே இருந்த சட்டமன்ற உறுப்பினர்களுடைய செயல்பாடுகள் மீது அதிருப்தி நிலவியதை அவர்கள் உணர்ந்து இருந்ததையும் அதன் காரணமாகவே இந்த நடவடிக்கையை மேற்கொண்டதையும் புரிந்துகொள்ள முடிகிறது,” என்கிறார் மூத்த பத்திரிகையாளர் மாலன்.

விஜய் தனது கடைசி பரப்புரையில் பேசும்போது, “உங்களிடம் கைகூப்பிக் கேட்டுக் கொள்கிறேன். வாக்குச்சாவடிக்குச் சென்று வாக்களித்து, ஸ்டாலினிடம் இருந்து தமிழகத்தையும் ஜனநாயகத்தையும் காப்பாற்றுங்கள்” என்று உணர்ச்சிமயமாகப் பேசியிருந்தார்.

அதன் தாக்கம் வாக்குப்பதிவில் எதிரொலித்து இருப்பதாகக் கூறும் மாலன், 1967, 1977, 1991 ஆகிய தேர்தல்களில் மக்கள் வாக்களித்ததைப் போலவே இந்த முறையும் புதிய தலைமையை எதிர்பார்த்து புத்துணர்ச்சியுடன் வாக்களித்து இருப்பதைக் காண முடிவதாகக் கூறுகிறார்.

தவெக-வை பொறுத்தவரை, விஜய் குறைந்த இடங்களில் மட்டுமே பிரசாரம் மேற்கொண்டார். அதிலும், காரைக்குடி போன்ற பகுதிகளில் சிறிது நேரம் மக்கள் முன்பு வந்துவிட்டு, எதுவும் பேசாமல் சென்றிருந்தார்.

அப்படியிருந்தும்கூட அவருக்கு இவ்வளவு பெரிய ஆதரவு கிடைத்திருக்கிறது என்பதைக் கவனிக்க வேண்டியுள்ளது. இது மக்கள் மாற்றத்தை விரும்பியிருக்கிறார்கள் என்பதை வெளிப்படையாகக் காட்டுவதாக மாலன் கூறுகிறார்.

குறிப்பாக, விஜய் தனது பிரசாரங்களில் தொடக்கத்தில் இருந்தே ஒரு விஷயத்தை தெளிவாகக் குறிப்பிட்டு வந்தார். தனது கொள்கை எதிரி பாஜக எனவும் அரசியல் எதிரி திமுக எனவும் கூறிய விஜய், “இந்தத் தேர்தலில் திமுகவுக்கும் தவெகவுக்கும்தான் போட்டியே இருக்கப் போகிறது,” என்பதை அழுத்தமாகக் குறிப்பிட்டு வந்தார்.

களத்தில் செயலாற்றியதை விடவும் துடிப்புடன் இளைய தலைமுறையைப் பிரதிநிதித்துவப்படுத்தும் சமூக ஊடகங்களில் தவெக முழு வீச்சில் இயங்கி வந்ததாகவும் அதில் இளைஞர்களின் ஆதரவைப் பெருமளவில் பெற்றதாகவும் மூத்த பத்திரிகையாளர் மாலன் குறிப்பிடுகிறார்.

அவரது கருத்தை ஆமோதிக்கும் வகையில் பேசிய ராமு மணிவண்ணன், “இந்தத் தேர்தலில் இளம் தலைமுறையினர் மற்றும் பெண்களின் வாக்கு வங்கி, முடிவுகளை நிர்ணயிப்பதில் முக்கியப் பங்கு வகித்துள்ளது. விஜய் நேரடியான பிரசாரத்தில் அதிக தாக்கத்தை ஏற்படுத்தினார் என்று கூறுவதைவிட, அவரது தாக்கம் சமூக ஊடகங்களின் வாயிலாக இளைஞர்கள் மற்றும் பெண்களிடையே பெரிதாக இருந்தது எனக் கூறுவதே சரியாக இருக்கும்.

மகளிர் உரிமைத் திட்டம், புதுமைப்பெண் திட்டம் எனப் பல்வேறு வகையில் திமுக பெண்களின் ஆதரவைப் பெறுவதற்கு முயன்றது. ஆனால், விஜய் அதை முறியடித்து மகளிர் ஆதரவைத் தன் பக்கமாக ஈர்த்துள்ளார். முதல் தலைமுறை வாக்காளர்கள், பெண் வாக்காளர்கள் இந்தத் தேர்தலில் தாக்கத்தை ஏற்படுத்தவல்ல பிரிவுகளாகப் பார்க்கப்பட்டன. அந்த வாக்குகளை விஜய் முழுமையாகத் தன் பக்கம் ஈர்த்திருப்பதை இது காட்டுகிறது,” என்று கூறுகிறார் ராமு மணிவண்ணன்.

இந்தத் தேர்தலில், விஜயின் வருகை திமுகவுக்கு அப்படிக் கிடைத்து வந்த பெண்கள், இளைஞர்கள் மற்றும் சிறுபான்மை வாக்குகளைப் பிரித்து இருப்பதாக அரசியல் நிபுணர்கள் கருதுகின்றனர்.

விஜய் சென்னையின் நந்தனத்தில் தேர்தல் பரப்புரையில் பேசியபோது, மதச்சார்பற்ற சமூக நீதியே தனது கொள்கை எனவும் இந்து, முஸ்லிம், கிறிஸ்தவர்களுக்கான நபராகவே தான் எப்போதும் இருக்கப் போவதாகவும் கூறினார்.

அந்த வகையில் அவர் திமுக-வுக்கு பலமாக இருந்த சிறுபான்மை வாக்குகளைப் பிரித்து, தவெக பக்கம் ஈர்த்துவிட்டதாக நிபுணர்கள் கருதுகின்றனர்.

பேராசிரியர் ராமு மணிவண்ணனின் கூற்றுப்படி, திமுக கூட்டணியில் இருந்த விசிக, இடதுசாரி கட்சிகள், காங்கிரஸ் ஆகியவற்றுடன் ஒரு சுமூகமான சூழல் இருக்கவில்லை என்பதைத் தெளிவாகக் காண முடிந்தது.

“கூட்டணியில் நிலவி வந்த சிக்கல்களும் பிரச்னைகளும் தேர்தல் பிரசாரத்தில் ஆக்கபூர்வமாக அவை பங்கெடுப்பதைத் தடுத்ததாகவும் அதன் விளைவுகளை இப்போது திமுக சந்திப்பதாகவும்” அவர் கூறுகிறார்.

இதே நிலைதான் அதிமுக கூட்டணியிலும் இருந்ததாகக் கூறும் ராமு மணிவண்ணன், இரு திராவிட கட்சிகளும் கூட்டணியை நிர்வகிப்பதைத் தவறவிட்டதன் பலன்களை தவெக அனுபவித்து வருவதாகத் தெரிவித்தார்.

மேலும், “திமுகவில் அமைச்சர்கள், சட்டமன்ற உறுப்பினர்கள் மற்றும் மக்களுக்கு இடையே மிகுந்த இடைவெளி இருந்ததைக் காண முடிந்தது. இதுவும் முடிவுகளில் எதிரொலித்து இருக்கிறது,” என்கிறார் மூத்த பத்திரிகையாளர் மாலன்.

அதேநேரம், “திமுக இந்த முறை மீண்டும் ஆட்சிக்கு வந்துவிட முடியும் என மிகுந்த நம்பிக்கையைக் கொண்டிருந்தது. அதன் காரணமாக, கூட்டணிக் கட்சிகள் விஷயத்திலும் அதிகமாக ஆதிக்கம் செலுத்தியது. இது ஏற்படுத்திய அதிருப்தி களத்தில் கூட்டணிக் கட்சிகளின் செயல்பாடுகளைப் பாதித்தது,” என்றும் அவர் தெரிவித்தார்.

“கடந்த 2024 நாடாளுமன்ற தேர்தலில் இருந்தே ஆட்சி எதிர்ப்பு மனநிலை இருந்து வருவதைப் பார்க்க முடிகிறது. ஆனால், திமுகவில் கட்சிக்குள் இருக்கும் நிர்வாகக் கட்டமைப்பு மிகவும் உறுதியானது. அப்படிப்பட்ட கட்டமைப்பில், குறிப்பாக உள்ளூர் அளவிலான நிர்வாகத் தலைமைகளில் அதிருப்தி நிலவியது. அதைச் சரி செய்வதில் கட்சி கவனம் செலுத்தத் தவறிவிட்டது,” என்கிறார் திவ்யா.

இதேவேளையில், திமுகவின் கூட்டணிக் கட்சிகளுடைய நிலைமை அடுத்து என்ன என்பதையும் பார்க்க வேண்டியுள்ளது. விஜய் பிரசாரத்தின்போது தன்னுடன் கூட்டணி அமைக்கும் கட்சிகளுக்கு ஆட்சி அதிகாரத்தில் பங்கு தருவதாகக் கூறியிருந்தார். அதன் அடிப்படையில், “தேர்தல் முடிவுகளைப் பொறுத்து திமுகவுடன் கூட்டணியில் இருக்கும் கட்சிகள் தவெக பக்கம் நகர்வதற்கான வாய்ப்புகள் ஏற்படலாம்” எனவும் கணிக்கப்படுகிறது.

அதற்கான சாத்தியங்கள் உள்ளதாகக் கூறுகிறார் மூத்த பத்திரிகையாளர் சிகாமணி. அதுகுறித்துப் பேசியபோது, “காங்கிரஸ் கட்சி ஏற்கெனவே திமுகவுடன் கூட்டணியில் இருந்தாலும், கசப்புகளுடன்தான் இருந்து வருகிறது என்பது பல சந்தர்ப்பங்களில் வெளிப்பட்டன. அதேபோல, பிற கட்சிகளும்கூட தவெக-வுக்கு ஆதரவளிக்கும் முடிவை எடுக்கக்கூடும். அப்படியான சூழலை உருவாக்க தவெக முயற்சிகளை எடுக்க வாய்ப்புள்ளது.

அதிமுகவுடன் கூட்டணியில் இருக்கும் பாமக-வும்கூட தவெக பக்கம் திரும்புவதற்கான வாய்ப்புகள் உள்ளன. இருப்பினும் இவை எதையும் தற்போது உறுதியாகக் கூறிவிட முடியாது. தேர்தல் முடிவுகள் முழுமையாக வெளிவந்த பின்னர் என்ன நடக்கிறது என்பதைப் பொறுத்திருந்துதான் பார்க்க வேண்டும்,” என்று விவரித்தார்.

அதேநேரம், இந்தத் தேர்தல் முடிவுகள் பல செய்திகளைக் கூறுவதாகவும் திராவிட கட்சிகளுக்கு இதுவோர் எச்சரிக்கை மணியாக இருப்பதாகவும் கூறும் நிபுணர்கள், தேர்தல் வரலாற்றில் இது மிகவும் ஆழமாக ஆராயப்பட வேண்டிய தேர்தல் முடிவுகள் எனவும் கூறுகின்றனர்.

– இது, பிபிசிக்காக கலெக்டிவ் நியூஸ்ரூம் வெளியீடு