மக்கள் தொகையைச் சிறப்பாகக் கட்டுப்படுத்தியதற்காகத் தென்னிந்திய மாநிலங்களைத் தண்டிக்கும் வகையில் தொகுதிகளைக் குறைப்பதும், வட மாநிலங்களுக்குக் கூடுதல் அதிகாரத்தை வழங்குவதும் மாநில உரிமைகள் மீதான நேரடித் தாக்குதல் என்று அவர் குறிப்பிட்டுள்ளார்.

”எங்களைத் தடுத்து பார்க்க நினைத்தால், 1950 மற்றும் 60-களில் மொழிப் போராட்டம் கண்ட அதே தி.மு.க-வை இந்தியா மீண்டும் பார்க்கும்,” என்று அவர் தெரிவித்துள்ளார்.

பெண்களுக்கான இட ஒதுக்கீடு மற்றும் மக்களவைத் தொகுதி மறுவரையறை ஆகிய இரண்டும் வெவ்வேறானவை என்பது ஒவ்வொரு குடிமகனுக்கும் தெளிவாகத் தெரியும் என தெலங்கானா முதலமைச்சர் ரேவந்த் ரெட்டி கூறியிருக்கிறார்.

”பெண்கள் இடஒதுக்கீட்டை ஒரு சாக்காகப் பயன்படுத்தி மக்கள் தொகை அடிப்படையிலான தேசிய அளவிலான மக்களவைத் தொகுதி மறுவரையறையைத் திணிக்க முயல்வது, மிகக் குறுகிய காலத்திற்கு பாஜகவிற்கு உதவக்கூடும். ஆனால், இது தென்னிந்திய மற்றும் சிறிய மாநிலங்களுக்கு அநீதி இழைப்பதாக அமைந்தால், நீண்ட கால அளவில் நமது நாட்டை அது பலவீனப்படுத்தும்” என ரேவந்த் ரெட்டி எக்ஸ் தளத்தில் தெரிவித்துள்ளார்.

தேசத்தின் பரந்த மற்றும் நீண்ட கால நலனைக் கருத்தில் கொண்டு, மக்களவைத் தொகுதி மறுவரையறை விவகாரத்தில் வெறும் மக்கள் தொகை விகிதாச்சார மாதிரியைத் தவிர்த்து பிற மாதிரிகளைப் பரிசீலிக்க வேண்டும் என அவர் வலியுறுத்தியிருக்கிறார்.

கேரளா, கர்நாடகா மாநில முதலமைச்சர்கள் ஏற்கனவே தொகுதி மறுவரையறைக்கு எதிராக கருத்து தெரிவித்துள்ளனர்,

மறுபுறம் பாரதிய ஜனதாவும் அதன் கூட்டணி கட்சிகளும் அரசின் நடவடிக்கைக்கு ஆதரவான கருத்துகளை தெரிவித்துவருகின்றனர்.

முதலமைச்சர் ஸ்டாலினின் கருத்து தேர்தல் தோல்வி பயத்தின் வெளிப்பாடு என அதிமுக பொதுச்செயலாளர் எடப்பாடி பழனிசாமி கருத்து தெரிவித்துள்ளார்.

”பல ஆண்டுகளாக இடஒதுக்கீடு கோரி வரும் பெண்களின் கோரிக்கை நிறைவேறவிருக்கும் அருமையான தருணம், அதை முதலமைச்சரால் ஜீரணிக்கமுடியவில்லை” என எடப்பாடி பழனிசாமி குற்றம்சாட்டியுள்ளார்.

ஒவ்வொரு மாநிலத்திலும் தொகுதிகளை 50% உயர்த்த உள்ளதாக முதற்கட்டமாக தெரியவந்துள்ளது எனவும் தமிழ்நாட்டின் எம்.பி.க்களின் எண்ணிக்கை 39இல் இருந்து 59 வரை உயர வாய்ப்பு இருக்கிறது எனவும் கூறியுள்ள தமிழக பாஜக முன்னாள் தலைவர் அண்ணாமலை, பிரதமருக்கு முதல்வர் ஸ்டாலின் எச்சரிக்கை விடுத்தது ஏற்புடையதல்ல என தெரிவித்துள்ளார்.

மத்திய இணையமைச்சர் எல். முருகன் வெளியிட்டுள்ள அறிக்கையில், ”தமிழகத்தில் சட்டமன்றத் தேர்தல் நெருங்குவதால், திமுக தலைவர் ஸ்டாலின் தொகுதி மறுவரையறையை வைத்து விஷமப் பிரசாரம் செய்து வருகிறார். மகளிர் இடஒதுக்கீடு அமலுக்கு வந்து விடக்கூடாது என்பது மட்டும் தான் திமுகவின் எண்ணம்” என தெரிவித்துள்ளார்.

மத்திய அரசு கொண்டுவரவுள்ளதாக கூறப்படும் மசோதாவில் என்ன இடம்பெற்றுள்ளது என்பது இன்னமும் வெளிப்படையாக தெரியவில்லை.

இருப்பினும் மசோதாவின் நகலை பார்த்ததாக கூறும் அரசியல் செயல்பாட்டாளர் யோகேந்திர யாதவ் இதை குறித்து எக்ஸ் தளத்தில் வெளியிட்டுள்ள பதிவில், ”பிரதமர் மற்றும் அமைச்சர்களின் உறுதிமொழிகளுக்கு மாறாக, ஒவ்வொரு மாநிலத்திற்கும் தற்போதுள்ள இடங்களின் விகிதாச்சாரம் பராமரிக்கப்படும் என்பதை உறுதி செய்ய இந்த மசோதாவில் எதுவும் இல்லை” என அவர் தெரிவித்துள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு