229 என்ற இலக்கை எதிர்நோக்கி ஆடிய மும்பை இந்தியன்ஸ் அணிக்கு ரியான் ரிக்கில்டன் மற்றும் ரோஹித் ஷர்மா நல்ல தொடக்கம் ஏற்படுத்திக் கொடுத்தார்கள். இந்தத் தொடரில் சிறந்த வேகப்பந்துவீச்சைக் கொண்ட அணிகளுள் ஒன்றாகக் கருதப்படும் லக்னௌவுக்கு எதிராக அவர்கள் ஆரம்பத்தில் இருந்தே அதிரடி காட்டினார்கள்.

மொஹம்மது ஷமி, மோசின் கான் என விக்கெட் வீழ்த்திய பௌலர்களுக்கு எதிராக நம்பிக்கையோடு பவுண்டரிகள் அடித்தார்கள். அதனால் 4 ஓவர்களில் 44 ரன்கள் வந்தன. 5வது ஓவரை வீசிய பிரின்ஸ் யாதவ் பவுண்டரியே கொடுக்காமல் பந்துவீசினார். ஆனால், ஆவேஷ் கான் வீசிய 6வது ஓவரில் அதற்கும் சேர்த்து அதிரடி காட்டினார் ரோஹித் ஷர்மா. அந்த ஓவரில் தொடர்ச்சியாக 2 பவுண்டரிகளும், 2 சிக்ஸர்களும் விளாசினார். அதனால், பவர்பிளேவில் விக்கெட் ஏதும் இழக்காமல் 71 ரன்கள் எடுத்தது மும்பை இந்தியன்ஸ்.

பவர்பிளேவுக்குப் பின் இம்பேக்ட் வீரராக தமிழ்நாடு ஸ்பின்னர் எம்.சித்தார்த் எடுத்து வரப்பட்டார். ஆனால், அவரது பந்துவீச்சிலும் சிக்ஸர்களாக அடித்தார்கள் மும்பை இந்தியன்ஸ் ஓப்பனர்கள். ரிக்கில்டன் 22 பந்துகளிலும், ரோஹித் ஷர்மா 27 பந்துகளிலும் தங்களின் அரைசதங்களைப் பூர்த்தி செய்தனர். அதனால் 8.1 ஓவர்களிலேயே 100 ரன்களைக் கடந்தது மும்பை இந்தியன்ஸ்.

அதன்பிறகு அதிரடியை இன்னும் வேகப்படுத்திய அந்த இணை, முதல் விக்கெட்டுக்கு 10.5 ஓவர்களில் 143 ரன்கள் எடுத்தது. 32 பந்துகளில் 83 ரன்கள் எடுத்த ரிக்கில்டனை மோசின் கான் வெளியேற்றினார். அவர் 6 பவுண்டரிகளும், 8 சிக்ஸர்களும் அடித்தார். ரோஹித் ஷர்மா 84 ரன்கள் எடுத்து எம்.சித்தார்த் பந்துவீச்சில் வெளியேறினார். 44 பந்துகளை சந்தித்த அவர் 6 பவுண்டரிகளும், 7 சிக்ஸர்களும் அடித்தார். அடுத்து வந்த திலக் வர்மா 11 ரன்களிலும், சூர்யகுமார் யாதவ் 12 ரன்களிலும் வெளியேறினார்கள். கடைசி கட்டத்தில் நமன் திர் மற்றும் வில் ஜேக்ஸ் மும்பை இந்தியன்ஸின் வெற்றியை உறுதி செய்தார்கள்.

18.4 ஓவர்களில் 4 விக்கெட்டுகளை இழந்து இலக்கை எட்டியது மும்பை இந்தியன்ஸ். இது இந்த சீசனில் அந்த அணி பெறும் 3வது வெற்றி.

மும்பை இந்தியன்ஸ்

இந்தப் போட்டிக்கான மும்பை இந்தியன்ஸ் பிளேயிங் லெவனுக்கு கார்பின் பாஷ் மற்றும் தீபக் சஹர் திரும்பினார்கள். கேப்டன் ஹர்திக் பாண்டியா உடல்நலக்குறைவால் இந்தப் போட்டியில் விளையாடவில்லை. கடந்த போட்டியில் ஆடிய டிரென்ட் போல்ட்டும் பிளேயிங் லெவனில் இடம்பெறவில்லை. கிரிஷ் பகத்துக்குப் பதில் ராஜ் பவா பிளேயிங் லெவனில் வாய்ப்பு பெற்றார். ரோஹித் ஷர்மாவும் அணிக்குத் திரும்பியதாக டாஸின்போது சூர்யகுமார் யாதவ் கூறினார். அவர் இம்பேக்ட் பிளேயராகக் களமிறங்கினார்.

பிளேயிங் லெவன்: ரியான் ரிக்கில்டன் (விக்கெட் கீப்பர்), நமன் திர், சூர்யகுமார் யாதவ் (கேப்டன்), திலக் வர்மா, வில் ஜேக்ஸ், ராஜ் பவா, கார்பின் பாஷ், தீபக் சஹர், ஜஸ்ப்ரித் பும்ரா, அல்லா கசன்ஃபர், ரகு ஷர்மா.

சப்ஸ்டிட்யூட் வீரர்கள்: ரோஹித் ஷர்மா, மயாங்க் ராவத், ராபின் மின்ஸ், ஷார்துல் தாக்கூர், டிரென்ட் போல்ட்.

லக்னௌ சூப்பர் ஜெயின்ட்ஸ்

இந்தப் போட்டிக்கான மும்பை இந்தியன்ஸ் பிளேயிங் லெவனில் இங்லிஸ் மற்றும் அக்‌ஷத் ரகுவன்ஷி ஆகியோர் சேர்க்கப்பட்டார்கள். முகுல் சவுத்ரி தன் இடத்தை இழந்தார்.

பிளேயிங் லெவன்: மிட்செல் மார்ஷ், எய்டன் மார்க்ரம், ஜாஷ் இங்லிஸ், நிகோலஸ் பூரன், ரிஷப் பன்ட் (கேப்டன் & விக்கெட் கீப்பர்), அக்‌ஷத் ரகுவன்ஷி, ஹிம்மத் சிங், மொஹம்மது ஷமி, மோசின் கான், ஆவேஷ் கான், பிரின்ஸ் யாதவ்.

சப்ஸ்டிட்யூட் வீரர்கள்: எம்.சித்தார்த், திக்வேஷ் ராத்தி, மயாங்க் யாதவ், ஷபாஸ் அஹமது, அப்துல் சமத்