10 வீரர்களுடன் அர்ஜென்டினா ஆட நேரிட, அந்த அணிக்கு கோல்கீப்பர் மார்டினெஸ் நாயகனாகத் திகழ்ந்தார். ஆட்டத்தின் வழக்கமான நேரத்தின் இறுதி விநாடிகளில், லமின் யமாலின் ஃப்ரீ-கிக்கை அற்புதமாகத் தடுத்து, ஸ்பெயின் வெற்றி கோல் அடிப்பதை அவர் தடுத்தார்.

வில்லியம்ஸ் தலையால் முட்டி கோலடிக்க மேற்கொண்ட மற்றொரு முயற்சியை சிறப்பாக செயல்பட்டு தடுத்து, அவர் மீண்டும் தன் திறமையைக் காட்டினார். அடுத்தபடியாக நிக்கோலஸ் ஒட்டமெண்டிக்கு எதிராக மாற்று வீரரான மிக்கேல் மெரினோ செய்த ஃபவுலுக்காக வில்லியம்ஸ் அடித்த கோல் நிராகரிக்கப்பட்டது.

நாக்-அவுட் சுற்றுகளில் எகிப்து, இங்கிலாந்து ஆகிய அணிகளுக்கு எதிராக பின்தங்கிய நிலையில் இருந்து பின்னர் மீண்டெழுந்து வந்து அர்ஜென்டினா வீழ்த்தியது. ஆனால், இறுதிப்போட்டியில் ஸ்பெயினுக்கு எதிராக அர்ஜென்டினாவில் அதனை சாதிக்க முடியவில்லை. இதனால், இரண்டாவது முறையாக ஸ்பெயின் அணி ஆடவர் உலகக் கோப்பையை வென்றது.

ஒரே நேரத்தில் ஆண்கள் மற்றும் பெண்கள் உலக சாம்பியன் பட்டம் வென்ற முதல் நாடு என்ற பெருமையை அவர்கள் பெறுகிறார்கள்.

ஸ்பெயினின் உலகக் கோப்பை பயணம், கேப் வெர்டேவுக்கு எதிரான கோல் இல்லாத டிராவுடன் தொடங்கி, கால்பந்தின் மிகப்பெரிய பரிசை இரண்டாவது முறையாக வென்ற பெருமையுடன் முடிந்தது.

இந்தப் போட்டித் தொடரில் தங்களை படிப்படியாக வளர்த்துக்கொண்டு, அரையிறுதியில் மிகவும் சாதகமான அணியாகக் கருதப்பட்ட பிரான்ஸை ஸ்பெயின் தோற்கடித்தது. இறுதிப் போட்டியில் சரியான கால்பந்து வழிமுறைகள் மூலம் வெல்ல முயற்சி செய்த ஸ்பெயின் அணிக்கு இது முற்றிலும் தகுதியான வெற்றியாகும்.

ஸ்பெயின் பயிற்சியாளர் லூயிஸ் டி லா ஃபியூண்டே, பாராட்டத்தக்க அமைதியுடன் அணியை வழிநடத்தியுள்ளார்; யூரோ 2024 இறுதிப் போட்டியில் பெர்லினில் இங்கிலாந்தை வீழ்த்தி பட்டம் வென்றபோதும் அவரே அணியை வழிநடத்தினார். அர்ஜென்டினாவின் ஆத்திரமூட்டும் செயல்களுக்கு மத்தியிலும் அவரது அணி அந்த நிதானத்தைக் காட்ட வேண்டியிருந்தது.

ஃபெர்னாண்டஸ் வெளியேற்றப்பட்ட பிறகு, ஸ்பெயினுக்கு வீரர்களின் எண்ணிக்கை அதிகமாக இருந்தது. தற்காப்பில் அவர்கள் அரிதாகவே சிரமப்பட வேண்டியிருந்தது. அதேநேரத்தில் மாற்று வீரராக வில்லியம்ஸ் களமிறக்கப்பட்டது ஸ்பெயினுக்கு உண்மையான தாக்குதல் திறனை அளித்தது.

போட்டித்தொடர் முழுவதும் காணப்பட்ட சில விறுவிறுப்பான போட்டிகளுக்கு இந்த இறுதிப் போட்டி ஈடாகவில்லை, ஆனால் உலகக் கோப்பைக்குத் தகுதியான வெற்றியாளர்களே கிடைத்தனர்.

லியோனல் மெஸ்ஸியின் கடைசி உலகக் கோப்பை ஆட்டம் இதுவாக இருந்தால், நடப்பு சாம்பியன் அந்தஸ்துடன் வந்த அர்ஜென்டினா பட்டத்தை இழந்த ஏமாற்றம் அளித்துள்ளது. அர்ஜென்டினாவின் சின்னமான அவரால் ஆட்டத்தின் போக்கை மாற்றியமைக்க முடியாத நிலையிலும் இந்த தொடர் முடிந்துள்ளது.

தற்போது 39 வயதாகும் மெஸ்ஸியின் ஆட்டத்தின் பெரும்பகுதியை மெதுவான நடையில் கழித்தாலும், அவர் இந்த உலகக் கோப்பையில் 8 கோல்களை அடித்துள்ளார். மீண்டும் ஒருமுறை அர்ஜென்டினாவின் தலைவராகவும் உத்வேகமாகவும் திகழ்கிறார், குறிப்பாக இங்கிலாந்துக்கு எதிரான அரையிறுதி வெற்றியில், 2-1 என்ற கோல் கணக்கில் அர்ஜென்டினா வெற்றி பெற இரண்டு கோல்களையும் அவரே உருவாக்கிக் கொடுத்தார்.

இறுதிப்போட்டியில், ஸ்பெயின் அணியால் மெஸ்ஸி நன்கு கட்டுப்படுத்தப்பட்டார்; அவரால் கோலை நோக்கி ஒரே ஒரு ஷாட் மட்டுமே அடிக்க முடிந்தது, அதுவும் இலக்கைத் தவறவிட்டது. மற்றபடி, கோலடிக்க வாய்ப்புள்ள அபாயகரமான பகுதியிலிருந்து அவர் வெகு தொலைவிலேயே ஸ்பெயின் அணியால் கட்டுப்படுத்தப்பட்டார்.

அர்ஜென்டினாவின் அணுகுமுறை மெஸ்ஸிக்கு உதவவில்லை, ஏனெனில் அந்த அணி வீரர்கள் தங்களால் உண்மையில் வெளிப்படுத்தக்கூடிய தரத்தில் கவனம் செலுத்துவதற்குப் பதிலாக, ஸ்பெயினை விரக்திக்கு உள்ளாக்குவதிலேயே குறியாக இருந்தனர்.

உலகக்கோப்பையைத் தக்கவைப்பதற்கான முயற்சியில் அர்ஜென்டினா இந்த தொடரில் விறுவிறுப்பான ஆட்டங்களை அளித்தது; ஆனாலும், ஸ்பெயினின் வெற்றி பற்றி அர்ஜென்டினாவால் குறை கூற முடியாது.

– இது பிபிசிக்காக கலெக்டிவ் நியூஸ்ரூம் வெளியீடு