ലണ്ടന്‍: ലോക ഫുട്‌ബോളിലെ സൂപ്പര്‍ താരം ക്രിസ്റ്റ്യാനോ റൊണാള്‍ഡോയും വര്‍ഷങ്ങളായുള്ള പങ്കാളിയും പ്രശസ്ത മോഡലുമായ ജോര്‍ജിന റോഡ്രിഗസും ഒടുവില്‍ വിവാഹിതരാകുന്നു. റൊണാള്‍ഡോയുടെ ജന്മനാടായ പോര്‍ച്ചുഗലിലെ മദീറ ദ്വീപില്‍ വെച്ച് വരും ആഴ്ചയില്‍ അതിഗംഭീരമായ രീതിയില്‍ വിവാഹച്ചടങ്ങുകള്‍ നടത്താന്‍ പദ്ധതിയിട്ടതായി അന്താരാഷ്‌ട്ര മാധ്യമങ്ങള്‍ റിപ്പോര്‍ട്ട് ചെയ്തു.

2016 മുതല്‍ ഒന്നിച്ചു ജീവിക്കുന്ന ഇരുവരുടെയും ഒന്‍പത് വര്‍ഷം നീണ്ട പ്രണയത്തിനാണ് ഇതോടെ ഔദ്യോഗിക സാഫല്യമാകുന്നത്. റൊണാള്‍ഡോ ജനിച്ചു വളര്‍ന്ന മദീറയിലെ ഫുഞ്ചാല്‍ കത്തീഡ്രലില്‍ വെച്ചാണ് വിവാഹച്ചടങ്ങുകള്‍ നടക്കുക. അടുത്ത ശനിയാഴ്ച ഉച്ചയ്‌ക്ക് 3 മണിയോടെ ചടങ്ങുകള്‍ ആരംഭിക്കുമെന്നാണ് റിപ്പോര്‍ട്ടുകള്‍. കത്തീഡ്രലിന് സമീപത്തുള്ള പ്രമുഖ പഞ്ചനക്ഷത്ര ഹോട്ടലായ ‘സവോയ് പാലസ്’ വിവാഹ സല്‍ക്കാരത്തിനായി മാറ്റിവെച്ചിരിക്കുകയാണ്. വിഐപി അതിഥികള്‍ മാത്രം പങ്കെടുക്കുന്ന ചടങ്ങിനായി ഹോട്ടലിന്റെ രണ്ട് ഫ്‌ളോറുകളും പ്രമുഖ ബാര്‍ ഏരിയകളും പൂര്‍ണ്ണമായും ബുക്ക് ചെയ്തിട്ടുണ്ട്.

പോര്‍ച്ചുഗല്‍ ടീം ലോകകപ്പ് 2026 പ്രീക്വാര്‍ട്ടറില്‍ പുറത്തായെങ്കിലും 41കാരനായ ക്രിസ്റ്റ്യാനോ വിരമിക്കലിനെ കുറിച്ച് യാതൊന്നും വ്യക്തമാക്കിയിട്ടില്ല. നിലവില്‍ സൗദി പ്രോ ലീഗിലെ അല്‍ നാസര്‍ ടീമിനായാണ് കളിക്കുന്നത്. പങ്കാളി ജോര്‍ജിന റോഡ്രിഗസിന് 32 വയസ്സാണുള്ളത്.