തൃശൂര്: സര്ക്കാര് ഓഫീസുകളില് നല്കുന്ന അപേക്ഷകള് ചുവപ്പും പച്ചയും മഷികൊണ്ട് എഴുതാന് പാടില്ലെന്ന് ആരാണ് പറഞ്ഞത്?. കാലങ്ങളായി ഗസറ്റഡ് ഉദ്യോഗസ്ഥരും മറ്റും പറയാതെ പറഞ്ഞ് ഉറപ്പിച്ചിരുന്ന ആ ധാരണ തിരുത്തിയിരിക്കുകയാണ് സംസ്ഥാന ഭരണപരിഷ്കാര വകുപ്പ്. ഓഫീസുകളില് നല്കുന്ന അപേക്ഷകള് ഏതു തരം മഷിയിലും എഴുതാമെന്നും വായിക്കാന് കഴിയും വിധം ആയിരിക്കണമെന്നേ നിര്ബന്ധമുളളൂവെന്നും പൊതുപ്രവര്ത്തകനായ ഷാന്റി ജോസഫ് തട്ടകത്തിന് ലഭിച്ച വിവരാവകാശ നിയമപ്രകാരമുള്ള മറുപടിയില് ഭരണപരിഷ്കാര വകുപ്പ് ജോയിന്റ് സെക്രട്ടറി വ്യക്തമാക്കി. പൊതുജനങ്ങള് നീല, കറുപ്പ് മഷികള് മാത്രമാണ് ഇക്കാലമത്രയും സര്ക്കാര് ഓഫീസുകളിലേക്കുള്ള അപേക്ഷകളും മറ്റും തയ്യാറാക്കാന് ഉപയോഗിച്ചിരുന്നത്. ചുവപ്പും പച്ചയും ഉന്നത ഉദ്യോഗസ്ഥര്ക്കു മാത്രമെന്നും കരുതപ്പെട്ടിരുന്നു. വ്യക്തതയുള്ളതും മാഞ്ഞു പോകാത്തതുമായ ഏതുതരംമഷി കൊണ്ട് എഴുതിയാലും അതിന്റെ പേരില് അപേക്ഷകള് നിരസിക്കാന് പാടില്ലെന്ന് വകുപ്പ് വ്യക്തമാക്കുന്നു.