അഹമ്മദാബാദ്: ഇന്നത്തെ ഭാരതം മുമ്പെന്നത്തേക്കാളും സുരക്ഷിതവും കൂടുതല്‍ ദൃഢനിശ്ചയമുള്ളതുമാണെന്ന് പ്രധാനമന്ത്രി നരേന്ദ്ര മോദി.ജനങ്ങളിലുണ്ടാകുന്ന വര്‍ധിച്ചുവരുന്ന ആത്മവിശ്വാസമാണ് ഇതിനൊരു പ്രധാന കാരണമെന്ന് അദ്ദേഹം പറഞ്ഞു. രാജ്യത്ത് നക്‌സലിസത്തിന് ശക്തമായ തിരിച്ചടി നല്‍കാന്‍ സാധിച്ചുവെന്നും അദ്ദേഹം ചൂണ്ടിക്കാട്ടി.
സോമനാഥ ക്ഷേത്രം, കാശി വിശ്വനാഥ ക്ഷേത്രം, രാമക്ഷേത്രം തുടങ്ങിയ സാംസ്‌കാരിക കേന്ദ്രങ്ങളുടെ പുനര്‍നിര്‍മ്മാണം ഇന്ത്യയുടെ വര്‍ധിച്ചുവരുന്ന ആത്മാഭിമാനത്തിന്റെയും സാമ്പത്തിക പുരോഗതിയുടെയും പ്രതീകമാണെന്ന് പ്രധാനമന്ത്രി പറഞ്ഞു.ഗുജറാത്തിലെ ഏകതാ നഗറില്‍ 400 കോടിയിലധികം രൂപയുടെ വിവിധ വികസന പദ്ധതികള്‍ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യുകയും അവ രാജ്യത്തിന് സമര്‍പ്പിക്കുകയും ചില പദ്ധതികള്‍ക്ക് തറക്കല്ലിടുകയും ചെയ്തു. മലിനജല സംസ്‌കരണ പ്ലാന്റ് ,കെട്ടിടങ്ങളുടെ മുന്‍ഭാഗം പ്രകാശമാനമാക്കുന്നതിനുള്ള സംവിധാനങ്ങള്‍ (ഫസാഡ് ലൈറ്റിംഗ്), നര്‍മ്മദ ഘാട്ടിന്റെ നവീകരണം, ‘റെയിന്‍ ഫോറസ്റ്റ്’ പദ്ധതി എന്നിവ ഇതില്‍ ഉള്‍പ്പെടുന്നു.
2047-ഓടെ ശക്തവും വികസിതവുമായ ഒരു ഭാരതം കെട്ടിപ്പടുക്കുക എന്ന ദൃഢനിശ്ചയത്തോടെയാകണം നമ്മുടെ ഓരോ പ്രവര്‍ത്തനവും എന്ന് പ്രധാനമന്ത്രി പറഞ്ഞു.
സര്‍ദാര്‍ പട്ടേലിന്റെ 151-ാം ജന്മവാര്‍ഷികത്തോടനുബന്ധിച്ച് ഗുജറാത്തിലെ ഏകതാ നഗറില്‍ നടന്ന ‘രാഷ്‌ട്രീയ ഏകതാ ദിവസ്’ ആഘോഷങ്ങളില്‍ പ്രധാനമന്ത്രി പങ്കെടുത്തു.ശനിയാഴ്ച വൈകുന്നേരം നടന്ന ചടങ്ങില്‍ സംസാരിക്കവെ, രാജ്യത്തിന്റെ ഐക്യം കെട്ടിപ്പടുക്കുന്നതിലും സംരക്ഷിക്കുന്നതിലും സര്‍ദാര്‍ പട്ടേല്‍ വഹിച്ച നിര്‍ണായക പങ്കിനെ പ്രധാനമന്ത്രി അനുസ്മരിച്ചു.സര്‍ദാര്‍ വല്ലഭഭായ് പട്ടേലിന്റെ ജന്മവാര്‍ഷികത്തോടനുബന്ധിച്ച്, അദ്ദേഹത്തിന് ആദരാഞ്ജലികള്‍ അര്‍പ്പിക്കുന്നതില്‍ പ്രധാനമന്ത്രി നരേന്ദ്ര മോദി രാജ്യത്തിന് നേതൃത്വം നല്‍കി.