സാന്റിയാഗോ: ഭൂമിയിലെ ഏറ്റവും വരണ്ട പ്രദേശങ്ങളിലൊന്നായ ചിലിയിലെ അറ്റകാമ മരുഭൂമിയിൽ അപൂർവ വസന്തം. എൽ നിനോ കാലാവസ്ഥാ പ്രതിഭാസത്തെ തുടർന്നുണ്ടായ കനത്ത മഴയിൽ മരുഭൂമി പൂത്തുലഞ്ഞു നിൽക്കുന്ന ‘ഫ്ലവറിംഗ് ഡെസർട്ട്’ (Desierto Florido) എന്ന അത്ഭുത പ്രകൃതി പ്രതിഭാസമാണ് ഇവിടെ ദൃശ്യമായിരിക്കുന്നത്.

വരണ്ടുകിടന്നിരുന്ന ആയിരക്കണക്കിന് ഹെക്‌ടർ പ്രദേശം ഇപ്പോൾ വയലറ്റ്, വെള്ള, പിങ്ക് നിറങ്ങളിലുള്ള മനോഹരമായ പൂക്കളാൽ മൂടപ്പെട്ടിരിക്കുകയാണ്.

ഈ അപൂർവ്വ പ്രകൃതിസൗന്ദര്യം നേരിട്ട് കാണാൻ ലോകത്തിന്റെ വിവിധ ഭാഗങ്ങളിൽ നിന്നുള്ള വിനോദസഞ്ചാരികളും ഫോട്ടോഗ്രാഫർമാരും ഇവിടേക്ക് ഒഴുകിയെത്തുന്നുണ്ട്.

മണ്ണിൽ ഉറങ്ങിക്കിടന്ന വിത്തുകൾ ഉണർന്നു

അറ്റകാമ മരുഭൂമിയുടെ മണ്ണിനടിയിൽ ഇരുനൂറോളം അപൂർവ സസ്യവർഗങ്ങളുടെ വിത്തുകളും കിഴങ്ങുകളും വർഷങ്ങളോളം സുഷുപ്‌താവസ്ഥയിൽ നിലനിൽക്കാറുണ്ട്. മുളക്കാൻ ആവശ്യമായ ഈർപ്പം ലഭിക്കുമ്പോൾ മാത്രം ഇവ വളർന്ന് പുഷ്പിക്കുകയാണ് പതിവ്.

ഇത്തവണ എൽ നിനോയെ തുടർന്ന് അസാധാരണമാംവിധം കനത്ത മഴ ലഭിച്ചതാണ് മരുഭൂമിയെ പൂക്കളുടെ പറുദീസയാക്കി മാറ്റിയത്.

റെക്കോർഡ് മഴ:

ചിലിയുടെ ദേശീയ വനവകുപ്പായ കോനാഫിന്റെ (CONAF) കണക്കുകൾ പ്രകാരം, ചില പ്രദേശങ്ങളിൽ 180 മില്ലിമീറ്ററിലധികം മഴ ലഭിച്ചു. മുൻവർഷങ്ങളിൽ രേഖപ്പെടുത്തിയതിനേക്കാൾ വളരെ ഉയർന്ന അളവാണിതെന്ന് അറ്റകാമ ജൈവവൈവിധ്യ മാനേജർ സീസർ പിസാറോ വ്യക്തമാക്കി.

ഏറ്റവും വലിയ സീസൺ:

മഴവെള്ളം മണലിന്റെ ആഴങ്ങളിലേക്ക് ഇറങ്ങിയതോടെ സസ്യവളർച്ച വ്യാപകമായി. തലസ്ഥാനമായ സാന്റിയാഗോയിൽ നിന്ന് 800 കിലോമീറ്റർ വടക്കുള്ള സംരക്ഷിത പ്രകൃതി മേഖലയിലാണ് പൂക്കൾ കൂടുതൽ വിരിഞ്ഞുനിൽക്കുന്നത്.

ഒക്ടോബറിൽ പൂർണ്ണശോഭ:

വരുംദിവസങ്ങളിൽ പൂത്തുലയൽ വർധിച്ച് ഒക്ടോബർ മാസത്തോടെ ഇത് പൂർണ്ണ ശോഭയിലെത്തുമെന്നും ഏകദേശം 15,000 ഹെക്ടറോളം പ്രദേശം പൂക്കളാൽ മൂടപ്പെടുമെന്നുമാണ് അധികൃതരുടെ വിലയിരുത്തൽ.

എന്താണ് എൽ നിനോ?

മധ്യ, കിഴക്കൻ പസഫിക് സമുദ്രത്തിലെ ഉപരിതല ജലത്തിന്റെ താപനില ക്രമാതീതമായി ഉയരുന്ന കാലാവസ്ഥാ വ്യതിയാനമാണ് എൽ നിനോ.

ഇത് ആഗോളതലത്തിൽ മഴയുടെയും കാറ്റിന്റെയും ഗതിമാറ്റുകയും ചില പ്രദേശങ്ങളിൽ വരൾച്ചയ്ക്കും മറ്റു ചിലയിടങ്ങളിൽ അതിതീവ്ര മഴയ്ക്കും കാരണമാവുകയും ചെയ്യുന്നു.

കഴിഞ്ഞ നാല് പതിറ്റാണ്ടിനിടെ ലോകം കണ്ട ഏറ്റവും ശക്തമായ എൽ നിനോ പ്രതിഭാസങ്ങളിലൊന്നാണ് ഇപ്പോഴുണ്ടായിരിക്കുന്നത്.

അതേസമയം, ചിലിയിൽ അടുത്തിടെ പെയ്ത കനത്ത മഴ വൻ നാശനഷ്ടങ്ങളും വിതച്ചിരുന്നു. പ്രളയത്തിലും മഴക്കെടുതികളിലും പെട്ട് 13 ആളുകൾ മരിക്കുകയും അയ്യായിരത്തോളം വീടുകൾ തകരുകയും ചെയ്തിരുന്നു.