തിരുവനന്തപുരം: തലസ്ഥാന നഗരമധ്യത്തില് പട്ടാപ്പകല് യുവാവിനെ അയല്വാസി വെട്ടിക്കൊന്നു. കൈതമുക്കിന് സമീപം പാല്ക്കുളങ്ങരയില് ഞായറാഴ്ച ഉച്ചയ്ക്ക് 2 മണിയോടെ ആണ് കൊലപാതകം. വിശാഖ്(44) ആണ് കൊല്ലപ്പെട്ടത്.സംഭവത്തില് അയല്വാസിയായ പ്രദീപിനായി പൊലീസ് അന്വേഷണം ആരംഭിച്ചു.
ഏറെനാളായി വിശാഖിന്റെ കുടുംബവും അയല്വാസിയുമായി വഴിത്തര്ക്കമുണ്ടായിരുന്നു.പ്രദീപിനെ ആക്രമിച്ച കേസില് വിശാഖ് ജയില്വാസം അനുഭവിച്ചിട്ടുണ്ട്.ജയിലില് നിന്ന് പുറത്തിറങ്ങിയ ശേഷം മലയിന്കീഴിലെ ഒരു വീട്ടിലേക്ക് വിശാഖ് താമസം മാറിയിരുന്നു.പാല്ക്കുളങ്ങരയിലെ വീട്ടില് കൊല്ലപ്പെട്ട വിശാഖിന്റെ അമ്മ മാത്രമാണ് താമസിച്ചിരുന്നത്.ഞായറാഴ്ച അമ്മയെ കാണാനെത്തിയ ശേഷം ഭക്ഷണം വാങ്ങാനായി കൈതമുക്കില് എത്തിയപ്പോഴാണ് ആക്രമണമുണ്ടായത്.
കാറിലെത്തിയ പ്രദീപ് കൈയില് കരുതിയിരുന്ന വാളുകൊണ്ട് വിശാഖിനെ വെട്ടുകയായിരുന്നു. തലയിലും കൈയ്യിലും വയറിലും ഗുരുതരമായി പരിക്കേറ്റ വിശാഖിനെ വഞ്ചിയൂര് പൊലീസെത്തി ആശുപത്രിയില് എത്തിച്ചെങ്കിലും ജീവന് നഷ്ടമായിരുന്നു.
പൊലീസ് തെരച്ചിലില് പ്രതിയും ഒപ്പം രണ്ട് സുഹൃത്തുക്കളും രക്ഷപ്പെട്ട മാരുതി ആള്ട്ടോ കാര് പുലയനാര്കോട്ട ആശുപത്രിക്ക് സമീപം കണ്ടെത്തി. കാറില് മദ്യക്കുപ്പിയും മൂന്ന് വെട്ടുകത്തികളും ഉണ്ട്.പ്രതികള് വാഹനം ഇവിടെ ഉപേക്ഷിച്ച ശേഷം ഓട്ടോറിക്ഷയില് കടന്നുകളഞ്ഞെന്നാണ് പൊലീസ് പറയുന്നത്.