ആലപ്പുഴ: പുന്നമടക്കായലിലെ 72 -ാമത് നെഹ്‌റു ട്രോഫി വള്ളംകളി ട്രോഫിയില്‍ വെളളി കപ്പില്‍ മുത്തമിട്ട് അരോമ ചുണ്ടന്‍.4:23.328 എന്ന സമയത്തില്‍ ഫിനിഷ് ചെയ്തു.മില്ലിസെക്കന്‍ഡുകളുടെ മാത്രം വ്യത്യാസത്തിലാണ് അരോമ കപ്പ് നേടിയത്. അരോമയുടെ ആദ്യ കിരീടമാണിത്.
4:23.448 സമയത്തില്‍ ഫിനിഷ് ചെയ്ത നടുഭാഗം രണ്ടാം സ്ഥാനവും 4:23.770 സമയത്തില്‍ വീയപുരം മൂന്നാം സ്ഥാനവും നേടി. 4:24.015 സമയത്തില്‍ മേല്‍പാടം നാലാം സ്ഥാനത്തെത്തി.

22 ചുണ്ടന്‍വള്ളങ്ങള്‍ ഉള്‍പ്പെടെ 71 കളിവള്ളങ്ങളാണ് ഇത്തവണ മത്സരത്തിനുണ്ടായിരുന്നത്. ഉച്ചയ്‌ക്ക് രണ്ട് മണിക്ക് മുഖ്യമന്ത്രി വി ഡി സതീശന്‍ വള്ളംകളി ഉദ്ഘാടനം ചെയ്തു.കേന്ദ്ര ടൂറിസം മന്ത്രി ഗജേന്ദ്ര സിംഗ് ഷെഖാവത്ത്, കര്‍ണാടക മുഖ്യമന്ത്രി ഡി കെ ശിവകുമാര്‍ മുഖ്യാതിഥിയായിരുന്നു. മന്ത്രിമാരായ രമേശ് ചെന്നിത്തല, എം ലിജു, പി സി വിഷ്ണുനാഥ്, ഡെപ്യൂട്ടി സ്പീക്കര്‍ ഷാനിമോള്‍ ഉസ്മാന്‍, എം പിമാരായ കെ സി വേണുഗോപാല്‍, കൊടിക്കുന്നില്‍ സുരേഷ് തുടങ്ങിയവര്‍ ചടങ്ങില്‍ പങ്കെടുത്തു.

രാവിലെ 11ന് ചെറുവള്ളങ്ങളുടെ ഹീറ്റ്‌സ് മത്സരങ്ങളോടെയാണ് പരിപാടികള്‍ തുടങ്ങിയത്. ഉദ്ഘാടന സമ്മേളനത്തിന് ശേഷം വള്ളങ്ങളുടെ മാസ് ഡ്രില്‍ അരങ്ങേറി.ചുണ്ടന്‍വള്ളങ്ങളുടെ ഹീറ്റ്‌സിനുശേഷം ചെറുവള്ളങ്ങളുടെ ഫൈനലും തുടര്‍ന്ന് ചുണ്ടന്‍വള്ളങ്ങളുടെ ഫൈനല്‍ മത്സരവും നടന്നു. നെഹ്രു ട്രോഫി ജേതാക്കള്‍ക്ക് 25 ലക്ഷം രൂപ സമ്മാനത്തുക ലഭിക്കും.