തിരുവനന്തപുരം: കേരളീയരായ പ്രവാസികള്‍ക്കും കുടുംബാംഗങ്ങള്‍ക്കുമായി നോര്‍ക്കാ റൂട്ട്‌സ് നടപ്പാക്കിയ ആരോഗ്യ അപകട ഇന്‍ഷ്വറന്‍സ് നോര്‍ക്ക കെയര്‍ പ്ലസ് പദ്ധതിയില്‍ ചേരാന്‍ ഒരുമാസ കാലയളവ് അനുവദിച്ചു. പദ്ധതിയില്‍ അംഗമാകാന്‍ ആഗസ്ത് 18 മുതല്‍ സപ്തംബര്‍ 18 വരെയാണ് കാലാവധി അനുവദിച്ചിരിക്കുന്നത്.

പദ്ധതിയില്‍ അംഗമാകാന്‍ ഈ വര്‍ഷം ഒരു തവണ കൂടി അവസരം നല്‍കണമെന്ന പ്രവാസികളുടെ ആവശ്യത്തെത്തുടര്‍ന്നാണ് നടപടി. 18ന് മുഖ്യമന്ത്രിയുടെ ചേംബറില്‍ നടക്കുന്ന ചടങ്ങില്‍ മുഖ്യമന്ത്രി വി.ഡി. സതീശന്‍ പദ്ധതി എന്റോള്‍മെന്റ് ഉദ്ഘാടനം ചെയ്യും. ഒരു കോടി വരെ ചികിത്സാ ധനസഹായം ലഭിക്കുന്ന പദ്ധതിയാണ് നോര്‍ക്ക കെയര്‍ പ്ലസ്.

അഞ്ചുലക്ഷം രൂപയുടെ ആരോഗ്യ ഇന്‍ഷ്വറന്‍സും 10 ലക്ഷത്തിന്റെ ഗ്രൂപ്പ് പേഴ്‌സണല്‍ ആക്‌സിഡന്റ് പരിരക്ഷയുമാണ് നോര്‍ക്ക കെയര്‍ നല്‍കുന്നത്. 2025 സപ്തംബര്‍ 22 മുതല്‍ നവംബര്‍ 30വരെ സംഘടിപ്പിച്ച നോര്‍ക്ക കെയര്‍ പദ്ധതിയുടെ ആദ്യഘട്ട എന്റോള്‍മെന്റില്‍ 136 രാജ്യങ്ങളില്‍ നിന്നായി 1,32,034 പ്രവാസി കേരളീയ കുടുംബങ്ങള്‍ എന്റോള്‍ ചെയ്‌തെന്നും നോര്‍ക്ക സിഇഒ രാജേഷ് മാധവന്‍, ജനറല്‍ മാനേജര്‍ പ്രകാശ് പി. ജോസഫ്, സെക്ഷന്‍ ഓഫീസര്‍ രമണ. കെ എന്നിവര്‍ വാര്‍ത്താസമ്മേളനത്തില്‍ പറഞ്ഞു. കേരളത്തിലെ 618 ആശുപത്രികള്‍ ഉള്‍പ്പെടെ രാജ്യത്തെ 24000ത്തോളം ആശുപത്രികള്‍ വഴി പ്രവാസി കേരളീയര്‍ക്ക് ചികിത്സ ഉറപ്പാക്കുന്നതാണ് പദ്ധതി.