അയ്മനം: ഭരണപക്ഷവും പ്രതിപക്ഷവും തമ്മിലുള്ള വാക്പോരാട്ടത്തിന്റെ ശബ്ദകോലാഹലത്താലല്ല, സ്നേഹവാത്സല്യങ്ങളുടെ കുപ്പിവളക്കിലുക്കത്താല് മുഖരിതമായിരുന്നു അയ്മനം ഗ്രാമപ്പഞ്ചായത്ത് ഓഫീസിലെ ആ സായന്തനം. പഞ്ചായത്ത് സെക്രട്ടറി വി. പാര്വതി മേനോന്റെ വളകാപ്പ് ചടങ്ങ് ഭരണപക്ഷത്തെയും പ്രതിപക്ഷത്തെയും ജനപ്രതിനിധികളും ഓഫീസിലെ ഉദ്യോഗസ്ഥരുമെല്ലാം ചേര്ന്ന് ആഘോഷമാക്കുകയായിരുന്നു അവിടെ.
ഔദ്യോഗിക ചിട്ടവട്ടങ്ങളും രാഷ്ട്രീയവ്യാത്യാസങ്ങളും കസേരകളുടെ വലുപ്പച്ചെറുപ്പവുമെല്ലാം മാറിനിന്നു. സ്നേഹത്തിന്റെയും കൂട്ടയ്മയുടെയും പരസ്പരമുള്ള കരുതലിന്റെയും ‘പഞ്ചായത്ത് യോഗ’ മായി വളകാപ്പ് ചടങ്ങ് മാറി. കുടുംബാന്തരീക്ഷത്തിലുള്ള ഒത്തുചേരല് സൗഹൃദത്തിന്റെയും ഒത്തൊരുമയുടെയും മനോഹരമായ നിമിഷങ്ങളാണ് സമ്മാനിച്ചത്.
ബുധനാഴ്ച ഓഫീസ് പിരിഞ്ഞ്, അഞ്ചുമണിക്കു ശേഷമായിരുന്നു പരിപാടി. പഞ്ചായത്തിന്റെ ഓരോ പ്രവര്ത്തനങ്ങളിലും ആത്മാര്ത്ഥതയോടെയും സക്രിയമായും ഇടപെട്ട് മാതൃകാപരമായ സേവനം കാഴ്ചവെക്കുന്ന പ്രിയപ്പെട്ട സെക്രട്ടറിക്കായി ജീവനക്കാരും ജനപ്രതിനിധികളും മുന്കൈയെടുത്താണ് വളകാപ്പ് ഒരുക്കിയത്.
പഞ്ചായത്ത് കമ്യൂണിറ്റി ഹാളില് നടന്ന ചടങ്ങില് പഞ്ചായത്ത് പ്രസിഡന്റ് ബിന്ദു ഹരികുമാറും വൈസ്പ്രസിഡന്റ് അനു ശിവപ്രസാദും മെമ്പര്മാരും ചേര്ന്ന് നിലവിളക്കു കൊളുത്തി. പാര്വതി മേനോന് കേക്ക് മുറിച്ചു. പ്രസിഡന്റും വൈസ് പ്രസിഡന്റും സ്ഥിരം സമിതി അധ്യക്ഷരും പഞ്ചായത്തംഗങ്ങളും ജീവനക്കാരുമെല്ലാം ചേര്ന്ന് സെക്രട്ടറിയെ കുപ്പിവള അണിയിച്ചു, മധുരവും നല്കി. പാര്വതി മേനോന്, സന്തോഷപൂര്ണമായ മാതൃത്വകാലവും ആരോഗ്യവും ഐശ്വര്യവും നിറഞ്ഞ ജീവിതവും ഏവരും ആശംസിച്ചു.
നാലു മാസമായി അയ്മനം പഞ്ചായത്ത് സെക്രട്ടറിയാണ് ഏറ്റുമാനൂര് സ്വദേശിനിയായ പാര്വതി മേനോന്. വളക്കാപ്പ് ചടങ്ങില് പങ്കെടുക്കാന് സാധിച്ചത് സന്തോഷകരമായ അനുഭവമായെന്ന് പഞ്ചായത്തംഗങ്ങളും ജീവനക്കാരും പറഞ്ഞു. പ്രസിഡന്റും മെമ്പര്മാരും ഉദ്യോഗസ്ഥരും ഉള്പ്പെടെ മിക്കവരും ചടങ്ങ് ഫേയ്സ്ബുക്കിലൂടെ പങ്കുവെക്കുകയും ചെയ്തു. ഗ്രാമപ്പഞ്ചായത്ത് പ്രസിഡന്റ് ബിന്ദു ഹരികുമാര്, വൈസ് പ്രസിഡന്റ് അനു ശിവപ്രസാദ,് അസി. സെക്രട്ടറി ഡി. മധു, ജൂനിയര് സൂപ്രണ്ട് കെ.വി. ബിജുമോന്, അസി. എന്ജിനീയര് പ്രിയ മേരി ഫിലിപ്പ് തുടങ്ങിയവര് ചടങ്ങിന് നേതൃത്വം നല്കി.