ലോസ് അഞ്ചലസ്: ലോകകപ്പ് ഫുട്ബോള്‍ 2026ന്റെ ആദ്യ റൗണ്ടില്‍ നേരിട്ട സമനില ക്ഷീണത്തില്‍ നിന്നും സ്വിസ്സ് പടയ്‌ക്ക് ആശ്വാസം.

ബോസ്നിയക്കെതിരായ പോരാട്ടത്തില്‍ 4-1ന്റെ വിജയം നേടി രണ്ടാം റൗണ്ട് പ്രതീക്ഷകള്‍ സജീവമാക്കി. പകരക്കാരനായി ഇറങ്ങിയ യോഹാന്‍ മൊന്‍സാംബിയുടെ ഇരട്ട ഗോളുകളായിരുന്നു മത്സരത്തിന്റെ ഹൈലൈറ്റ്. ജര്‍മന്‍ ബുന്ദെസ് ലിഗയില്‍ എസ് സി ഫ്രീബര്‍ഗിനായി കളിക്കുന്ന താരം ബോസ്നിയക്കെതിരെ 70-ാം മിനിറ്റിലാണ് കളത്തിലിറങ്ങിയത് നാല് മിനിറ്റിനകം ആദ്യ ഗോള്‍ കണ്ടെത്തി, ടീമിനെ മുന്നിലെത്തിച്ചു. 80-ാം മിനിറ്റില്‍ ബോസ്നിയന്‍ സെന്റര്‍ ഡിഫെന്‍ഡര്‍ താരിക് മുഹറ മോവിച് ചുവപ്പ് കാര്‍ഡ് കണ്ട് പുറത്തായതോടെ സ്വിറ്റ്സര്‍ലന്‍ഡ് മുന്നേറ്റത്തിന് കൂടുതല്‍ സ്പേസ് കിട്ടി. ഈ അവസരം മുതലെടുത്തുകൊണ്ട് സ്വിസ്സ് മൂന്ന് ഗോളുകളാണ് ബോസ്നിയന്‍ കൂട്ടിലേക്ക് അടിച്ചു കയറ്റിയത്. 84-ാം മിനിറ്റില്‍ റൂബന്‍ വര്‍ഗാസ് ലീഡ് ഇരട്ടിപ്പിച്ചു. 90-ാം മിനിറ്റി മൊന്‍സാംബിയുടെ ഇരട്ട ഗോള്‍ വഴി സ്വിസ്സ് ലീഡ് 3-0 ആയി.

നോക്കൗട്ട് ലക്ഷ്യമാക്കാന്‍ പിന്നെയും സ്‌കോര്‍ ചെയ്ത് കൂടുതല്‍ ഗോള്‍ മാര്‍ജിന്‍ നേടാനുള്ള സ്വിസ്സ് ശ്രമത്തിനിടെ ബോസ്നിയക്ക് ലഭിച്ച അവസരത്തില്‍ തിരിച്ചടി നല്‍കി. 90+3-ാം മിനിറ്റില്‍ എര്‍മിന്‍ മാഹ്‌മിച്ച് ആണ് ബോസ്നിയക്കായ് ഗോളടിച്ചത്. ലോങ് വിസിലിന് മുമ്പേ പെനാല്‍റ്റി നേടിയെടുത്ത സ്വിറ്റ്സര്‍ലന്‍ഡിനായി സൂപ്പര്‍ താരം ഗ്രാനിറ്റ് ഷാക്ക ടീമിന് നാലാം ഗോളും സമ്മാനിച്ചു. ഗ്രൂപ്പ് ബിയില്‍ കാനഡയ്‌ക്ക് പിന്നില്‍ നാല് പോയിന്റുകളുമായി രണ്ടാമതാണ് സ്വിറ്റ്സര്‍ലന്‍ഡ്.