ന്യൂദല്‍ഹി: ബംഗ്ലാദേശ് റെയില്‍വേക്കായുള്ള ആദ്യ 20 എല്‍എച്ച്ബി ബ്രോഡ്ഗേജ് പാസഞ്ചര്‍ റാക്ക് നിര്‍മാണം പൂര്‍ത്തിയായി. പഞ്ചാബ് കപൂര്‍ത്തലയിലെ റെയില്‍ കോച്ച് ഫാക്ടറിയില്‍ നിര്‍മാണം പൂര്‍ത്തിയായ റാക്ക് ഇന്ന് പുറത്തിറക്കും. ഇതോടെ കപൂര്‍ത്തല റെയില്‍ കോച്ച് ഫാക്ടറി മറ്റൊരു സുപ്രധാന നാഴികക്കല്ല് കൂടി പിന്നിടുകയാണ്.

മൂന്ന് എസി സ്ലീപ്പര്‍ കോച്ചുകള്‍, മൂന്ന് എസി ചെയര്‍ കാറുകള്‍, 12 നോണ്‍ എസി ചെയര്‍ കാറുകള്‍, രണ്ട് പവര്‍ കാറുകള്‍ എന്നിവയാണ് ഈ റാക്കില്‍ ഉള്‍പ്പെടുത്തിയിരിക്കുന്നത്. മികച്ച ഡിസൈന്‍, എഞ്ചിനീയറിങ്, നിര്‍മാണ ശേഷി എന്നിവ വിളിച്ചോതുന്ന തരത്തില്‍, എല്‍എച്ച്ബി കോച്ചുകളില്‍ ആദ്യമായി അവതരിപ്പിക്കുന്നത് ഉള്‍പ്പെടെ നിരവധി സവിശേഷതകളും ഈ കോച്ചുകളിലുണ്ട്.

2015- 16ല്‍ 120 എല്‍എച്ച്ബി ബ്രോഡ്ഗേജ് പാസഞ്ചര്‍ കോച്ചുകള്‍ നിര്‍മിച്ച് കൈമാറിയതോടെയാണ് കപൂര്‍ത്തല റെയില്‍ കോച്ച് ഫാക്ടറിയും ബംഗ്ലാദേശ് റെയില്‍വേയും തമ്മിലുള്ള സഹകരണം ആരംഭിച്ചത്. ഇതിന് പിന്നാലെ 2024ല്‍ ഏഴ് വ്യത്യസ്ത വിഭാഗങ്ങളിലായി 200 ബ്രോഡ്‌ഗേജ് പാസഞ്ചര്‍ കോച്ചുകള്‍ നിര്‍മിക്കുന്നതിനുള്ള ഓര്‍ഡര്‍ കൂടി ബംഗ്ലാദേശ് റെയില്‍വേയില്‍ നിന്ന് ലഭിക്കുകയായിരുന്നു.

റെയില്‍വേ മേഖലയില്‍ ഭാരതവും ബംഗ്ലാദേശും തമ്മിലുള്ള സഹകരണം കൂടുതല്‍ ശക്തിപ്പെടുത്തുന്നതിനൊപ്പം അന്താരാഷ്‌ട്രതലത്തില്‍ പുതിയ അവസരങ്ങള്‍ക്ക് തുടക്കം കുറിക്കുകയും ചെയ്യും.