കൊച്ചി : മോഡലിംഗിനെന്ന വ്യാജേന യുവതികളെ വിദേശത്തെത്തിച്ച് പലര്ക്കും കാഴ്ചവച്ച കേസില് മുഖ്യ സൂത്രധാരന് അറസ്റ്റില്. മാവേലിക്കര സ്വദേശി ബിലാല് എന്ന ശ്രീകുമാറിനെയാണ് പിടികൂടിയത്.
യുവതിയുടെ രഹസ്യ മൊഴിയുടെ അടിസ്ഥാനത്തിലാണ് ഇയാളുടെ അറസ്റ്റ്. പിടിയിലായ സിന്ധുവും ബിലാല് എന്ന ശ്രീകുമാറും തമ്മില് അടുത്ത ബന്ധമുണ്ടെന്ന് പൊലീസ് പറഞ്ഞു.യുവതികളെ വിദേശത്തേക്ക് കൊണ്ടുപോകുന്നതില് ബിലാലിന് നിര്ണായക പങ്കുണ്ട്. ഇതോടെ അറസ്റ്റിലായവരുടെ എണ്ണം നാലായി ആയി.
കേസിലെ മുഖ്യപ്രതി സിന്ധുവിന് ഗുണ്ടാസംഘങ്ങളുമായി ബന്ധമുണ്ടെന്ന് റിമാന്ഡ് റിപ്പോര്ട്ടില് പറയുന്നു.പരാതിക്കാരിയെ കൂട്ട ബലാല്സംഗത്തിന് ഇരയാക്കുന്നതിന്റെ ദൃശ്യങ്ങള് പകര്ത്തിയത് സിന്ധുവാണ്. ഇത് പരാതിക്കാരിയുടെ ഭര്ത്താവിന്റെ ഫോണിലേക്ക് അയച്ചു . സിന്ധു മറ്റ് പ്രതികള്ക്ക് പണം നല്കിയതിന് തെളിവുണ്ടെന്നും കേസില് കൂടുതല് പ്രതികളുണ്ടെന്നും റിമാന്ഡ് റിപ്പോര്ട്ടില് ഉണ്ട്.
പരാതിക്കാരിയെ കോളയില് വെളുത്ത പൊടി കലര്ത്തി കുടിപ്പിച്ചാണ് പീഡിപ്പിച്ചത്. പരാതിക്കാരിയെ രണ്ടാംപ്രതി ചൂരല് ഉപയോഗിച്ച് മര്ദിച്ചു. സിന്ധു, മഞ്ജിമ, അലീന എന്നിവരാണ് നേരത്തേ പിടിയിലായ പ്രതികള്. കൊച്ചിയില് എത്തിച്ച സിന്ധുവിനെ എറണാകുളം ഒന്നാം ക്ലാസ് മജിസ്ട്രേറ്റ് കോടതി ജൂണ് 4 വരെ റിമാന്ഡ് ചെയ്തു.