സോൾ: കൊറിയൻ ഉപദ്വീപിലെ സംഘർഷാവസ്ഥ രൂക്ഷമാക്കി ഉത്തര കൊറിയ വീണ്ടും ബാലിസ്റ്റിക് മിസൈൽ പരീക്ഷിച്ചു. രാജ്യത്തിന്റെ കിഴക്കൻ തീരത്തുള്ള വോൺസാൻ മേഖലയിൽ നിന്ന് പ്രാദേശിക സമയം ഉച്ചകഴിഞ്ഞ് മൂന്ന് മണിയോടെയാണ് ഹ്രസ്വദൂര ബാലിസ്റ്റിക് മിസൈൽ കിഴക്കൻ കടലിലേക്ക് തൊടുത്തത്.

മിസൈലിന്റെ കൃത്യമായ ദൂരവും സഞ്ചാരപഥവും സംബന്ധിച്ച വിവരങ്ങൾ ദക്ഷിണ കൊറിയൻ സൈന്യം വിശദമായി വിശകലനം ചെയ്തുവരികയാണ്. ഈ മാസം 12-നും സമാനമായ രീതിയിൽ വോൺസാൻ മേഖലയിൽ നിന്ന് ഉത്തര കൊറിയ മിസൈലുകൾ അയച്ചിരുന്നു. അന്ന് ഏകദേശം 250 കിലോമീറ്റർ ദൂരമാണ് ഈ മിസൈലുകൾ പിന്നിട്ടതെന്ന് ദക്ഷിണ കൊറിയ വ്യക്തമാക്കിയിരുന്നു.

ശത്രുരാജ്യങ്ങൾക്കുള്ള മുന്നറിയിപ്പ്

തന്ത്രപ്രധാനമായ ബാലിസ്റ്റിക്-ക്രൂയിസ് മിസൈലുകൾ, റോക്കറ്റ് ലോഞ്ചറുകൾ, ആധുനിക ഡ്രോണുകൾ എന്നിവ ഉൾപ്പെടുത്തി ഉത്തര കൊറിയ നടത്തുന്ന വിപുലമായ സൈനിക പരിശീലനങ്ങളുടെ ഭാഗമായാണ് ഈ പരീക്ഷണങ്ങളെന്ന് ഔദ്യോഗിക മാധ്യമങ്ങൾ സ്ഥിരീകരിക്കുന്നു.

ദക്ഷിണ കൊറിയ, യു.എസ്, ജപ്പാൻ എന്നീ രാജ്യങ്ങൾ ചേർന്ന് മേഖലയിൽ നടത്തിയ അഞ്ച് ദിവസം നീണ്ട സംയുക്ത സൈനിക അഭ്യാസമായ ‘ഫ്രീഡം എഡ്‌ജ്’ (Freedom Edge)-ന് തൊട്ടുപിന്നാലെയാണ് കിം ജോങ് ഉൻ ഭരണകൂടത്തിന്റെ ഈ നീക്കം. ശത്രുരാജ്യങ്ങളുടെ സൈനിക പ്രകോപനങ്ങൾക്കെതിരെ ശക്തമായ തിരിച്ചടി നൽകുമെന്ന് ഉത്തരകൊറിയൻ പ്രതിരോധമന്ത്രി കിം സോങ് ഗി നേരത്തെ മുന്നറിയിപ്പ് നൽകിയിരുന്നു.

ആണവ പ്രതിരോധശേഷി വർധിപ്പിക്കുമെന്ന് കിം യോ ജോങ്

മേഖലയിൽ യു.എസും സഖ്യകക്ഷികളും ബോധപൂർവ്വം സംഘർഷം വർദ്ധിപ്പിക്കുകയാണെന്ന് ഉത്തര കൊറിയൻ ഭരണകക്ഷി ഉദ്യോഗസ്ഥയും കിം ജോങ് ഉന്നിന്റെ സഹോദരിയുമായ കിം യോ ജോങ് കഴിഞ്ഞ ദിവസം ആരോപിച്ചിരുന്നു.

അമേരിക്കയുടെയും ജപ്പാന്റെയും വെല്ലുവിളികളെ പ്രതിരോധിക്കാൻ രാജ്യത്തിന്റെ ആണവ ശേഷി കൂടുതൽ ശക്തമാക്കുന്നത് തുടരുമെന്നും അവർ വ്യക്തമാക്കി.