തിരുവനന്തപുരം: മന്ത്രിമാർക്കും ഉന്നത ഉദ്യോഗസ്ഥർക്കുമെതിരായ വിജിലൻസ് അന്വേഷണങ്ങളുമായി ബന്ധപ്പെട്ട വിവരങ്ങൾ പൊതുജനങ്ങൾക്ക് ലഭ്യമാകുന്നതിൽ നിയന്ത്രണം ഏർപ്പെടുത്തി സംസ്ഥാന സർക്കാർ. വിജിലൻസ് ആൻഡ് ആന്റി കറപ്ഷൻ ബ്യൂറോയിലെ നിർണായകമായ ‘ടി’ സെക്ഷനെ വിവരാവകാശ നിയമത്തിന്റെ പരിധിയിൽനിന്ന് ഒഴിവാക്കിക്കൊണ്ട് സർക്കാർ വിജ്ഞാപനം പുറത്തിറക്കി.
പുതിയ ഉത്തരവോടെ രാഷ്‌ട്രീയ നേതാക്കൾ ഉൾപ്പെടെയുള്ള പ്രമുഖർക്കെതിരായ കേസുകളുമായി ബന്ധപ്പെട്ട അന്വേഷണ രേഖകൾ വിവരാവകാശ നിയമപ്രകാരം ലഭ്യമാക്കുന്നതിന് നിയന്ത്രണമുണ്ടാകും. ഏത് അന്വേഷണ രേഖകളാണ് ‘ടി’ സെക്ഷനിലേക്ക് മാറ്റേണ്ടതെന്ന് തീരുമാനിക്കാനുള്ള അധികാരം വിജിലൻസ് ഡയറക്ടർക്കാണ് നൽകിയിരിക്കുന്നത്. ഇതോടെ, ഈ വിഭാഗത്തിൽ ഉൾപ്പെടുത്തുന്ന രേഖകൾ പൊതുജനങ്ങൾക്ക് വിവരാവകാശ അപേക്ഷയിലൂടെ ലഭ്യമാകില്ല.
2022-ൽ ഈ സെക്ഷനിലെ വിവരങ്ങൾ വിവരാവകാശ പരിധിയിൽ ഉൾപ്പെടുത്തിയിരുന്നുവെന്നാണ് റിപ്പോർട്ടുകൾ. എന്നാൽ പുതിയ വിജ്ഞാപനത്തിലൂടെ സർക്കാർ ആ തീരുമാനം മാറ്റിയിരിക്കുകയാണ്. നേരത്തേ പോലീസ് ആസ്ഥാനത്തെയും ക്രൈംബ്രാഞ്ചിലെയും ‘ടി’ സെക്ഷൻ രേഖകളെയും വിവരാവകാശ നിയമത്തിന്റെ പരിധിയിൽനിന്ന് ഒഴിവാക്കിയിരുന്നു.
അഴിമതി ആരോപണങ്ങളിലും ഉന്നതതല അന്വേഷണങ്ങളിലും സുതാര്യതയും ഉത്തരവാദിത്തവും ഉറപ്പാക്കേണ്ടതിന്റെ പ്രാധാന്യം നിലനിൽക്കെ, സർക്കാരിന്റെ പുതിയ നടപടി പൊതുജനങ്ങളുടെ വിവരാവകാശത്തെ എങ്ങനെ ബാധിക്കുമെന്നത് ശ്രദ്ധേയമാണ്.