തിരുവനന്തപുരം:സംസ്ഥാനത്ത് വേനല് ചൂട് ഉയരുന്നതിനാല് മുഖ്യമന്ത്രി പിണറായി വിജയന് ഉന്നതതലയോഗം വിളിച്ചു. നിലവിലെ സ്ഥിതിഗതികള് വിലയിരുത്തുന്നതിനും ഉഷ്ണതരംഗ മുന്നറിയിപ്പുള്ള ജില്ലകളില് സ്വീകരിക്കേണ്ട അടിയന്തര മുന്കരുതലുകളും യോഗം ചര്ച്ച ചെയ്യും.
ശനിയാഴ്ച രാവിലെ 11 ന് ഓണ്ലൈനായാണ് യോഗം.ബന്ധപ്പെട്ട വകുപ്പ് മന്ത്രിമാര്, ചീഫ് സെക്രട്ടറി, ദുരന്തനിവാരണ അതോറിറ്റി ഉദ്യോഗസ്ഥര് തുടങ്ങിയവര് പങ്കെടുക്കും.ഉഷ്ണതരംഗ സാധ്യത ഉളളതിനാല് ചൂടുകൂടുതലുള്ള സമയത്ത് എല്ലാവരും വീടുകളില് കഴിയണമെന്ന് മുഖ്യമന്ത്രി നിര്ദേശിച്ചു.
സംസ്ഥാനത്ത് ചൂട് കൂടുന്ന സാഹചര്യത്തില് പകല് സമയങ്ങളില് സ്വയം നിയന്ത്രണം ഏര്പ്പെടുത്തി സെല്ഫ് ലോക്ക്ഡൗണ് പാലിക്കണമെന്ന് മുഖ്യമന്ത്രി കഴിഞ്ഞ ദിവസം ആഹ്വാനം ചെയ്തിരുന്നു. പാലക്കാട് ഉള്പ്പെടെ ജില്ലകളില് താപനില 40 ഡിഗ്രി സെല്ഷ്യസ് കടന്ന പശ്ചാത്തലത്തിലായിരുന്നു മുന്നറിയിപ്പ്.
ഉച്ചയ്ക്ക് 11 മുതല് മൂന്നു വരെയുള്ള സമയങ്ങളില് അനാവശ്യമായി പുറത്തിറങ്ങുന്നത് ഒഴിവാക്കണമെന്നും അദ്ദേഹം നിര്ദ്ദേശിച്ചു. സൂര്യാതപമേറ്റ് കഴിഞ്ഞ ദിവസം കണ്ണൂരില് ഒരാള് മരിച്ചിരുന്നു.ചിലയിടങ്ങളില് വെയിലേറ്റവര്ക്ക് സൂര്യാതപമേറ്റ സംഭവങ്ങളുമുണ്ടായി.