“നീ പോ മോനേ ദിനേശാ…” മലയാളികൾ ഒരിക്കലും മറക്കാത്ത മോഹൻലാലിന്റെ ഈ ഐതിഹാസിക ഡയലോഗ് ഇപ്പോൾ സോഷ്യൽ മീഡിയയിൽ വീണ്ടും ട്രെൻഡിങ്ങായിരിക്കുകയാണ്.

ക്രിക്കറ്റ് ഇതിഹാസം സച്ചിൻ ടെണ്ടുൽക്കറും മലയാളി താരം സഞ്ജു സാംസണും തമ്മിലുള്ള രസകരമായ സംഭാഷണത്തിലൂടെയാണ് ഈ ഡയലോഗ് വീണ്ടും ചർച്ചയായി മാറിയിരിക്കുന്നത്.

മലയാള സിനിമയിൽ മോഹൻലാൽ എന്ന നടന് മാത്രം അവകാശപ്പെട്ട ആ മാസ് ഡയലോഗ് ഇന്ന് ലോകമെമ്പാടുമുള്ള ആരാധകരുടെ നാവിലുണ്ട്.

എന്നാൽ, ഇതിന്റെ യഥാർത്ഥ അർത്ഥം തേടി സച്ചിനും സഞ്ജുവും മോഹൻലാലിന്റെ അരികിലെത്തിയതാണ് ഇപ്പോൾ കായിക-സിനിമാ ലോകത്തെ ഏറ്റവും വലിയ രസകരമായ കാഴ്ച.

സച്ചിന്റെ മറുപടിയും സഞ്ജുവിന്റെ ചോദ്യവും

ടി20 ലോകകപ്പ് വേളയിൽ സച്ചിൻ ടെണ്ടുൽക്കറുമായി നിരന്തരം ആശയവിനിമയം നടത്താറുണ്ടായിരുന്നു എന്ന് സഞ്ജു സാംസൺ വെളിപ്പെടുത്തിയിരുന്നു. ഇതിനിടയിൽ സഞ്ജുവിനോട് എന്താണ് സംസാരിച്ചതെന്ന് ഒരാൾ സച്ചിനോട് ചോദിക്കുകയുണ്ടായി.

അതിന് സച്ചിൻ നൽകിയ മറുപടി ഇതായിരുന്നു; “ഞാൻ സഞ്ജുവിനോട് പറഞ്ഞത് ‘നീ പോ മോനേ ദിനേശാ’ എന്നായിരുന്നു, ഇതിന്റെ അർത്ഥം നിങ്ങൾ സഞ്ജുവിനോട് തന്നെ ചോദിച്ചോളൂ.”

തുടർന്ന് മാധ്യമങ്ങളുടെയും ആരാധകരുടെയും ചോദ്യം സഞ്ജുവിന് മുന്നിലെത്തി. ഒട്ടും വൈകാതെ സഞ്ജു തന്റെ ഇൻസ്റ്റാഗ്രാമിലൂടെ ഇതിന് മറുപടി നൽകി.

“സച്ചിൻ സർ, ഇതിന്റെ അർത്ഥം ശരിയായി പറഞ്ഞു തരാൻ സാധിക്കുന്ന ഒരേയൊരാൾ ഞങ്ങളുടെ സ്വന്തം ലാലേട്ടനാണ്.

ചേട്ടാ, പ്ലീസ് ഒന്ന് പറഞ്ഞു കൊടുക്കൂ” എന്ന് പറഞ്ഞുകൊണ്ട് സഞ്ജു മോഹൻലാലിനെ ഈ സംവാദത്തിലേക്ക് വിളിക്കുകയായിരുന്നു.

ഒടുവിൽ ലാലേട്ടന്റെ മാസ് എൻട്രി

സഞ്ജുവിന്റെയും സച്ചിന്റെയും അഭ്യർത്ഥനയ്ക്ക് പിന്നാലെ മോഹൻലാൽ തന്നെ ഇൻസ്റ്റാഗ്രാമിൽ മറുപടിയുമായി എത്തി. ആ രസകരമായ വിശദീകരണം ഇങ്ങനെയായിരുന്നു:

“മോനെ സഞ്ജു, സച്ചിൻ ടെണ്ടുൽക്കർ ഒരു സിക്സ് അടിക്കുമ്പോൾ, അദ്ദേഹം ബൗളർമാരോട് പറയുന്നത് ‘നീ പോ മോനെ ദിനേശാ’ എന്നാണ്; പോ പോയി അടുത്ത ബോളിൽ ശ്രമിക്കൂ എന്ന്. ഇപ്പോൾ നിന്റെ ബാറ്റും പറയുന്നത് അതുതന്നെയാണ്. ഇത് തന്നെ തുടരൂ, അടുത്ത ബൗളർ നിന്നെ കാത്തിരിക്കുകയാണ്.”

ക്രിക്കറ്റ് ലോകത്തെ ദൈവം സച്ചിൻ ടെണ്ടുൽക്കറും, മലയാളി താരം സഞ്ജു സാംസണും, ഒപ്പം അഭിനയത്തിന്റെ ചക്രവർത്തി മോഹൻലാലും ഒന്നിച്ച ഈ രസകരമായ സംഭവത്തെ വലിയ ആവേശത്തോടെയാണ് സോഷ്യൽ മീഡിയ ഏറ്റെടുത്തിരിക്കുന്നത്.

അടുത്തിടെ സഞ്ജുവും മോഹൻലാലും ഒന്നിച്ച് ചെയ്ത പരസ്യചിത്രം സമൂഹമാധ്യമങ്ങളിൽ വൻ തരംഗം സൃഷ്ടിച്ചിരുന്നു. ആരാധകരുടെ പ്രിയപ്പെട്ട ‘ഒജി ഏട്ടൻമാരായ’ ഇവരുടെ ഈ പുതിയ വിശേഷം ഇപ്പോൾ ക്രിക്കറ്റ് പ്രേമികളുടെയും സിനിമാപ്രേമികളുടെയും ഇടയിൽ വൈറലായിരിക്കുകയാണ്.