റിയാദ്: സൗദി അറേബ്യയിലെ വിമാനത്താവളങ്ങളെ ലക്ഷ്യമിട്ട് ഹൂതി വിമതര്‍ നടത്തുന്ന ആക്രമണങ്ങളെ തുടര്‍ന്ന് രാജ്യത്തുടനീളമുള്ള വ്യോമഗതാഗതത്തില്‍ തടസ്സങ്ങള്‍ തുടരുന്നു. വ്യോമയാന ഡാറ്റാ ഏജന്‍സിയായ ‘സിറിയം’ യുഎഇ സമയം രാവിലെ 5.30-ന് പുറത്തുവിട്ട വിവരങ്ങള്‍ പ്രകാരം, തിങ്കളാഴ്ച ഷെഡ്യൂള്‍ ചെയ്തിരുന്ന 1,048 വിമാന സര്‍വീസുകളില്‍ 362 എണ്ണം (34.54 ശതമാനം) റദ്ദാക്കുകയോ പറക്കാന്‍ അനുമതിയില്ലാത്തവയായി അടയാളപ്പെടുത്തുകയോ ചെയ്തു.

ഏറ്റവും കൂടുതല്‍ വിമാനങ്ങള്‍ റദ്ദാക്കപ്പെട്ട ഞായറാഴ്ചയെ അപേക്ഷിച്ച് തിങ്കളാഴ്ചത്തെ കണക്കുകളില്‍ കുറവുണ്ടായിട്ടുണ്ട്. ഞായറാഴ്ച ഷെഡ്യൂള്‍ ചെയ്ത 1,096 സര്‍വീസുകളില്‍ 623 എണ്ണവും (56.84 ശതമാനം) റദ്ദാക്കിയിരുന്നു.

കഴിഞ്ഞ ആറ് ദിവസത്തിനിടെ ഷെഡ്യൂള്‍ ചെയ്ത ആകെ 6,608 സര്‍വീസുകളില്‍ 2,018 എണ്ണത്തെ ആക്രമണം ബാധിച്ചു. അതായത് മൊത്തം വിമാന സര്‍വീസുകളുടെ 30.54 ശതമാനം.

ഒക്ടോബര്‍ 8: 1,194 സര്‍വീസുകളില്‍ 385 എണ്ണം റദ്ദാക്കി (32.24%).

ഒക്ടോബര്‍ 9: 1,026 സര്‍വീസുകളില്‍ 188 എണ്ണം റദ്ദാക്കി (18.32%).

ഒക്ടോബര്‍ 10: 1,186 സര്‍വീസുകളില്‍ 442 എണ്ണം റദ്ദാക്കി (37.27%).

ഒക്ടോബര്‍ 11: കൂടുതല്‍ സര്‍വീസുകള്‍ റദ്ദാക്കപ്പെട്ട ദിനം (56.84%).

ഒക്ടോബര്‍ 12 (തിങ്കള്‍): 34.54% സര്‍വീസുകള്‍ തടസ്സപ്പെട്ടു.

റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ വീണ്ടും ആക്രമണമുണ്ടായതായും നിരവധി പേര്‍ക്ക് പരിക്കേറ്റതായും സൗദി ജനറല്‍ അതോറിറ്റി ഓഫ് സിവില്‍ ഏവിയേഷന്‍ സ്ഥിരീകരിച്ചു. കിംഗ് ഫഹദ് അന്താരാഷ്ട്ര വിമാനത്താവളത്തിന് നേരെയും ആക്രമണമുണ്ടായി.

ശനിയാഴ്ച റിയാദ് വിമാനത്താവളത്തിന് നേരെയുണ്ടായ ആക്രമണത്തില്‍ സൗദി പൗരന്മാരും വിദേശ തൊഴിലാളികളും ഉള്‍പ്പെടെ 13 പേര്‍ കൊല്ലപ്പെടുകയും 309 പേര്‍ക്ക് പരിക്കേല്‍ക്കുകയും ചെയ്തിരുന്നു. ഞായറാഴ്ചയുണ്ടായ ആക്രമണത്തില്‍ ഒരു പാക്കിസ്ഥാനിയും കൊല്ലപ്പെട്ടു.

സുരക്ഷ മുന്‍നിര്‍ത്തി യു.എ.ഇ വിമാനക്കമ്പനികളും മറ്റ് പ്രമുഖ ഏവിയേഷന്‍ കമ്പനികളും റിയാദിലേക്കുള്ള സര്‍വീസുകള്‍ നിര്‍ത്തിവെക്കുന്നത് നീട്ടിയിട്ടുണ്ട്:

ഫ്ളൈ ദുബായ് : ഒക്ടോബര്‍ 14 വരെ റിയാദിലേക്കുള്ള സര്‍വീസുകള്‍ നിര്‍ത്തിവെച്ചു.

ഇത്തിഹാദ് എയര്‍വേയ്‌സ്: ഒക്ടോബര്‍ 12 വരെ സര്‍വീസുകള്‍ റദ്ദാക്കി.

എമിറേറ്റ്സ്: ഷെഡ്യൂള്‍ ചെയ്ത 11 സര്‍വീസുകളും റദ്ദാക്കി.