പുതുച്ചേരി: രാജീവ് ഗാന്ധി ഇന്‍ഡോര്‍ സ്റ്റേഡിയത്തില്‍ നടക്കുന്ന 76-ാമത് ജൂനിയര്‍ നാഷണല്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പില്‍ കേരള വനിതകള്‍ക്ക് തകര്‍പ്പന്‍ ജയം. ഏകപക്ഷീയമായ ക്വാര്‍ട്ടര്‍ ഫൈനല്‍ പോരാട്ടത്തില്‍ ഹരിയാനയെ 72-47ന് നിഷ്പ്രഭമാക്കിയാണ് കേരളം സെമിയില്‍ കടന്നത്.ഫൈനല്‍ ഫോറിലെ ഹൈ-വോള്‍ട്ടേജ് മത്സരത്തില്‍ കേരളം നിലവിലെ ചാമ്പ്യന്മാരായ തമിഴ്നാടിനെ നേരിടും. രാജസ്ഥാനെ 64-36ന് തോല്‍പ്പിച്ചാണ് തമിഴ്നാട് സെമിയില്‍ കടന്നത്.

ഹരിയാനയ്‌ക്കെതിരെ കളിയുടെ ആദ്യ വിസില്‍ മുതല്‍ കൃത്യമായ തന്ത്രങ്ങളോടെ കളം നിറഞ്ഞ കേരളം, ആക്രമണാത്മകമായ മുന്നേറ്റങ്ങളും ശക്തമായ പ്രതിരോധവും പുറത്തെടുത്തു. പ്രീ-ക്വാര്‍ട്ടറില്‍ തകര്‍പ്പന്‍ ഫോമിലായിരുന്ന ഹരിയാനയ്‌ക്ക് കേരളത്തിന്റെ വേഗതയേറിയ നീക്കങ്ങള്‍ക്ക് മുന്നില്‍ മറുപടിയില്ലായിരുന്നു. ആര്‍ത്തിക കെ. 18 പോയിന്റുകള്‍ നേടി കേരളത്തിന്റെ ആക്രമണങ്ങള്‍ക്ക് നേതൃത്വം നല്‍കിയപ്പോള്‍, സുഭദ്ര ജയകുമാര്‍ 16 പോയിന്റുകള്‍ സ്വന്തമാക്കി. ലിയ മരിയ മികച്ച പെരിമീറ്റര്‍ പിന്തുണയുമായി 10 പോയിന്റുകള്‍ നേടി ഹരിയാനയുടെ പ്രധാന താരം കനികയെ പൂട്ടിയ കേരള പ്രതിരോധ നിരയാണ് കളിയിലെ വഴിത്തിരിവായത്. കഴിഞ്ഞ മത്സരത്തില്‍ 33 പോയിന്റുകള്‍ അടിച്ചുകൂട്ടിയ കനികയെ വെറും 13 പോയിന്റില്‍ ഒതുക്കാന്‍ കേരളത്തിനായി. ക്വാര്‍ട്ടര്‍ ഫൈനല്‍ മത്സരങ്ങള്‍ അവസാനിച്ചതോടെ വനിതാ വിഭാഗം സെമി ഫൈനല്‍ ലൈനപ്പ് പൂര്‍ത്തിയായി. ഒന്നാം സെമിയില്‍ കേരളം കരുത്തരായ തമിഴ്നാടിനെ നേരിടുമ്പോള്‍ രണ്ടാം സെമിയില്‍ ഛത്തീസ്ഗഢ് കര്‍ണാടകയുമായി ഏറ്റുമുട്ടും. ബാസ്‌കറ്റ്‌ബോള്‍ ഫെഡറേഷന്‍ ഓഫ് ഇന്ത്യയുടെ (ബിഎഫ്‌ഐ) ആഭിമുഖ്യത്തില്‍ പോണ്ടിച്ചേരി ബാസ്‌കറ്റ്‌ബോള്‍ അസോസിയേഷനാണ് ചാമ്പ്യന്‍ഷിപ്പ് സംഘടിപ്പിക്കുന്നത്.