கடந்த டிசம்பர் மாதமே தான் ராஜிநாமா செய்யப்போவதாக கட்சித் தலைமையிடம் தெரிவித்துவிட்டதாகக் கூறும் அண்ணாமலை, “எனக்கு இருந்த கருத்து வேறுபாடுகளை 18 மாதங்களாக கூறி வந்தேன். கடந்த டிசம்பர் 5-ஆம் தேதியே பாஜகவில் இருந்து விலகுகிறேன் என்று தெரிவித்துவிட்டேன். ” என்றார்.

தமிழ்நாட்டின் ஓர் அரசியல் இயக்கத்தை தொடங்க இருக்கிறோம் என அறிவித்த அவர், அடுத்த பொதுத் தேர்தலில் கட்சியாக போட்டியிட உள்ளதாக அறிவித்தார்.

தொடர்ந்து பேசிய அவர், “தமிழ்நாட்டிற்கு இன்னொரு அரசியல் கட்சி வேண்டும். இந்த இயக்கத்தில் இணைய விரும்புபவர்கள் இணையதளம் மூலமாக சேரலாம்” என்றார்.

கோவையில் “ஏபிஜே அப்துல் கலாம் பெயரில் ஒரு பயிற்சி மையம் உருவாக்க இருக்கிறோம்.” என்று தெரிவித்தார்.

பாஜக மற்றும் மோதி பற்றி குறிப்பிடும்போது, “பிரதமர் மோதி மீது மரியாதை உண்டு. மும்மொழிக் கொள்கை போல பாஜகவிடம் முரண்பட வேண்டிய சூழல் எழுந்தால் நிச்சயம் முரண்படுவோம். முறைப்படி ராஜிநாமா செய்ய வேண்டும் என்பதால் தான் அமித் ஷாவை நேரில் சந்தித்தேன்.” என்றார்.

இன்று காலை பாஜக முன்னாள் மாநிலத் தலைவர் அண்ணாமலையின் ராஜிநாமாவை ஏற்பதாக பாஜக தலைமை ஒரு செய்திக்குறிப்பின் மூலம் அறிவித்திருக்கிறது.

கட்சியின் அடிப்படை உறுப்பினர் பொறுப்பில் இருந்து அண்ணாமலை ராஜிநாமா செய்ததை பாஜக தேசிய தலைவர் நிதின் நபின் ஏற்றுக்கொண்டதாக அந்த செய்திக் குறிப்பில் தெரிவிக்கப்பட்டுள்ளது.

முன்னதாக, “சமூக வலைத்தளங்கள் மூலம் உங்கள் அனைவரையும் சந்தித்து, கருத்துகளைப் பகிர்ந்து கொள்ளவும், மனம் திறந்து உரையாடவும், ஆவலுடன் எதிர்நோக்கி இருக்கிறேன்.” என்று அண்ணாமலை தெரிவித்திருந்தார்.

அதற்கு சற்று முன்பாக அண்ணாமலையின் ராஜிநாமா ஏற்றுக்கொள்ளப்பட்டதாக அறிவிப்பு வந்தது பல யூகங்களுக்கு முற்றுப்புள்ளி வைத்தது.

முன்னதாக டெல்லி சென்றிருந்த அண்ணாமலை மத்திய உள்துறை அமைச்சர் அமித் ஷாவைச் சந்தித்துப் பேசினார்.

டெல்லி செல்வதற்கு முன்பாக புதுக் கட்சி தொடங்கப் போகிறீர்களா என்று சென்னையில் செய்தியாளர்கள் கேட்டதற்கு, “இன்னும் 2 நாட்களில் எல்லாவற்றைப் பற்றியும் பேசுகிறேன்” என்று அண்ணாமலை கூறியிருந்தார்.

2021 சட்டபேரவைத் தேர்தலுக்குப் பிறகு பாஜக மாநிலத் தலைவராக அண்ணாமலை பொறுப்பேற்றார். அவரது தலைமையின் கீழ் பாஜக அதிமுக கூட்டணியில் இருந்து விலகி 2024 நாடாளுமன்ற பொதுத் தேர்தலில் தனித்துப் போட்டியிட்டது. அப்போது ஒரு இடத்தில் கூட வெல்ல முடியவில்லை என்றாலும் அதுநாள் வரை ஒற்றை இலக்கத்தில் இருந்த பாஜகவின் வாக்கு வங்கி 11 சதவிகிதத்தை தாண்டியது.

இந்த நிலையில் 2025-ஆம் ஆண்டு பாஜக மாநிலத் தலைவர் பொறுப்பில் இருந்து அண்ணாமலை விலகினார். அதனைத் தொடர்ந்து நயினார் நாகேந்திரன் பாஜக மாநிலத் தலைவராகப் பொறுப்பேற்றார்.

2026 சட்டப்பேரவைத் தேர்தலுக்கு மீண்டும் அதிமுக உடன் கூட்டணி வைத்து பாஜக போட்டியிட்டது. அந்தத் தேர்தலில் அண்ணாமலை போட்டியிடுவார் எதிர்பார்க்கப்பட்ட நிலையில் பின்னர் பிரசாரம் மட்டும் செய்யப்போவதாக அறிவித்தார்.

ஆனால் அந்தத் தேர்தலில் ஓர் இடத்தில் மட்டுமே பாஜக வெற்றி பெற்றது. அந்தக் கட்சியின் வாங்கு வங்கி மீண்டும் 3 சதவிகிதத்திற்கு கீழ் சென்றது.

இது, பிபிசிக்காக கலெக்டிவ் நியூஸ்ரூம் வெளியீடு