“செவ்வாய்க்கிழமை (அக்டோபர் 27) நள்ளிரவில் பலத்த காற்று வீசியது. நாங்கள் அனைத்து ஜன்னல்களையும் மூடிவிட்டோம். அதன்பிறகு என்ன நடந்தது என்பது எங்களுக்குப் புரியவில்லை. காற்று பெரும் சத்தத்துடன் வீசியது; மரங்கள் முறிந்து விழுந்தன” என்று சத்யநாராயணா கூறினார்.

மரம் விழுந்ததில் அவரது வீட்டுக்கு முன்னால் இருந்த மின்கம்பத்தின் கீழ்ப்பகுதி சேதமடைந்தது. அந்த மின்கம்பம் எந்த நேரத்திலும் முறிந்து விழுந்துவிடுமோ என்ற அச்சமும் நிலவியது.

பசுமையான வாழைத் தோட்டங்களாலும் உயரமான தென்னை மரங்களாலும் பார்வையாளர்களை வரவேற்று வந்த கோனசீமா பகுதியின் நிலைமையை அர்னாப் புயல் ஒரே இரவில் மாற்றிவிட்டது.

எங்கு பார்த்தாலும் சாலைகளில் விழுந்து கிடக்கும் மரங்கள் மற்றும் அவற்றின் கிளைகள், சாலையோரங்களில் சாய்ந்து கிடக்கும் மின்கம்பங்கள், அறுந்து கிடக்கும் மின்கம்பிகள், பாதியாக முறிந்த தென்னை மரங்கள் எனப் பல்வேறு காட்சிகளைக் காண முடிகிறது.

இவை அங்கு காணப்படும் காட்சிகளில் சில மட்டுமே.

ஆந்திரப் பிரதேச அரசின் மதிப்பீட்டின்படி, கோனசீமா பகுதியில் சுமார் 33,000 தென்னை மரங்கள் வேரோடு சாய்ந்துள்ளன.

பல இடங்களில், குளங்கள் மற்றும் கால்வாய்களின் கரையோரங்களில் இருந்த மரங்கள் முறிந்து நீருக்குள் விழுந்து கிடப்பதைக் காண முடிந்தது.

ஏனாமில் இருந்து அமலாபுரம் செல்லும் வழியில், ஐ.பொலவரம் மண்டலத்தில் உள்ள கொமரிகிரியில் சாலையோரமாக ஏராளமான தென்னை மரங்கள் வேரோடு சாய்ந்துள்ளன.

அவை மின்கம்பிகள் மீது விழுந்ததால், மின்கம்பிகள் அறுந்தன அல்லது மின்கம்பங்கள் முறிந்தன.

அவற்றை அகற்றி, மின்கம்பங்களை மீண்டும் சீரமைக்கும் பணியில் மின்துறை அதிகாரிகள் ஈடுபட்டு வருகின்றனர்.

ஆந்திரப் பிரதேச அரசு, பல்வேறு துறைகளைச் சேர்ந்த சுமார் 32 பணியாளர்களையும் அதிகாரிகளையும் வெவ்வேறு மாவட்டங்களில் இருந்து கடலோரப் பகுதிக்கு அனுப்பியுள்ளது.

நெல்லூர் மாவட்ட மின்துறையின் உதவிப் பொறியாளர் (ஏஇ) மனோகரிடம் பேசினோம்.

அவர் கொமரிகிரியில் மின்கம்பங்களைச் சீரமைக்கும் பணியில் ஈடுபட்டார்.

லேசான மழை பெய்தபோதிலும், மின்கம்பங்களையும் மின்கம்பிகளையும் சீரமைக்கும் பணியில் குழுவினர் ஈடுபட்டனர். இந்தப் பணிகளை மனோகர் மேற்பார்வையிட்டார்.

“எஸ்பிடிசிஎல் நிறுவனத்திலிருந்து வெவ்வேறு மாவட்டங்களைச் சேர்ந்த 1,000 அதிகாரிகள் மற்றும் பணியாளர்கள் வரை இங்கு வந்துள்ளனர்.

புயலின் தாக்கம் ஏற்படுவதற்கு முன்பாக, 26-ம் தேதி இங்கு வந்தடைந்தோம். புயலின் தாக்கத்துக்குப் பிறகு விழுந்த மின்கம்பங்களையும் சேதமடைந்த மின்கம்பிகளையும் சீரமைக்கும் பணியில் ஈடுபட்டு வருகிறோம்” என்று அவர் கூறினார்.

பாதிக்கப்பட்ட மொத்தம் 857 கிராமங்களில் மின் விநியோகத்தைச் சீரமைக்க நடவடிக்கை எடுக்கப்பட்டுள்ளதாக, ஆந்திரப் பிரதேச அரசு புதன்கிழமை இரவு அறிவித்தது.

“1,995 பணியாளர்களுடன் 399 தனித்தனி குழுக்களை அமைத்துள்ளோம். 707 கிராமங்களில் மின் விநியோகத்தை மீட்டெடுத்துள்ளோம். ஆரம்பகட்ட மதிப்பீட்டின்படி, ரூ.1.57 கோடி இழப்பு ஏற்பட்டுள்ளது” என்று ஏபிசிபிடிசிஎல் நிறுவனத்தின் நிர்வாக இயக்குநர் பி. புல்லாரெட்டி தெரிவித்தார்.

புயலின் தாக்கத்தால் மொத்தம் 15,000 மின்கம்பங்கள் சாய்ந்துள்ளதாக ஆந்திரப் பிரதேச அரசு மதிப்பிட்டுள்ளது.

மங்கோடிகுடுரு மண்டலத்தின் பசர்லபுடி பகுதியில் மற்றொரு அதிர்ச்சியூட்டும் காட்சியைக் காண முடிந்தது.

ஒரு வீட்டின் கூரை முழுவதுமாகப் பெயர்ந்து, வேறொரு இடத்தில் போய் விழுந்திருந்தது.

அந்த வீட்டின் உரிமையாளரான வீர வெங்கட சத்யநாராயணாவை (சின்னா) நாங்கள் சந்தித்தோம்.

அவர் தனது வீட்டுக்கு அருகிலுள்ள ஒரு ஹோட்டலில் தங்கியிருக்கிறார்.

அவர் பசர்லபுடி கிராமத்தில் உள்ள தனது வீட்டுக்குச் சென்றபோது, பலத்த மழை பெய்துகொண்டிருந்தது.

செவ்வாய்க்கிழமை இரவு என்ன நடந்தது என்பதை அவர் எங்களிடம் பகிர்ந்துகொண்டார்.

“நள்ளிரவு சுமார் ஒரு மணியளவில் திடீரென பலத்த காற்று வீசியது. அப்போது வீட்டின் கூரைப் பறந்து சென்று பக்கத்தில் விழுந்தது” என்று அவர் கூறினார்.

அந்த நேரத்தில் வீட்டில் தானும், தனது மகனும், மற்றொருவரும் மட்டுமே இருந்ததாக சின்னா தெரிவித்தார்.

முன்பு அங்கு கற்களால் கட்டப்பட்ட குடிசை இருந்ததாகவும், அது சிதிலமடைந்தபோது, குச்சிகளைக் கொண்டு வீட்டைக் கட்டியதாகவும் சின்னா கூறினார்.

பலத்த காற்றால் வீட்டின் மின்சார மீட்டரும் மின் இணைப்புக் கம்பியும் சுவரிலிருந்து பெயர்ந்து விழுந்தன. வீட்டிலிருந்த ஒரு உத்திரமும் காற்றினால் சாய்ந்து விழுந்தது.

சில இடங்களில் சாலையோர விளம்பரப் பலகைகளும் உடைந்து விழுந்தன.

புயல் கரையைக் கடந்தபோது மணிக்கு 125 முதல் 135 கிலோமீட்டர் வேகத்தில் காற்று வீசியதாகவும், சில இடங்களில் மணிக்கு 150 கிலோமீட்டர் வேகத்தில் காற்று வீசியதாகப் பதிவானதாகவும் ஆந்திரப் பிரதேச மாநிலப் பேரிடர் மேலாண்மை ஆணையம் அறிவித்தது.

மரங்கள், மின்கம்பங்கள், வீடுகள், தோட்டங்கள் மற்றும் பயிர்கள் என கோனசீமா பகுதியின் அனைத்து அமைப்புகளையும் இந்தப் புயலின் தாக்கம் பாதித்தது.

பசர்லபுடி பகுதியில் உள்ள பல கடைகளின் கூரைகளும் காற்றில் பறந்தன.

ஆந்திரப் பிரதேசத்தில் புயலால் பாதிக்கப்பட்ட பகுதிகளைச் சேர்ந்த மக்களுக்கு நிதியுதவி வழங்கப்படும் என்று அரசு அறிவித்துள்ளது.

இறந்தவர்களின் குடும்பங்களுக்கு ரூ.5 லட்சம் நிதியுதவி வழங்கப்படும் என்று ஆந்திரப் பிரதேச முதலமைச்சர் நாரா சந்திரபாபு நாயுடு அறிவித்துள்ளார்.

“நிவாரண முகாம்களில் தங்கியிருப்பவர்களுக்கு ரூ.1,000, பகுதியளவில் சேதமடைந்த வீடுகளுக்கு ரூ.10,000, கடைகளுக்கு ரூ.25,000, இருசக்கர வாகனங்களுக்கு ரூ.3,000, மூன்று சக்கர வாகனங்களுக்கு ரூ.10,000, தள்ளுவண்டிகளுக்கு ரூ.20,000, நெசவாளர் சமூகத்தினருக்கு ரூ.25,000, மீன்பிடிப் படகுகள் மற்றும் வலைகள் சேதமடைந்தால் ரூ.25,000, பருத்திப் பயிர் சேதமடைந்தால் ஹெக்டேருக்கு ரூ.25,000, கரும்புப் பயிருக்கு ஹெக்டேருக்கு ரூ.25,000 என நிதியுதவி வழங்கப்படும். வாழை தோட்டத்துக்கு ஹெக்டேருக்கு ரூ.35,000, தக்காளிக்கு ஹெக்டேருக்கு ரூ.25,000 என, மற்ற பயிர்களுக்கும் அவற்றுக்குரிய பிரிவுகளின்படி நிதியுதவி வழங்கப்படும்” என்று ஆந்திரப் பிரதேச அரசு அறிவித்துள்ளது.

புயல் காரணமாகக் கடலோரப் பகுதிகளில் இருந்து சுமார் 28,000 பேர் நிவாரண முகாம்களுக்கு மாற்றப்பட்டுள்ளதாக ஆந்திரப் பிரதேச அரசு தெரிவித்துள்ளது.

அவ்வாறு நிவாரண முகாமில் தங்கியிருக்கும் பெண்களில் ஒருவர் செக்கா சின்னி. அவர் ஏழு மாதக் கர்ப்பிணியாக உள்ளார்.

கோனசீமா மாவட்டம், காட்ரேனிகோவா மண்டலத்தில் உள்ள மகசானி திப்பா கிராமத்தைச் சேர்ந்த செக்கா சதீஷ் மற்றும் அவரது மனைவி சின்னி ஆகியோருக்கு இரண்டு குழந்தைகள் உள்ளனர். தற்போது சின்னி மூன்றாவது முறையாகக் கர்ப்பமாக இருக்கிறார்.

செவ்வாய்க்கிழமை அதிகாரிகள் அவர்களை நிவாரண மையத்துக்கு மாற்றினர். கடல் நீர் சூழ்ந்ததால், மகசானி திப்பா கிராமத்தை அடைய முடியாத நிலை ஏற்பட்டுள்ளது. பாலுசுத்திப்பா கிராமத்தில் தஞ்சமடைந்துள்ள சின்னி பிபிசியிடம் பேசினார்.

“எங்கள் கிராமம் நீரில் மூழ்கிவிட்டதாகக் கூறினார்கள். அங்கு செல்வது சாத்தியமற்றதாக இருந்தது. பாலுசுத்திப்பா கிராமத்தில் நிவாரண முகாம் அமைக்கப்பட்டது.”

“நான் ஏழு மாதக் கர்ப்பிணியாக இருப்பதாலும், என்னால் தூங்க முடியாததாலும், பாலுசுத்திப்பாவில் உள்ள எனது உறவினர் வீட்டில் தஞ்சமடைந்துள்ளேன்” என்று அவர் கூறினார்.

“காற்றின் ஆக்ரோஷமான சத்தம் என்னை மிகவும் பயமுறுத்தியது. 1996-ம் ஆண்டு ஒரு புயல் ஏற்பட்டது. அப்போது நான் பிறக்கவே இல்லை. நான் பிறந்ததிலிருந்து இப்போதுதான் மிகப்பெரிய புயலைப் பார்க்கிறேன்.”

“எனது முதல் குழந்தையைக் கருவில் சுமந்திருந்தபோதும் ஒரு புயல் ஏற்பட்டது. இப்போது மூன்றாவது குழந்தையைக் கருவில் சுமந்திருக்கும் போதும் மீண்டும் ஒரு புயல் ஏற்பட்டுள்ளது” என்று சின்னி கூறினார்.

மகசானி திப்பா கிராமத்துக்குச் செல்ல சாலை அல்லது பாலம் வசதி இல்லை என்று சின்னி தெரிவித்தார். கோதாவரி ஆற்றில் வெள்ளப்பெருக்கு ஏற்பட்டுள்ளதால், படகு மூலம் பாலுசுத்திப்பா கிராமத்தைச் சென்றடைந்ததாகவும் அவர் கூறினார்.

பிபிசி குழுவினர் பாலுசுத்திப்பா கிராமத்தில் அமைக்கப்பட்டுள்ள நிவாரண முகாமுக்குச் சென்றனர்.

அங்கு சுமார் நூறு பேர் தங்கவைக்கப்பட்டுள்ளனர்.

“செவ்வாய்க்கிழமை பிற்பகலில் நாங்கள் நிவாரண முகாமுக்கு வரவில்லை. மகசானி திப்பா கிராமத்திலேயே தங்கியிருந்தோம். இரவில் எங்கள் கிராமம் முழுவதும் கடல் நீரில் மூழ்கியது. இரவில் தண்ணீர்த் தொட்டியின் மீது ஏறி எங்களது உயிரைக் காப்பாற்றிக்கொண்டோம். பின்னர் அதிகாலையில் தெல்லாரகாவுக்குச் சென்று, நிவாரண மையத்தில் தஞ்சமடைந்தோம்” என்று அங்கு தங்கியிருக்கும் சத்திபாபு கூறினார்.

நிவாரண முகாமில் உணவுப் பற்றாக்குறை ஏற்படாமல் இருப்பதை உறுதிசெய்து வருவதாக அதிகாரிகள் தெரிவித்தனர்.

இதற்கிடையில், வெள்ளத்தால் பாதிக்கப்பட்ட பகுதிகளில் வீடுகளுக்குள் தண்ணீர் புகுந்திருந்தால், பாதிக்கப்பட்ட ஒவ்வொரு குடும்பத்துக்கும் 25 கிலோ அரிசி வழங்க ஆந்திரப் பிரதேச அரசு முடிவு செய்துள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு