7

ஆசிய கிரிக்கெட் பேரவையினால் துபாய் சர்வதேச கிரிக்கெட் விளையாட்டரங்கில் நடத்தப்பட்டு வரும் மகளிர் ரி20 ஆசிய கிண்ண இறுதிப் போட்டியில் நடப்பு சம்பியன் இலங்கையும் முன்னாள் சம்பியன் இந்தியாவும் இன்று ஞாயிற்றுக்கிழமை இரவு மோதவுள்ளன.

மகளிர் ரி20 ஆசிய கிண்ண இறுதிப் போட்டியில் மூன்றாவது தொடர்ச்சியான தடவையாக இலங்கையும் ஆறாவது தொடர்ச்சியான தடவையாக இந்தியாவும் விளையாடவுள்ளன.

பங்களாதேஷில் 2022இல் நடைபெற்ற இறுதிப் போட்டியில் இலங்கையை 8 விக்கெட்களால் இந்தியாவும் தம்புள்ளையில் 2024இல் நடைபெற்ற இறுதிப் போட்டியில் இந்தியாவை 8 விக்கெட்களால் இலங்கையும் வெற்றிபெற்று சம்பியனாகி இருந்தன.

இந்த வருடம் இரண்டு அணிகளும் தோல்வி அடையாத அணிகளாக இறுதிப் போட்டியில் விளையாடுகின்றன.

பி குழுவில் இடம்பெற்ற இலங்கை லீக் சுற்றில் ஐக்கிய அரபு இராச்சித்தை 9 விக்கெட்களாலும் இந்தோனேசியாவை 75 ஓட்டங்களாலும் பங்களாதேஷை 4 விக்கெட்களாலும் வெற்றிகொண்டு அரை இறுதிக்கு முன்னேறியது.

அரை இறுதியில் பாகிஸ்தானை 4 விக்கெட்களால் இலங்கை வெற்றிகொண்டதன் மூலம் இன்றைய இறுதிப் போட்டியில் விளையாட தகுதிபெற்றது.

ஏ குழுவுக்கான லீக் சுற்றில் தாய்லாந்தை 94 ஓட்டங்களாலும் ஹொங்கொங்கை 137 ஓட்டங்களாலும் பாகிஸ்தானை 7 விக்கெட்களாலும் வெற்றிகொண்ட இந்தியா, அரை இறுதியில் பங்களாதேஷை 40 ஓட்டங்களால் வெற்றிகொண்டு இறுதிப் போட்டிக்கு முன்னேறியது.

இரண்டு அணிகளுக்கும் இடையில் இதுவரை நடந்து முடிந்துள்ள 31 மகளிர் சர்வதேச ரி20 கிரிக்கெட் போட்டிகளில் இந்தியா 25 – 5 ஆட்டங்கள் வித்தியாசத்தில் முன்னிலையில் இருக்கிறது. ஒரு போட்டியில் முடிவு கிட்டவில்லை.

எவ்வாறாயினும், இன்றைய இறுதிப் போட்டியில் எந்த அணி சகலதுறைகளிலும் முழுமையான திறமையை வெளிப்படுத்துகின்றதோ அந்த அணியே சம்பியனாகும்.

அணிகள்

இலங்கை: சமரி அத்தபத்து (தலைவி), இமேஷா துலானி அல்லது விஷ்மி குணரட்ன அல்லது சஞ்சனா காவிந்தி, ஹசினி பெரேரா, ஹர்ஷித்தா சமரவிக்ரம, கவிஷா டில்ஹாரி, நிலக்ஷிகா சில்வா, கௌஷினி நுதியங்கனா, சுகந்திகா குமாரி, சமோதி ப்ரபோதா, மிதாலி அயோத்யா.

இந்தியா: ஸ்ம்ரித்தி மந்தனா, ஷபாலி வர்மா, ப்ராத்திகா ராவல், ஹாமன்ப்ரீத் கோர் (தலைவி), ரிச்சா கோஷ், தீப்தி ஷர்மா, பார்த்தி ஃபுல்மாலி, ப்ரேமா ராவத், ஸ்ரீ சரணி, க்ரான்தி கௌத், நந்தனி ஷர்மா.