பட மூலாதாரம், Getty Images
-
- எழுதியவர், அசாதே மோஷிரி
- பதவி, தெற்காசியச் செய்தியாளர்
-
பிரசுரிக்கப்பட்டது
-
வாசிக்கும் நேரம்: 4 நிமிடங்கள்
ஜூலை மாதம் டெல்லியின் ஜந்தர் மந்தரில் நடைபெற்ற போராட்டத்தின் போது, இளைஞர்களின் போராட்டம் காரணமாக மத்திய கல்வி அமைச்சர் தர்மேந்திர பிரதான் பதவி விலகியதாகச் செய்தி வெளியானதும் போராட்டக் களத்தில் உற்சாகக் குரல்கள் எழுந்தன.
போராட்டத்தில் ஈடுபட்ட ஒருவர் மகிழ்ச்சியுடன் என்னிடம் திரும்பி, “இது இளைஞர்களின் வெற்றி” என்றார்.
மூன்று மாதங்களுக்கும் சற்றே அதிகமான காலத்துக்குப் பிறகு, தற்போது நிலைமை முற்றிலும் மாறியுள்ளது. மாணவப் போராட்டக்காரர்களால் இப்போது ஒன்று கூடுவதற்குக்கூட சிரமமாக உள்ளது.
கடந்த மாதம், வாக்குரிமை தொடர்பாக காக்ரோச் ஜனதா கட்சி நடத்திய போராட்டங்களுக்கு கடுமையான கட்டுப்பாடுகள் விதிக்கப்பட்டன. மேலும், ஆயிரக்கணக்கான அமைதியான போராட்டக்காரர்கள் கைது செய்யப்பட்டனர்.
இந்தியாவில் கடந்த கோடைக்காலத்தில் புதியதொரு எதிர்ப்பலை உருவானது. இளைஞர்களிடையே நிலவிய ஆழமான அதிருப்தியும், இணையத்தில் பரவிய நையாண்டிகளும் இந்தப் போராட்டங்களுக்குத் தூண்டுதலாக அமைந்தன.
இந்த இயக்கம் நாடு முழுவதும் பரவியது. வலிமையான தலைவர் என்ற பிம்பத்தைக் கொண்ட, வெளிப்படையான விமர்சனங்களையும் கேலிகளையும் அதிகம் எதிர்கொள்ளாத பிரதமர் நரேந்திர மோதியால் இந்தப் போராட்டங்களைக் கட்டுப்படுத்த முடியாமல் போனது.
ஆனால், எதிர்ப்புகளை ஒடுக்குவதற்குப் பொது அமைதியைக் காரணம் காட்டி, அரசு எடுத்த வலுவான பாதுகாப்பு நடவடிக்கைகள், போராட்டக்காரர்களுக்குக் கடந்த காலத்தில் அளிக்கப்பட்ட அரிதான விட்டுக் கொடுப்பிலிருந்து அரசு பாடங்களைக் கற்றுக்கொண்டுள்ளது என்பதையே உணர்த்துகின்றன.
ஆளும் பாரதிய ஜனதா கட்சியின் தேசிய செய்தித் தொடர்பாளர் சையத் ஜாபர் இஸ்லாம், அடக்குமுறை நடவடிக்கைகள் மேற்கொள்ளப்படுவதாக முன்வைக்கப்படும் குற்றச்சாட்டுகளை மறுத்தார்.
இதுகுறித்து பிபிசியிடம் அவர் கூறுகையில், “போராட்டம் நடத்துவதற்கான உரிமையும் கருத்துச் சுதந்திரமும் அரசியலமைப்பால் உறுதி செய்யப்பட்டுள்ளன. ஆனால், அவை சட்ட வரம்புக்குள் இருக்க வேண்டும். பொதுப் பாதுகாப்பைப் பாதிக்கும் வகையிலோ, மற்றவர்களின் உரிமைகளைப் பறிக்கும் வகையிலோ அவை இருக்க முடியாது” என்றார்.
மோதி அரசு பெரிய அளவிலான போராட்டங்களை எதிர்கொள்வது இது முதல்முறையல்ல.
ஆனால், இந்தப் போராட்டங்கள் பரவலாக நடைபெற்றிருப்பது பாஜகவுக்குச் சவாலாக அமைந்துள்ளதாக கொள்கை ஆராய்ச்சி மையத்தின் முன்னாள் தலைவரும் பிரவுன் பல்கலைக்கழகத்தின் வருகைதரு பேராசிரியருமான யாமினி ஐயர் தெரிவித்துள்ளார்.
பட மூலாதாரம், AFP via Getty Images
“இந்தப் போராட்டத்தில் பங்கேற்பவர்களை சாதி, பாலினம் அல்லது பொருளாதார வர்க்கத்தின் அடிப்படையில் வரையறுக்க முடியாது. பாஜகவின் ஆதரவாளர்களில் ஒரு முக்கியப் பிரிவினரான, பொருளாதார ரீதியாக முன்னேற விரும்பும் குறைந்த வருமானம் கொண்ட மக்கள்கூட இந்த இயக்கத்தால் ஈர்க்கப்பட்டனர்” என்கிறார் யாமினி
இளைஞர்களின் போராட்டங்கள் பெரிய அளவில் கவனத்தைப் பெறுவதற்கு, சமூக ஊடகங்களில் அவற்றுக்கு இருக்கும் ஆதரவும் ஒரு காரணமாக உள்ளது.
நீண்டகால அரசியல் மரபாகக் கருதப்பட்ட ஒன்றை இந்தப் போராட்டக்காரர்கள் உடைத்துள்ளனர். பிரதமரையே வெளிப்படையாகக் கேலி செய்து சமூக ஊடகங்களில் பதிவிட்டனர்.
“இது வெறும் சிரிப்புக்காகச் செய்யப்படுவது மட்டுமல்ல” என்கிறார் டெல்லி பல்கலைக்கழகத்தின் இடதுசாரி மாணவர் அமைப்புகளில் ஒன்றுடன் தொடர்புடைய மாணவர் போராட்டக்காரரான சாகி.
முந்தைய போராட்ட இயக்கங்கள் மோதிக்குக் கடுமையான சவால்களை ஏற்படுத்தின. ஆனால், அவை சமூகத்தின் குறிப்பிட்ட சில பிரிவினரை மட்டுமே பிரதிநிதித்துவப்படுத்துவதாகக் கூறியோ, அவற்றை ‘தேச விரோதப் போராட்டங்கள்’ என்று முத்திரை குத்தியோ எளிதில் புறக்கணிக்க முடிந்தது என்கிறார் யாமினி ஐயர்.
2020-ஆம் ஆண்டு, சர்ச்சைக்குரிய வேளாண் சீர்திருத்தங்களுக்கு எதிராக விவசாயிகள் போராட்டத்தில் ஈடுபட்டனர். அவர்கள் டெல்லிக்குள் நுழையத் தடுக்கப்பட்டதால், தலைநகரின் எல்லைப் பகுதிகளில் பல மாதங்களாகப் போராட்டங்கள் நடந்தன. சில நேரங்களில் மோதல்களும் ஏற்பட்டன. ஓராண்டு காலப் போராட்டத்துக்குப் பிறகு, அந்தச் சீர்திருத்தங்களை அரசு கைவிட்டது.
2019 மற்றும் 2020-ஆம் ஆண்டுகளில் சர்ச்சைக்குரிய குடியுரிமைச் சட்டத்துக்கு எதிராக நடைபெற்ற போராட்டங்கள், ஒருவரை தேசியப் பாதுகாப்புக்கு அச்சுறுத்தலானவராகக் கருதினால் நீதித்துறை அதிகாரங்கள் எவ்வாறு பயன்படுத்தப்படலாம் என்பதைத் தெளிவாக நினைவூட்டுகின்றன.
டெல்லியில் 53 பேர் உயிரிழந்த வன்முறை மோதல்களுக்குப் பிறகு, மாணவர் செயற்பாட்டாளர் உமர் காலித் பயங்கரவாத எதிர்ப்புச் சட்டங்களின்கீழ் கைது செய்யப்பட்டார். உயிரிழந்தவர்களில் பெரும்பாலானோர் இஸ்லாமியர்கள்.
இந்த வன்முறையின் “முக்கியச் சதிகாரர்” என்று அவர் குற்றம் சாட்டப்பட்டார். விசாரணை தொடங்கப்படாமலேயே அவர் தற்போது ஆறு ஆண்டுகளுக்கும் மேலாகச் சிறையில் உள்ளார்.
“எங்களுக்கு எந்த வருத்தமும் இல்லை. ஆனால், அந்தச் சூழல் தொடர்ந்து நீடிக்கும் ஒருவித அச்சத்தை ஏற்படுத்திவிட்டது” என்று உமர் காலித்தின் துணைவி பானோஜ்யோத்ஸ்னா லஹிரி பிபிசியிடம் தெரிவித்தார்.
பட மூலாதாரம், Hindustan Times via Getty Images
“முடிவு எப்போது வரும் என்பது எங்களுக்குத் தெரியாததால், வெறுமையான இருண்ட பாதையையே பார்த்துக்கொண்டிருக்கிறோம்” என்று லஹிரி கூறினார்.
காலித்தின் சமீபத்திய மேல்முறையீடு இந்த மாதம் தாக்கல் செய்யப்பட்டது.
இன்றும் போராட்டங்களை ‘செல்லாதவையாக’ மாற்றுவதற்கு எதிர்ப்பாளர்கள் வழக்கமான உத்திகளையே பயன்படுத்துவதாக யாமினி கருதுகிறார். ஆனால், அந்த உத்திகள் முன்பைப் போல வலுவாக மக்களிடம் எடுபடவில்லை என்கிறார் அவர்.
இருப்பினும், இந்தக் கோடைக்காலத்தில் இருந்த வேகத்தை மீண்டும் பெறுவதற்கு இளைஞர் போராட்டங்கள் தடுமாறி வருகின்றன.
கரப்பான் பூச்சி மக்கள் கட்சியின் செய்தித் தொடர்பாளர் சௌரவ் தாஸ் உள்ளிட்ட தலைவர்கள் மீண்டும் மீண்டும் தடுப்புக் காவலுக்கும் சட்ட நடவடிக்கைகளுக்கும் உள்ளாகியுள்ளனர். ஜந்தர் மந்தரில் அத்துமீறி நுழைந்ததாகக் குற்றம்சாட்டப்பட்டதைத் தொடர்ந்து, தாஸும் மற்றொரு தலைவர் அசுதோஷ் ரங்காவும் டெல்லி திகார் சிறையில் ஒரு வாரம் அடைக்கப்பட்டிருந்தனர்.
கோடைக்காலத்தில் தங்களுக்கு வெற்றியைத் தேடித்தந்த அந்தப் போராட்டக் களம், அதன் பின்னர் அங்கீகரிக்கப்பட்ட போராட்ட இடங்களின் பட்டியலில் இருந்து நீக்கப்பட்டது. இந்த முடிவை எதிர்த்து நீதிமன்றத்தில் வழக்கு தொடரப்பட்டுள்ளது.
இடதுசாரி அமைப்பான அகில இந்திய மாணவர் சங்கம் உள்ளிட்ட பிற அமைப்புகளைச் சேர்ந்த போராட்டக்காரர்களும், உத்தரவுகளை மீறியதாகக் கூறி காவல்துறையின் நடவடிக்கைகளை எதிர்கொண்டுள்ளனர்.
“ஏதோ ஒருவகையான ஒடுக்குமுறை நடவடிக்கை எடுக்கப்படும் என்று நாங்கள் எதிர்பார்த்தோம்” என்றார் சௌரவ் தாஸ். கோடைக்காலப் போராட்டங்களுக்குப் பிறகு “அரசு நிறைய கற்றுக்கொண்டுள்ளது” என்றும் அவர் கூறினார்.
வழக்கு விசாரணை நடவடிக்கைகளே மக்களிடம் அச்சத்தை ஏற்படுத்தக்கூடும் என்று சட்ட நிபுணர்கள் எச்சரிக்கின்றனர்.
“பல வழக்குகளில் குற்றம்சாட்டப்பட்டவர்கள் விடுவிக்கப்படலாம். ஆனால், அதற்கு பல ஆண்டுகள் ஆகலாம். வழக்கு விசாரணை நடைமுறையே தண்டனையாக மாறுகிறது. இது மற்றவர்களையும் போராட்டங்களில் ஈடுபடத் தயங்கச் செய்யும்” என்கிறார் லாயிட் சட்டக் கல்லூரியின் உதவிப் பேராசிரியர் அலி கான்.
போராட்டங்கள் மீதான கட்டுப்பாடுகள் அளவுக்கு அதிகமாகிவிட்டதாக, காக்ரோச் ஜனதா கட்சிக்கு ஆலோசனை வழங்கி வரும் அரசியலமைப்புச் சட்ட வழக்கறிஞர் பிருந்தா குரோவர் தெரிவித்துள்ளார்.
பட மூலாதாரம், Hindustan Times via Getty Image
“போராட்டங்களை ஏற்பாடு செய்பவர்கள், இவை வன்முறையற்ற போராட்டங்கள் என்பதைத் தொடர்ந்து வலியுறுத்தி வருகின்றனர். ஆனால், சட்டம் ஒழுங்கைப் பாதுகாப்பது என்ற பெயரில் மக்களின் உரிமைகள் படிப்படியாகப் பறிக்கப்படுகின்றன” என்று விரிந்தா குரோவர் வாதிடுகிறார்.
அமைதியான முறையில் தெரிவிக்கப்படும் எதிர்ப்புகளையும் அரசு ஒடுக்குவதாகக் கூறப்படுவதை பாஜக மறுத்துள்ளது.
பிபிசியிடம் பேசிய சையத் ஜாஃபர் இஸ்லாம், “ஒரு சிலர் போராட்டம் நடத்த விரும்புகிறார்கள் என்பதற்காக, மற்ற குடிமக்களின் உரிமைகளைப் பாதிக்கவோ, வன்முறைக்குப் பொறுப்பேற்கவோ முடியாது” என்றார்.
இணையத்தில் எதிர்ப்புக் குரல் எழுப்புவதற்குக்கூட ஆபத்துகள் உள்ளன. சாகியின் சமூக ஊடகப் பதிவுகள் அதிகம் பகிரப்பட்டதைத் தொடர்ந்து, அவரைக் குறிவைத்து அவதூறுகளும் நடத்தப்பட்டுள்ளன. அவருக்கு எதிராக வன்முறை மற்றும் பாலியல் வன்கொடுமை மிரட்டல்கள் விடுக்கப்பட்ட பதிவுகளை பிபிசி பார்த்துள்ளது.
சில நேரங்களில், இந்தத் தாக்குதல்கள் சாகியைப் போராட்டங்களில் பங்கேற்பதிலிருந்து தடுக்கின்றன. அவர் அணியும் உடைகளைக்கூட மாற்றிக்கொள்ளச் செய்கின்றன.
தனது சில பதிவுகள் பல மில்லியன் பார்வைகளைப் பெற்ற பிறகு நீக்கப்பட்டதாகவும் அவர் கூறுகிறார்.
இந்தியாவின் தகவல் தொழில்நுட்பச் சட்டங்களின்படி, தேசியப் பாதுகாப்பைக் காரணம் காட்டி இணையதளங்களில் உள்ளடக்கங்களை முடக்குமாறு அரசால் உத்தரவிட முடியும். இந்தியாவில் சில கணக்குகள் முடக்கப்பட்டுள்ளதாக எக்ஸ், இன்ஸ்டாகிராம் தளங்களில் வெளியான அறிவிப்புகள் காட்டுகின்றன.
1975-ஆம் ஆண்டு அப்போதைய பிரதமர் இந்திரா காந்தி, குடிமக்களின் அடிப்படை உரிமைகளை நிறுத்திவைத்து அரசியல் எதிரிகளைச் சிறையில் அடைத்த அவசரநிலைக் காலத்துடன் தற்போதைய ஒடுக்குமுறையை காக்ரோச் ஜனதா கட்சி தலைவர்கள் ஒப்பிட்டுள்ளனர்.
இருப்பினும், எதிர்ப்புக் குரல்கள் முற்றிலுமாக ஒடுக்கப்படவில்லை.
எதிர்க்கட்சிகள் ஓரளவுக்கு அந்த இடைவெளியை நிரப்பியுள்ளன. காங்கிரஸ் தலைமையிலான எதிர்க்கட்சிகளின் ‘இந்தியா’ கூட்டணி ஏற்பாடு செய்த பொதுக்கூட்டத்துக்கு அரசு அனுமதி அளித்திருந்தது. நவம்பர் 1-ஆம் தேதி டெல்லியில் நடைபெற்ற அந்தக் கூட்டத்தில் பல்லாயிரக்கணக்கானோர் பங்கேற்றனர்.
இதற்கிடையே, தங்களது அமைப்பைவிட இந்த இயக்கம் பெரியது என்று காக்ரோச் ஜனதா கட்சி தலைவர்கள் தொடர்ந்து வலியுறுத்தி வருகின்றனர்.
அக்டோபர் 21-ஆம் தேதி டெல்லி திகார் சிறையிலிருந்து வெளியே வந்தபோது சௌரவ் தாஸ் புன்னகையுடன் காணப்பட்டார். அந்தப் புகைப்படங்கள் வெளியாகின.
“பொறுத்திருந்து பாருங்கள் என்றுதான் நான் கூறுவேன். காலம் எங்கள் பக்கம் இருக்கிறது. நாங்கள் இளம் தலைமுறையினர்” என்று அவர் எங்களிடம் தெரிவித்தார்.
– இது, பிபிசிக்காக கலெக்டிவ் நியூஸ்ரூம் வெளியீடு