அக்னி நட்சத்திரம் படத்தில் அண்ணன், தம்பி பிரச்னையை கூட தனது இசையால் வேறுபடுத்தி காண்பித்து இருப்பார் இளையராஜா. நாயகன் படத்தில் போலீஸ் கமிஷனர் கமல் வீட்டுக்கு வந்து பேசும்போது ஓர் இசை வரும். இது தென்பாண்டி சீமையிலே இன்னொரு வெர்சன் வரும். அதெல்லாம் இளையராஜாவால் மட்டுமே முடியும். இந்தியாவை தாண்டியும், உலக அளவில் தளபதி பாடல், பின்னணி இசை கொண்டாடப்பட்டது” என்கிறார் கேபிள் சங்கர்

இளையராஜாவை அன்னக்கிளி படத்தின் மூலம் அறிமுகப்படுத்திய தயாரிப்பாளர், கதாசிரியர் பஞ்சு அருணாசலத்தின் மகனும் தயாரிப்பாளர், நடிகருமான சுப்புபஞ்சு, ”நான் சின்ன வயதில் அதிகம் பார்த்த படம் அக்னி நட்சத்திரம், பகல்நிலவு, தளபதி. இளையராஜா மாமாவின் பெரும்பாலான படங்களை ரிலீசுக்கு முன்பே பார்த்துவிடுவேன். சிறப்பு காட்சிக்கு அழைப்பு வரும்போது நான் பிரிவியூ தியேட்டரில் தவறாமல் ஆஜராகிவிடுனே். அந்த வகையில் மணிரத்னம், இளையராஜா கூட்டணியில் வந்த பாடல்களில் தளபதி படத்தில் வரும் காட்டுகுயிலே மனசுக்குள்ள, நாயகன் படத்தில் வரும் அந்திமழை மேகம், மெளனராகத்தில் வரும் மன்றம் வந்த தென்றலுக்கு, அஞ்சலி படத்தில் வரும் அஞ்சலி அஞ்சலி, அக்னிநட்சத்திரத்தில் நின்னுக்கோரி வர்ணம் எனக்கு விருப்பமான பாடல்கள். இந்த கூட்டணி வெஸ்டன், போக், மெலோடி என எல்லா ஜானரிலும் கலக்கியிருக்கிறார்கள்.” என்கிறார்

மணிரத்னம் படங்களில் இணை இயக்குனராக பணியாற்றியவரும், பாடலாசிரியருமான சிவா அனந்த், ” தென்பாண்டி சீமையிலே(நாயகன்), அடி ராக்கம்மா கையை தட்டு(தளபதி), தூங்காத விழிகள் இரண்டு (அக்னி நட்சத்திரம்), பூமாலையே தோள் சேரவா (பகல்நிலவு), சின்ன சின்ன வண்ணக்குயில்(மெளனராகம்) பாடல்களை பிடிக்கும்” என்கிறார்

இளையராஜா இசைக்குழுவில் பாடுபவரும், பாடகியுமான அனிதா, ” சின்னதாய் அவள்(தளபதி), இரவு நிலவு உலகை ரசிக்க நினைத்தது (அஞ்சலி), ஒரு பூங்காவனம்(அக்னிநட்சத்திரம்), பனிவிழும் நிலவு(மெளனராகம்), தென்பாண்டி சீமையிலே (நாயகன்) பாடல்கள் பிடிக்கும். இந்த பாடல்களில் ஒரு பூங்காவனம் பாடலை நான் இளையராஜா சார் கச்சேரிகளில் பாடியிருக்கிறேன், அது மறக்கமுடியாத தருணம்” என்கிறார்

”இளையராஜா இசையமைத்த ஆயிரமாவது படமான தாரை தப்பட்டையில் வதன வதன என்ற பாடலை நான் எழுதியிருக்கிறேன். அதை நான் பெருமையாக கருதுகிறேன். இளையராஜா, மணிரத்னம் கூட்டணியில் உருவான படங்கள், பாடல்கள், அந்த பாடல்களை கவிஞர் வாலி உள்ளிட்டோர் எழுதியது தமிழ் சினிமாவின் முக்கியமான பதிவுகள். இந்த கூட்டணியின் வெற்றிக்கு முக்கியமான காரணமாக நான் பார்ப்பது ஒருவர் மீது ஒருவர் வைத்திருக்கிற நம்பிக்கை, நட்பு. குறிப்பாக, காட்டுகுயிலே மனசுக்குள்ளே பாடல் ரொம்ப பிடிக்கும். அந்த பாடலுக்கு மிக அருமையான விஷூவல் எடுத்து இருப்பார் மணிரத்னம்.

‘என் நண்பன் போட்ட சோறு

நிதமும் தின்னேன் பாரு

நட்பைக் கூட கற்பைப்போல

எண்ணுவேன்’ என்ற வரி படத்தின் கருவை சொல்லும். ரஜினி சார் கேரக்டரை இந்த வரிகளை அழகாக சொல்லியிருப்பார் கவிஞர் வாலி. அதை வெகுவாக ரசித்து இருக்கிறேன். ஒரு நிகழ்ச்சியில் சுகாசினியுடன் பணியாற்றியபோது இந்த பாடல் பின்னணி குறித்து ஒரு சுவாரஸ்ய தகவலை சொன்னார். இந்த பாடலை கேட்டு மிகவும் மகிழ்ந்து போன மணிரத்னம், பாடலை ரசித்துக்கொண்டே காரை எடுக்கும்போது பின்னால் இடித்து விபத்தை ஏற்படுத்திவிட்டாராம். மணிரத்னம் மாதிரியான அமைதியான மனிதரையே விபத்து ஏற்படுத்திய பாடல் இது.” என்கிறார் பாடலாசிரியர் மோகன்ராஜன்

”அஞ்சலி படத்தில் இரவு நிலவு பாடல், அந்த சிச்சுவேஷன் பிடிக்கும். நாயகன் படத்தில் வரும் நிலா அது வானத்து மேல பாடலை நாம் கமர்ஷியல் பாடலாக கொண்டாடினோம். சமீபத்தில் அது ஒரு தாலாட்டு பாடல் என்ற உண்மை வந்தது. நானும் வியந்தேன். நாயகன் படத்திற்கு உயிராக வரும் தென்பாண்டி சீமையிலே பாடலுக்கு மாற்றாக, இந்த பாடலை, ட்யூனை வைத்து இருக்கிறார்கள். தென்பாண்டி சீமையிலே செட்டாகி விட்டால், அந்த தாலாட்டை இந்த பாடலை இப்படி மாற்றி இருக்கிறார்.

பொதுவாக இளையராஜாவிடம் எந்த இயக்குனரும் பிரஷர் கொடுத்து, உரிமையுடன் கேட்டு வாங்கவது கஷ்டம். ஆனால், மணிரத்னம் சார் அந்த இடத்தை, பாடலை மிஸ் பண்ண மனசு இல்லாமல், நிலா அது வானத்து பாடலை கொண்டு வந்து இருக்கிறார்.

சினிமாவை சுத்தி நிறைய பேர் இருப்பார்கள். சினிமா சிலரை சுத்தி இருக்கும். அதில் ரஜினி, கமல் போன்றவர்கள் வரிசையில் இளையராஜா, மணிரத்னத்திற்கு தனி இடம் உண்டு. இப்போதும் கார்த்திக் சுப்பராஜ், மாரிசெல்வராஜ், தியாகராஜன் குமாரராஜா படங்களுக்கு இளையராஜா இசையமைத்து கொண்டிருக்கிறார். இன்றைக்கும் மணிரத்னம் அழைத்தால் அவர் வீட்டுக்கு வாசலுக்கு ஓடக்கூடிய ஹீரோக்கள் இருக்கிறார்கள். இது யாருக்கும் அமையாது.” என்கிறார் மோகன்ராஜன்

பிபிசி தமிழிடம் நடிகை அம்பிகா பேசுகையில், ”மணிரத்னம், இளையராஜா கூட்டணியில் உருவான இதய கோயில் படத்தில் நான் நடித்தேன். மோகன் காதலியாக வருவேன். கதைப்படி எனக்கு சின்ன ரோல்தான், ஆனால் பாடல்களால் நானும் பேசப்பட்டேன். குறிப்பாக, வானுயர்ந்த சோலையிலே பாடலை யார்தான் மறக்க முடியும். இதயம் ஒரு கோவில் அவ்வளவு இனிமையாக இருக்கும். இசையை மலராக நானும் சூட்டுவேன் அந்த பாடல் வரிகள் இன்னும் அழகு.

யார் வீட்டில் ரோஜா பூ பூத்ததோ பாடல் உணர்ச்சிபூர்வமாக இருக்கும். இளையராஜாவின் ட்யூனும், இசைக்கருவிகள் செய்த மாயமும், பாடல் படமாக்கப்பட்ட விதமும் அந்த பாடலை இன்றும் ரசிக்க வைக்கின்றன. அந்தவகையில் எனக்கு ஒருவகையில் பெருமை.” என்றார்

– இது, பிபிசிக்காக கலெக்டிவ் நியூஸ்ரூம் வெளியீடு