“அதேபோல், சில குறிப்பிட்ட உணவுகளை முற்றிலுமாகத் தவிர்ப்பது, உணவு உட்கொள்ளலைத் தவிர்த்தல் அல்லது கட்டுப்படுத்துதல் தொடர்பான குறைபாடு (Avoidant/Restrictive Food Intake Disorder – ARFID) எனப்படும் ஒரு உணவுக் கோளாறுடன் தொடர்புடையதாக இருக்கலாம். இது உணவு உட்கொள்ளலுடன் தொடர்புடைய ஒரு வகையான மனநலக் கோளாறாகும்” என்று அவர் விளக்கினார்.

கஜம்மாவின் வாழ்க்கையில் நடந்த சில நிகழ்வுகளை, அவரது உணவுப் பழக்கத்தில் ஏற்பட்ட அசாதாரண மாற்றமாகவும், “உளவியல் ரீதியான பாதிப்பாகவும்” பார்க்க வேண்டும் என்று டாக்டர் திருநாதர் தெரிவித்தார்.

பீடி சுற்றும் தொழிலையே தனது வாழ்வாதாரமாகக் கொண்டிருந்த கஜம்மா தற்போது தெலங்கானா அரசின் முதியோர் உதவித்தொகையைப் பெற்று வருகிறார்.

தெலங்கானாவின் வட மாவட்டங்களில் நீண்டகாலமாகப் பெண்களுக்கு வேலைவாய்ப்பு அளித்த முக்கியத் துறைகளில் பீடி தொழிலும் ஒன்றாக இருக்கிறது. பெற்றோர் உயிருடன் இருந்தவரை அவர்களுடனேயே வசித்து வந்த கஜம்மாவுக்குக் குழந்தைகள் இல்லை. தற்போது அவர் தனியாக வசித்து வருகிறார்.

உணவு சாப்பிடுவதை விட்டுவிடுவாயா என்று என்னிடம் கேட்டதை நினைத்து, பசி எடுத்தாலும் சாப்பிடாமல் இருந்ததை நினைவுகூர்கிறார் கஜம்மா.

பின்னர், வேர்க்கடலை சாப்பிடும் பழக்கம் தனக்கு எவ்வாறு ஏற்பட்டது என்பதையும் அவர் விவரித்தார்.

“பீடி சுற்றும் இடத்தில் சில வறுத்த வேர்க்கடலைகளைச் சாப்பிட்டுவிட்டு தண்ணீர் குடித்தால், வயிறு நிறைந்தது போல இருக்கும். எனவே வேர்க்கடலை சாப்பிடுவேன், அதோடு வெல்லத்தையும் சாப்பிடுவேன், பிறகு அதுவே பழக்கமாகிவிட்டது” என்றார் கஜம்மா.

குறிப்பிட்ட நேரங்களில் மட்டுமே சாப்பிட வேண்டும் என்ற எந்தக் கணக்கும் தனக்கு இல்லை என்று அவர் கூறினார். பசி எடுக்கும்போது கொஞ்சம் வேர்க்கடலையை சாப்பிட்டுவிட்டு டீ குடிப்பதாகவும் தெரிவித்தார்.

“எனக்குத் தெரிந்தவரை, கடந்த 30 ஆண்டுகளுக்கும் மேலாக அவரைப் பார்த்து வருகிறேன். சோறு சாப்பிடாவிட்டாலும் அவர் சுறுசுறுப்பாகவே இருக்கிறார். அவரது வீட்டில் அரிசி, எண்ணெய், மசாலாப் பொருட்கள், சமையல் பாத்திரங்கள் என எதுவுமே இருக்காது. வெறும் வேர்க்கடலை, வெல்லம், டீ தூள் மட்டுமே இருக்கும்” என்று நரஹரி என்ற கிராமவாசி கூறினார்.

கஜம்மாவைச் சந்திப்பதற்காக பிபிசி மைதாபூருக்குச் சென்றபோது, மூன்று அறைகள் கொண்ட தனது வீட்டில் அவர் தனியாக இருந்தார். தனது தோழி வெங்கட்டம்மாவுக்காகக் காத்திருப்பதாக அவர் கூறினார்.

நாங்கள் பேசிக் கொண்டிருந்தபோதே வெங்கட்டம்மாவும் அங்கு வந்து சேர்ந்தார்.

கல்லேபல்லி வெங்கட்டம்மாவும் கஜம்மாவும் சிறுவயது முதலே தோழிகள். வெங்கட்டம்மாவுக்கு அதே கிராமத்தைச் சேர்ந்த ஒருவருடன் திருமணம் நடைபெற்றதால், அவரும் அங்கேயே வசித்து வருகிறார். தற்போது காஜம்மாவை வெங்கட்டம்மாவே பார்த்து வருகிறார்.

“முதுமை காரணமாக கஜம்மாவின் பற்கள் விழுந்துவிட்டதால், இப்போது அவரால் வேர்க்கடலையை சாப்பிட முடியவில்லை. எனவே எங்கள் வீட்டிலேயே வேர்க்கடலையை பொடி செய்து கொண்டு வருகிறேன். சுவைக்காக அதில் சிறிதளவு உப்பையும் சேர்ப்பேன். கிராம மக்கள் அல்லது உறவினர்களின் வீடுகளில் நடைபெறும் விசேஷங்களுக்குச் செல்லும்போது, காஜம்மா டீ மட்டுமே குடிப்பார். வேறு எந்த உணவையும் சாப்பிடமாட்டார்” என்று வெங்கட்டம்மா கூறினார்.

“நாங்கள் இருவரும் ஒன்றாகவே வளர்ந்தோம். அவளுடைய அம்மா எங்கள் இருவரையும் சொந்தப் பிள்ளைகளைப் போலவே பார்த்துக்கொண்டார். அவர் இறக்கும் தருவாயில் என் கையைப் பிடித்துக்கொண்டு, ‘என் குழந்தையைப் பார்த்துக் கொள்ளம்மா’ என்று என்னிடம் கூறினார். அவருடைய அன்பையும் பாசத்தையும் என்னால் மறக்க முடியாது. நான் கொடுத்த வாக்கையும் மறக்க முடியாது” என்றார் வெங்கட்டம்மா.

“இந்த உலகத்தில் யாருமே நிரந்தரமானவர்கள் இல்லை என்பது எனக்குத் தெரியும். நான் அவளுக்கு முன்பாகப் போகலாம்; அவளும் எனக்கு முன்பாகப் போகலாம். ஆனால், நாங்கள் உயிருடன் இருக்கும் வரை எங்கள் இருவரின் பந்தம் இப்படியே தொடரும்” என்றும் அவர் கூறினார்.

இரண்டு ஆண்டுகளுக்கு முன்பு கஜம்மாவுக்கு உடல்நலக் குறைவு ஏற்பட்டது. ஜகித்யாலாவில் உள்ள ஒரு தனியார் மருத்துவமனையில் மருத்துவர்களை அணுகியபோது, அவருக்கு முதுகெலும்பு தொடர்பான பிரச்னை இருப்பது பரிசோதனையில் தெரியவந்தது.

அதன் பிறகு, தனது அன்றாட உணவில் சில புதிய உணவுப் பொருட்கள் சேர்க்கப்பட்டதாகக் கஜம்மா கூறினார். மருத்துவரின் அறிவுறுத்தலின்படி, டீக்குப் பதிலாகப் பால் குடிப்பதாகவும், தினமும் இரண்டு அவித்த முட்டைகளைச் சாப்பிடுவதாகவும் அவர் தெரிவித்தார்.

“மருத்துவமனையில் உள்நோயாளியாகச் சேர்க்க வேண்டும் என்று மருத்துவர் கூறியபோது, ‘ஐயோ கடவுளே… சோறு சாப்பிடாமல் இந்த நோயை நாமே வரவழைத்துக் கொண்டோமே’ என்று தோன்றியது. இப்போது என்னால் சோறு சாப்பிட முடியாது. உணவின் மீதான ஆசையே போய்விட்டது” என்றார்.

வழக்கமான உணவு சாப்பிடாமல் இருந்தபோதும் இத்தனை ஆண்டுகளாகக் கஜம்மா சுறுசுறுப்பாக இருந்ததற்கான காரணங்களை டாக்டர் திருநாதர் விளக்கினார்.

“ஒரு சராசரி மனிதரின் அன்றாடச் செயல்பாடுகளுக்கு 1,500 முதல் 2,200 கலோரிகள் வரை ஆற்றல் தேவைப்படுகிறது. அதிக உடலுழைப்பில் ஈடுபடாத கஜம்மாவுக்குத் தேவையான கலோரிகள் வேர்க்கடலை மற்றும் வெல்லம் மூலமாகவே கிடைத்திருக்கலாம். ஆனால், இது சீரான அல்லது ஊட்டச்சத்து நிறைந்த உணவுமுறை அல்ல.

நீண்ட காலத்திற்கு இதுபோன்ற உணவுகளை மட்டுமே உட்கொள்வதால், வைட்டமின் பி12 மற்றும் டி3 குறைபாடுகள் ஏற்படக்கூடும். இதனால் நரம்பு மண்டலத்தின் செயல்பாடு மற்றும் ரத்த அணுக்களின் உருவாக்கம் பாதிக்கப்படலாம். ரத்த சோகை, எலும்புத் தேய்மானம் உள்ளிட்ட பிரச்னைகளும் ஏற்படலாம்” என்று அவர் கூறினார்.

இருப்பினும், இதுபோன்ற நபர்களுக்கு உடனடியாக அனைத்து வகையான உணவுகளையும் வழங்கி சிகிச்சை அளிக்க முடியாது என்றும் டாக்டர் திருநாதர் எச்சரித்தார். நீண்ட காலமாகக் குறைந்த அளவிலான உணவை மட்டுமே உட்கொண்ட ஒருவருக்கு திடீரென அதிக அளவில் உணவு வழங்கும்போது, ‘ரீஃபீடிங் சிண்ட்ரோம்’ ஏற்படக்கூடும்.

இதனால் சோடியம், பொட்டாசியம், மெக்னீசியம், பாஸ்பேட் உள்ளிட்ட எலக்ட்ரோலைட்டுகளின் சமநிலை பாதிக்கப்பட்டு, இதயம் மற்றும் தசைகள் தொடர்பான கடுமையான பிரச்னைகள் ஏற்படலாம். சில சமயங்களில் இது உயிருக்கு ஆபத்தான நிலையாகவும் மாறக்கூடும் என்று அவர் தெரிவித்தார்.

எனவே, மனநல மருத்துவர், நரம்பியல் மருத்துவர் மற்றும் எலும்பியல் மருத்துவர் ஆகியோரின் கண்காணிப்பின் கீழ் முறையான சிகிச்சை அளிப்பது சிறந்தது என்றும் அவர் கூறினார்.

சமீபகாலமாக, உடல் எடையைக் குறைப்பதற்காக ஒரே வகையான உணவை மட்டுமே உட்கொள்ளும் போக்கு சமூக வலைதளங்களில் அதிகரித்து வருவதாகவும், இதுபோன்ற உணவுமுறையைப் பின்பற்றக் கூடாது என்றும் டாக்டர் திருநாதர் எச்சரித்தார். இத்தகைய உணவுமுறையைப் பின்பற்றிய சிலர் சில நாட்களிலேயே உடல்நலப் பிரச்னைகளுடன் மருத்துவமனைக்கு வரும் சம்பவங்கள் அதிகரித்து வருவதாகவும் அவர் குறிப்பிட்டார்.

“சீரான மற்றும் ஊட்டச்சத்து நிறைந்த உணவுமுறையைப் பின்பற்றுவதே ஆரோக்கியத்திற்கு நல்லது.

“உலக சுகாதார அமைப்பின் கூற்றுப்படி, உடல் ரீதியாக மட்டுமல்லாமல், மன ரீதியாகவும் நாம் வலிமையாக இருக்க வேண்டும். அதே நேரத்தில், நம்மைச் சுற்றியுள்ளவர்களுடன் ஆரோக்கியமான உறவுகளைப் பேணும்போதுதான் அது முழுமையான ஆரோக்கியமாக அமையும்” என்று மருத்துவர் திருநாதர் கூறினார்.

– இது, பிபிசிக்காக கலெக்டிவ் நியூஸ்ரூம் வெளியீடு