இதில், மாநில அரசின் நுகர்வோர் விவகாரங்கள் துறை சார்பில் பல இடங்களில் இருந்து பெட்ரோல் மாதிரிகள் சேகரிக்கப்பட்டதாக அவர் தெரிவித்தார்.

இதுகுறித்து அர்ஷத் கூறுகையில், “முக்கிய எண்ணெய் நிறுவனங்களின் பெட்ரோல் பங்குகளில் இருந்து சேகரிக்கப்பட்ட மாதிரிகளில் எத்தனால் அளவு 20 சதவீதத்துக்கும் அதிகமாக இருப்பது கண்டறியப்பட்டது. இரண்டு நிறுவனங்களின் மாதிரிகளில் இந்த அளவு முறையே 31.2 சதவீதம் மற்றும் 30.6 சதவீதமாகப் பதிவாகியுள்ளது. மூன்று இடங்களில் மட்டுமே எத்தனால் அளவு 20 சதவீதத்துக்கும் குறைவாக இருப்பது கண்டறியப்பட்டது” என்றார்.

“ஆரம்பத்தில், இந்த மாதிரிகள் இந்தியன் ஆயில் கார்ப்பரேஷன் மற்றும் பாரத் பெட்ரோலியம் கார்ப்பரேஷன் லிமிடெட் ஆகிய நிறுவனங்களின் உள் ஆய்வகங்களுக்கு அனுப்பப்பட்டன. ஆனால், அந்த ஆய்வகங்களின் அறிக்கைகளில் எத்தனாலின் உண்மையான அளவு குறிப்பிடப்படவில்லை. இதையடுத்து, அங்கீகாரம் பெற்ற ஆய்வகங்களில் மாதிரிகள் பரிசோதிக்கப்பட்டன.” என்றார் அவர்

நிர்ணயிக்கப்பட்ட அளவை விட அதிகமாக எத்தனால் கலப்பதுதான் பிரச்னை என்றும், எத்தனால் கலப்பதற்கு மாநில அரசு எதிரானது அல்ல என்றும் ரிஸ்வான் அர்ஷத் தெளிவுபடுத்தினார்.

அனுமதிக்கப்பட்ட அளவை விட அதிகமாக எத்தனால் கலப்பது நுகர்வோரின் நிதிச் சுமையை அதிகரிப்பதாகவும் அவர் கூறினார்.

இந்தியச் சந்தையில் கிடைக்கும் வாகனங்கள், அதிக அளவு எத்தனால் கலந்த எரிபொருளைப் பயன்படுத்தும் வகையில் வடிவமைக்கப்படவில்லை என்றும் ரிஸ்வான் அர்ஷத் தெரிவித்தார்.

“அளவுக்கு அதிகமான எத்தனால் பயன்பாடு வாகனங்களின் ஃபில்டர்கள், எரிபொருள் பம்புகள், இன்ஜெக்டர்கள், குழாய்கள் மற்றும் சீல்களைச் சேதப்படுத்தக்கூடும். எத்தனால் கலப்பதால் வாகனங்களின் மைலேஜ் சுமார் 10 சதவீதம் குறைகிறது” என அவர் தெரிவித்தார்.

பெட்ரோலில் உண்மையில் எவ்வளவு எத்தனால் கலக்கப்படுகிறது என்பதை மத்திய அரசு தெளிவுபடுத்த வேண்டும் என்று ரிஸ்வான் அர்ஷத் வலியுறுத்தியுள்ளார்.

மேலும், 20 சதவீதத்துக்கும் அதிகமாக எத்தனால் கலக்கும் எண்ணெய் நிறுவனங்கள் மீது நடவடிக்கை எடுக்க வேண்டும் என்றும் அவர் கோரிக்கை விடுத்துள்ளார்.

இதற்கிடையில், இந்தியன் ஆயில், பாரத் பெட்ரோலியம் மற்றும் ஹிந்துஸ்தான் பெட்ரோலியம் ஆகிய நிறுவனங்களும் இந்த விவகாரம் குறித்துத் தங்களது கருத்துகளைத் தெரிவித்துள்ளன.

கர்நாடகா உட்பட நாடு முழுவதும் விநியோகிக்கப்படும் இ20 பெட்ரோல், இந்திய தர நிர்ணய அமைப்பு வகுத்துள்ள IS 17021 என்ற தரநிலைக்கு உட்பட்டே இருப்பதாக இந்த எண்ணெய் நிறுவனங்கள் தெரிவித்துள்ளன.

எத்தனால் கலக்கப்பட்ட பெட்ரோலுக்காக இந்தத் தரநிலை நிர்ணயிக்கப்பட்டுள்ளது.

இந்தியன் ஆயில் கார்ப்பரேஷன், சமூக வலைதளமான எக்ஸ் தளத்தில் அறிக்கை ஒன்றை வெளியிட்டு, கர்நாடக அரசின் குற்றச்சாட்டுகள் தவறானவை என்று தெரிவித்துள்ளது.

சில பெட்ரோல் நிலையங்களில் அனுமதிக்கப்பட்ட அளவை விட அதிகமாக எத்தனால் கலக்கப்படுவதாக சமீபத்தில் முன்வைக்கப்பட்ட குற்றச்சாட்டுகள், நிர்ணயிக்கப்பட்ட சோதனை நடைமுறைகளின்படி மேற்கொள்ளப்பட்ட பரிசோதனை முடிவுகளுடன் பொருந்தவில்லை என்று அந்த நிறுவனம் தெரிவித்துள்ளது.

நாட்டின் 27 மாநிலங்கள் மற்றும் யூனியன் பிரதேசங்களில் மொத்தம் 893 மாதிரிகள் பரிசோதிக்கப்பட்டதாக அந்த நிறுவனம் தெரிவித்துள்ளது.

இதில் கர்நாடகாவில் இருந்து பெறப்பட்ட 56 மாதிரிகளும் அடங்கும். அனைத்துப் பரிசோதனை மாதிரிகளிலும் எத்தனால் அளவு நிர்ணயிக்கப்பட்ட 19 முதல் 21 சதவீத வரம்புக்குள் இருந்ததாக நிறுவனம் கூறியுள்ளது.

“உண்மையான நிலவரத்தைக் கண்டறிவதற்காக, கர்நாடக அரசுடன் இணைந்து வெளிப்படையான கூட்டு விசாரணை நடத்த இந்தியன் ஆயில் நிறுவனம், பாரத் பெட்ரோலியம் கார்ப்பரேஷன் லிமிடெட் மற்றும் ஹிந்துஸ்தான் பெட்ரோலியம் கார்ப்பரேஷன் லிமிடெட் ஆகியவை முன்மொழிந்துள்ளன” என்று அந்த நிறுவனத்தின் அதிகாரப்பூர்வ அறிக்கையில் தெரிவிக்கப்பட்டுள்ளது.

அதிகாரப்பூர்வ ஆதாரங்கள் மூலம் கிடைக்கும் சரிபார்க்கப்பட்ட தகவல்களை மட்டுமே நம்புமாறும் நுகர்வோருக்கு அந்த நிறுவனம் வேண்டுகோள் விடுத்துள்ளது.

இந்தச் சர்ச்சைக்கு மத்தியில், மத்திய பெட்ரோலியம் மற்றும் இயற்கை எரிவாயுத் துறை அமைச்சகம் அதிகாரப்பூர்வ அறிக்கை ஒன்றை வெளியிட்டுள்ளது.

அரசுக்குச் சொந்தமான எண்ணெய் நிறுவனங்கள் விற்பனை செய்யும் இ20 பெட்ரோல், நிர்ணயிக்கப்பட்ட தரக் கட்டுப்பாட்டு விதிமுறைகளைப் பூர்த்தி செய்வதாக அதில் தெரிவிக்கப்பட்டுள்ளது.

“கர்நாடகாவில் பரிசோதிக்கப்பட்ட மாதிரிகளும் தரநிலைகளுக்கு இணங்க இருப்பது கண்டறியப்பட்டுள்ளது. அவற்றில் எத்தனால் அளவு 19 முதல் 20 சதவீதத்திற்குள் இருந்தது” என்றும் தெரிவிக்கப்பட்டுள்ளது.

இந்தச் சர்ச்சை குறித்து மக்களவை எதிர்க்கட்சித் தலைவர் ராகுல் காந்தியும் கருத்துத் தெரிவித்துள்ளார். கர்நாடகாவின் பல்வேறு மாவட்டங்களில் பெட்ரோல் மாதிரிகள் பரிசோதிக்கப்பட்டதில், இ20 பெட்ரோலில் 20 சதவீதத்துக்கும் அதிகமாக எத்தனால் கலந்திருப்பது தெரியவந்துள்ளதாக அவர் குற்றம்சாட்டியுள்ளார்.

இதுகுறித்து எக்ஸ் தளத்தில் அவர் வெளியிட்ட பதிவில், “பெட்ரோலில் 20 சதவீத எத்தனால் கலக்கப்படுவதாக மோதி அரசு கூறுகிறது. கர்நாடக அரசு ஏழு மாவட்டங்களில் இருந்து பெட்ரோல் மாதிரிகளைச் சேகரித்து, அங்கீகரிக்கப்பட்ட ஆய்வகத்தில் பரிசோதனை செய்துள்ளது” என்று குறிப்பிட்டுள்ளார்.

மொத்தம் பரிசோதிக்கப்பட்ட 14 மாதிரிகளில் 11 மாதிரிகளில் 20 சதவீதத்துக்கும் அதிகமாக எத்தனால் கலந்திருப்பதாக ராகுல் காந்தி குற்றம்சாட்டியுள்ளார்.

இதில், இந்தியன் ஆயில் கார்ப்பரேஷனின் ஒரு மாதிரியில் 31.2 சதவீதமும், ஹிந்துஸ்தான் பெட்ரோலியத்தின் ஒரு மாதிரியில் 30.5 சதவீதமும் எத்தனால் கலந்திருப்பதாக அவர் தெரிவித்துள்ளார்.

“நீங்கள் அதிக விலை கொடுத்து பெட்ரோல் வாங்குகிறீர்கள். ஆனால், உங்கள் வாகனத்தின் டேங்கில் எத்தனால் நிரப்பப்படுகிறது. இதனால் ஏற்படும் இழப்பு உங்களுக்குத்தான்” என்று ராகுல் காந்தி தெரிவித்துள்ளார்.

20 சதவீதத்துக்கும் அதிகமாக எத்தனால் கலக்கும் நிறுவனங்கள் மீது எப்போது நடவடிக்கை எடுக்கப்படும் என்று பிரதமர் நரேந்திர மோதியிடம் ராகுல் காந்தி கேள்வி எழுப்பியுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு