இலங்கைக்கும் பாகிஸ்தானுக்கும் இடையில் ராவல்பிண்டியில் எதிர்வரும் 9ஆம் திகதி ஆரம்பமாகவுள்ள மூன்று போட்டிகளைக் கொண்ட சர்வதேச ரி20 தொடரில் பங்குபற்றுவதற்காக குசல் மெண்டிஸ் தலைமையிலான இலங்கை அணியினர் பாகிஸ்தான் சென்றடைந்துள்ளனர்.

உடற்தகுதியின்மை மற்றும் உபாதையிலிருந்து மீளாததன் காரணமாக இங்கிலாந்துக்கு எதிரான ரி20 தொடருக்கு செல்லாமல் ஓய்வுபெற்றுவந்த குசல் மெண்டிஸ் பின்னர் இங்கிலாந்துக்கு எதிரான சர்வதேச ஒருநாள் கிரிக்கெட் தொடரில் விளையாடினார்.

இப்போது ரி20 அணித் தலைவர் பதவியைப் மீண்டும் பொறுப்பேற்று பாகிஸ்தான் பயணமாகியுள்ளார்.

அத்துடன் சுழல்பந்துவீச்சாளர் விஜயகாந்த் வியாஸ்காந்த், ஆரம்ப வீரர் சினேத் ஜயவர்தன, சஹான் ஆராச்சிகே, சமிந்து விக்ரமசிங்க, பினுர பெர்னாண்டோ ஆகியோரும் குழாத்தில் இணைத்துக்கொள்ளப்பட்டுள்ளனர்.

இங்கிலாந்துக்கு எதிரான ரி20 தொடருக்கான இலங்கை குழாத்தில் இடம்பெற்ற 7 வீரர்கள் பாகிஸ்தானுக்கான சுற்றுப் பயணத்திலிருந்து நீக்கப்பட்டுள்ளனர்.

பதில் அணித் தலைவராக விளையாடிய சரித் அசலன்க, பெத்தும் நிஸ்ஸன்க, இங்கிலாந்தில் உபாதைக்குள்ளான வனிந்து ஹசரங்க, பவன் ரத்நாயக்க, தரிந்து ரத்நாயக்க, டில்ஷான் மதுஷன்க ஆகிய ஏழு பேரே குழாத்திலிருந்து நீக்கப்பட்ட வீரர்களாவர்.

இலங்கைக்கும் பாகிஸ்தானுக்கும் இடையிலான 3 சர்வதேச ரி20 போட்டிகள் ராவல்பிண்டியில் அக்டோபர் 9, 11, 13ஆம் திகதிகளில் நடைபெறும்.

அடுத்த இரண்டு வருடங்களில் நடைபெறவுள்ள இரண்டு வகை உலகக் கிண்ண கிரிக்கெட் போட்டிகளுக்கு இப்போதிருந்தே அணியைக் கட்டியெழுப்பும் பொருட்டு பாகிஸ்தானுக்கு எதிராக நடைபெறவுள்ள இருதரப்பு சர்வதேச ரி20 தொடரையும், பாகிஸ்தான், இலங்கை, இங்கிலாந்து ஆகியன பங்குபற்றும் மும்முனை சர்வதேச ஒருநாள் தொடரையும் பயன்படுத்தவுள்ளதாக ஞாயிற்றுக்கிழமை இங்கிருந்து புறப்படுவதற்கு முன்னர் இலங்கை அணித் தலைவர் குசல் மெண்டிஸ் தெரிவித்தார்.

‘பாகிஸ்தான் சுற்றுப்பயணம் எளிதானது அல்ல. அங்கு சர்வதேச ரி20 மற்றும் சர்வதேச ஒருநாள் கிரிக்கெட் போட்டிகளில் விளையாடவுள்ளோம். நாங்கள் உறுதியான திட்டத்துடன் விளையாடவேண்டும். இளம் வீரர்களுக்கு வாய்ப்பளித்து, ஒவ்வொரு வடிவத்திற்கும் குறைந்தது 15 அல்லது 16 வீரர்களைக் கொண்ட அணியைத் தயார் செய்ய வேண்டும்’ என அவர் மேலும் கூறினார்.

இலங்கை குழாம்

காமில் மிஷார, சினேத் ஜயவர்தன, குசல் மெண்டிஸ் (தலைவர்), லஹிரு உதார, சஹான் ஆராச்சிகே, கமிந்து மெண்டிஸ், தசுன் ஷானக்க, சமிந்து விக்ரமசிங்க, துனித் வெல்லாலகே, மஹீஷ் தீக்ஷன, விஜயகாந்த் வியாஸ்காந்த், பினுர பெர்னாண்டோ, நுவன் துஷார, ஏஷான் மாலிங்க, துஷ்மன்த சமீர.