சோனம் வாங்சுக்கின் லடாக்கிற்கான இயக்கம் உலக மக்களின் கவனத்தை ஈர்த்தது. தொடர்ந்து புதிய கண்டுபிடிப்புகளை உருவாக்கும் அவர், தொடர்ந்து செய்திகளில் இடம்பிடித்து வருகிறார்.

மாணவர்களின் உரிமைகளுக்காகவும், நிர்வாகத்தின் பொறுப்புக் கூறலுக்காகவும் ஜந்தர் மந்தரில் போராடி வரும் சோனம் வாங்சுக் தனது வாழ்வில் கடந்து வந்த பாதை பற்றி இங்கே தெரிந்து கொள்ளலாம்.

சோனம் வாங்சுக் ஒரு கல்வியாளராகவும், புதுமையான ஆராய்ச்சியாளராகவும், சுற்றுச்சூழல் ஆர்வலராகவும் அறியப்படுகிறார்.

லடாக்கின் தொலைதூர கிராமத்தில் இருந்து ஒரு புகழ்பெற்ற கல்வியாளராக மாறிய தனது பயணத்தை ‘லல்லன்தாப்’ ஊடகத்திற்கு அளித்த நேர்காணல் ஒன்றில் அவர் விவரித்தார்.

அந்த நேர்காணலைக் குறிப்பிட்டு பிபிசி ஹிந்தி ஒரு கட்டுரையை எழுதியுள்ளது.

அறுபது வயதான சோனம் வாங்சுக், 1966ஆம் ஆண்டு லே பகுதியில் உள்ள உலேடோக்போ என்ற தொலைதூர கிராமத்தில் பிறந்தார். தனக்கு ஒன்பது வயது ஆகும் வரை, தான் பள்ளிக்குச் செல்லவில்லை என்று அவர் கூறுகிறார்.

இதன் காரணமாக, அவர் வித்தியாசமாக சிந்திக்கும் பழக்கத்தை வளர்த்துக் கொண்டார். அவர் பள்ளிக்குச் செல்ல முடியாமல் போனதால், அவரது தாயார் உள்ளூர் மொழியில் அவருக்கு வீட்டிலேயே கற்றுக் கொடுத்தார். வாங்சுக் தனது ஆரம்பக்கால அறிவின் பெரும்பகுதியைத் தனது சொந்த அனுபவங்களின் மூலமாகவே பெற்றார்.

சோனம் வாங்சுக்கின் தந்தை சோனம் வாங்யால் அரசியல்வாதியாக இருந்தார். பின்னர் ஜம்மு காஷ்மீர் அரசாங்கத்தில் அமைச்சராகவும் பொறுப்பேற்றார்.

சோனமுக்கு 9 வயது இருந்தபோது, அவரது கல்விக்காக ஸ்ரீநகரில் உள்ள உள்ளூர் பள்ளி ஒன்றுக்கு அவர் அனுப்பப்பட்டார்.

பள்ளியில் சேர்ந்தவுடனே அவருக்கு ஆங்கிலப் புத்தகங்கள் வழங்கப்பட்டன. அவருக்கு அதில் எதுவும் புரியவில்லை. எனவே, ஆசிரியர்கள் பெரும்பாலும் அவரை வகுப்பறையின் பின்புறம் அமர வைத்தனர் அல்லது வகுப்பறைக்கு வெளியே நிற்க வைத்தனர்.

பள்ளியில் இருந்த இத்தகைய சூழலால் சலிப்படைந்த வாங்சுக், தனது 12வது வயதில் பேருந்து மூலம் தனியாக டெல்லிக்கு சென்றார். லடாக்கை சேர்ந்த மாணவர்களுக்கான ஒரு சிறப்பு கேந்திரிய வித்யாலயா பள்ளியில் சேர்வதே அவரது நோக்கமாக இருந்தது.

ஆனால் அங்கு மாணவர்களின் கூட்டம் பெருமளவில் இருந்ததுடன், உள்ளே நுழைவதற்காக அவர்கள் பல நாட்கள் முகாமில் காத்திருக்க வேண்டியிருந்தது.

இவை அனைத்தையும் பார்த்த பிறகு, சோனம் வாங்சுக் நேரடியாகப் பள்ளி முதல்வரின் அலுவலகத்திற்குச் சென்று தன்னைச் சேர்த்துக் கொள்ளுமாறு கோரிக்கை விடுத்தார். அவரது துணிச்சலான மற்றும் பிடிவாதமான குணத்தைக் கண்டு பள்ளியின் முதல்வர் அவரை பள்ளியில் சேர்த்துக் கொண்டதாக அந்த நேர்காணலில் வாங்சுக் கூறியிருந்தார்.

அதன் பிறகு, சோனம் வாங்சுக் பொறியியல் நுழைவுத் தேர்வுக்குத் தயாரானார். ஸ்ரீநகரில் உள்ள பிராந்திய பொறியியல் கல்லூரியில் (தற்போது என்.ஐ.டி) சேர்க்கைக்கான எழுத்துத் தேர்வில் தேர்ச்சி பெற்று நேர்காணலுக்கு சென்றார்.

நேர்காணலின்போது, அவரது பெயரைக் கண்ட முதல்வர், அவரது தந்தை என்ன செய்கிறார் என்று கேட்டார். அதற்கு வாங்சுக், “அவர் ஒரு விவசாயி” என்று பதிலளித்தார். உண்மையில், அந்த நேரத்தில் அவரது தந்தை ஜம்மு காஷ்மீரில் ஓர் அமைச்சராக இருந்தார்.

பி.டெக் முதலாம் ஆண்டு முடித்த பிறகு, ஒளியியலில் ஆர்வம் இருந்ததால் வாங்சுக் மெக்கானிக்கல் இன்ஜினியரிங் படிக்க விரும்பினார். இருப்பினும், அவரது தந்தை அவர் சிவில் இன்ஜினியரிங் படிக்க வேண்டுமென விரும்பினார்.

சோனம் வாங்சுக் மெக்கானிக்கல் இன்ஜினியரிங்கை தேர்வு செய்தார். இதனால் வாங்சுக்கின் கல்விச் செலவை ஏற்க அவரது தந்தை மறுத்துவிட்டார். எனவே, வாங்சுக் தனது தேவைக்காக பள்ளி மாணவர்களுக்குப் பாடம் கற்பிக்கத் தொடங்கினார்.

தனது 19ஆவது வயதில், அவர் ஒரு ஹோட்டலில் அறை எடுத்து மாணவர்களுக்குப் பாடம் கற்பிக்கத் தொடங்கினார். வெறும் 2 மாதங்களில், வாங்சுக் தனது மூன்று ஆண்டு பொறியியல் கல்விக்கான கட்டணத்தைச் செலுத்தினார்.

தனது கல்லூரிப் படிப்பை முடித்த பிறகு, சோனம் வாங்சுக் 1988ஆம் ஆண்டில் செக்மால் எனச் சுருக்கமாக அழைக்கப்படும் லடாக்கின் மாணவர் கல்வி மற்றும் கலாசார இயக்கத்தை நிறுவினார்.

அதன் தொடக்க ஆண்டுகளில், அரசுப் பள்ளிகளின் கல்வி முறையில் சீர்திருத்தங்களை மேற்கொள்ளவும் மாற்றங்களைக் கொண்டு வரவும் செக்மால் பணியாற்றியது. அதே நேரத்தில், பள்ளியில் தேர்ச்சி பெறாத பல மாணவர்களுக்கு செக்மால் வளாகத்தில் பாடம் கற்பிக்கப்பட்டது.

செக்மாலில், பாரம்பரிய பள்ளிக் கல்விக்கு மாற்றாக, இயற்கையோடு நெருங்கிப் பழகி, நடைமுறை அனுபவத்தின் மூலம் கற்றுக் கொள்வதற்கே முக்கியத்துவம் அளிக்கப்படுகிறது.

கடந்த 1994ஆம் ஆண்டில், சோனம் வாங்சுக் ‘ஆபரேஷன் நியூ ஹோப்’ என்ற திட்டத்தைத் தொடங்கினார். இதன்கீழ் இதுவரை 700 ஆசிரியர்கள் மற்றும் 1000 கிராமக் கல்விக் குழுக்களுக்கு பயிற்சி அளித்துள்ளது.

இந்த முயற்சி லடாக்கின் பள்ளிக் கல்வியில் ஒரு பெரிய மாற்றத்தைக் கொண்டு வந்தது. 1996ஆம் ஆண்டு வரை, வெறும் 5% மாணவர்கள் மட்டுமே 10ஆம் வகுப்புத் தேர்வில் தேர்ச்சி பெற்று வந்தனர். 2015ஆம் ஆண்டுக்குள், இந்த எண்ணிக்கை 75 சதவிகிதமாக உயர்ந்தது.

பள்ளிக் கல்வியை மேம்படுத்துதல் மற்றும் மாற்று வழிக் கல்வி என்ற யோசனையை பல்கலைக்கழக நிலைகளுக்கும் அவர் கொண்டு சென்றார். இந்த நோக்கத்துடன், அவர் லடாக்கின் மாற்று வழிகளுக்கான இமயமலை நிறுவனத்தை (HIAL) நிறுவினார்.

செக்மாலில் மேற்கொள்ளப்படும் ஆராய்ச்சிகள் ஹெச்.ஐ.ஏ.எல்-இல் அடுத்த கட்டத்திற்கு முன்னெடுத்துச் செல்லப்படுகின்றன. உதாரணமாக, சூரிய ஆற்றலின் உதவியுடன் அறைகளை வெதுவெதுப்பாக வைத்திருக்கும் தொழில்நுட்பம் செக்மாலில் உருவாக்கப்பட்டு, ஹெச்.ஐ.ஏ.எல்-இல் மேம்படுத்தப்பட்டது.

இந்தத் தொழில்நுட்பம் இந்திய ராணுவத்துடன் இணைந்து சீன எல்லையிலுள்ள ராணுவ முகாம்களுக்காகப் பயன்படுத்தப்பட்டது. இந்தத் தொழில்நுட்பம் பின்னர் ஆப்கானிஸ்தானுக்கும் கொண்டு செல்லப்பட்டதாக வாங்சுக் கூறுகிறார்.

கல்வித் துறையில் ஆற்றிய சிறந்த பங்களிப்புக்காக சோனம் வாங்சுக் 2018ஆம் ஆண்டில் ராமன் மகசேசே விருது வழங்கி கௌரவிக்கப்பட்டார்.

சோனம் வாங்சுக் ஒரு புதுமையான ஆராய்ச்சியாளராக அறியப்படுகிறார். காலநிலை மாற்றத்தின் விளைவாக விவசாயத்திற்கு தண்ணீர் பற்றாக்குறை ஏற்படுவதைக் கண்டு, அவர் ‘பனி ஸ்தூபி’ என்ற யோசனையைக் கொண்டு வந்தார்.

பௌத்தர்கள் அதிகம் வாழும் பகுதியில் மக்களின் கவனத்தை ஈர்ப்பதற்காக ‘ஸ்தூபிகள்’ என்று பெயரிடப்பட்ட இந்தக் கூம்பு வடிவ பனி மலைகள், குளிர்காலத்தில் தண்ணீரைச் சேமித்து வைக்கின்றன. கோடைக் காலத்தில், அப்படி சேகரிக்கப்படும் பனி உருகி பாசனத்திற்குத் தேவையான தண்ணீரை வழங்குகிறது.

சோனம் வாங்சுக் மற்றும் அவரது குழுவினரால் உருவாக்கப்பட்ட 6 ‘பனி ஸ்தூபிகள்’ சுமார் 30 மில்லியன் லிட்டர் தண்ணீரைச் சேமித்து வைக்கக் கூடியவை.

அவர்கள் சுற்றுச்சூழல் மற்றும் கல்வி குறித்த தங்கள் யோசனைகளை லடாக்கிற்கு மட்டுமின்றி, ஒட்டுமொத்த இமயமலைப் பிராந்திய மக்களுக்கும் சுவிட்சர்லாந்து வரையும் கொண்டு சென்றுள்ளனர்.

கடந்த 2025 அக்டோபரில், லடாக்கில் அமைதியின்மையைத் தூண்டியதாக குற்றம்சாட்டி சோனம் வாங்சுக்கை அரசாங்கம் கைது செய்தது. ஆனால், அவர் அந்தக் குற்றச்சாட்டுகளை மறுத்தார். சுமார் 170 நாட்களை சிறையில் கழித்த பிறகு, அரசாங்கம் வாங்சுக் மீதான குற்றச்சாட்டுகளைக் கைவிட்டு அவரை விடுதலை செய்தது.

லடாக்கிற்கு முழு மாநில அந்தஸ்து வழங்க வேண்டும், அதை ஆறாவது அட்டவணையில் சேர்க்க வேண்டுமென வலியுறுத்தி அவர் 21 நாட்கள் உண்ணாவிரதப் போராட்டம் மேற்கொண்டிருந்தார்.

இதே கோரிக்கைக்காக, 2024 அக்டோபரில் வாங்சுக் லடாக்கில் இருந்து டெல்லிக்கு பேரணி ஒன்றையும் நடத்தியிருந்தார். இருப்பினும், டெல்லி போலீசார் அவரை சிங்கு எல்லையில் கைது செய்தனர்.

கடந்த 2025ஆம் ஆண்டில், அவர் 35 நாட்கள் உண்ணாவிரதப் போராட்டத்தில் ஈடுபட்டார். அதன் 15ஆவது நாளான செப்டம்பர் 24 அன்று, லே பகுதியில் நடந்த போராட்டம் வன்முறையாக மாறியது. இந்தச் சம்பவத்தில் 4 பேர் உயிரிழந்தனர், சுமார் 50 பேர் காயமடைந்தனர்.

வன்முறைப் போராட்டங்கள் நடந்த இரண்டு நாட்களுக்குப் பிறகு, செப்டம்பர் 26, 2025 அன்று வாங்சுக் லடாக்கில் காவலில் வைக்கப்பட்டதுடன், தேசிய பாதுகாப்புச் சட்டத்தின் கீழ் 170 நாட்கள் சிறையில் அடைக்கப்பட்டார்.

சோனம் வாங்சுக்கின் பெயர் குறிப்பிடப்படும் போதெல்லாம், ‘3 இடியட்ஸ்’ என்ற ஹிந்தி திரைப்படம் பற்றியும் பேசப்படுகிறது.

பல ஆண்டுகளாக, ‘3 இடியட்ஸ்’ படத்தில் ஆமிர் கான் நடித்த ‘புன்சுக் வாங்சுக்’ கதாபாத்திரம் சோனம் வாங்சுக்கின் தாக்கத்தால் ஈர்க்கப்பட்டு உருவாக்கப்பட்டது என்றே கூறப்பட்டு வந்தது. ஆனால், அது தவறான புரிதல் என்றும் அது உண்மையில்லை என்றும் ஆமிர் கான் சமீபத்தில் தெளிவுபடுத்தியுள்ளார்.

‘இந்தியன் எக்ஸ்பிரஸ்’ நாளிதழின் இணையதள செய்திப்படி, வாங்சுக் எப்போதும் இந்த வாதத்தில் இருந்து தன்னை விலக்கியே வைத்துள்ளார்.

திரைப்படம் தயாரிக்கப்படும்போது தன்னிடம் எந்த ஆலோசனையும் கேட்கப்படவில்லை என்றும், தனது அனுமதி பெறப்படவில்லை என்றும் அவர் கூறுகிறார். மேலும் இதுகுறித்து தயாரிப்பாளர்களுக்கு ஒரு கடிதம் எழுதியதாகவும், ஆனால் அதற்கு எந்தப் பதிலும் வரவில்லை என்றும் அவர் கூறுகிறார்.

“அவர்கள் ரகசியமாக எனது பள்ளிக்கு வந்து படத்தை எடுத்தார்கள்” என்று வாங்சுக் ஒருமுறை கூறியிருந்தார். ‘கோன் பனேகா குரோர்பதி’ நிகழ்ச்சியில் அமிதாப் பச்சனுடன் பேசும்போது சோனம் வாங்சுக் இதுகுறித்த தனது நிலைப்பாட்டைத் தெளிவுபடுத்தியிருந்தார்.

“என் மீதான ஈர்ப்பின் அடிப்படையில் இந்தப் படம் எடுக்கப்பட்டதாக நீங்கள் கூறினால், நான் அதை மறுக்க மாட்டேன். ஆனால் ஒட்டுமொத்த படமும் எனது வாழ்க்கையை அடிப்படையாகக் கொண்டது என்பதை நான் ஒப்புக்கொள்ளவில்லை” என்று வாங்சுக் கூறியிருந்தார்.

‘ஜோஷ் டாக்ஸ்’ நிகழ்ச்சியில் ஆற்றிய உரை ஒன்றிலும், “மக்கள் எப்போதும் என்னிடம், ‘3 இடியட்ஸ் படத்தில் வரும் பள்ளி உங்களுடைய பள்ளியா? நீங்கள்தான் புன்சுக் வாங்சுக்கா?’ என்று கேட்கிறார்கள். நான் ஒரு விஷயத்தைத் தெளிவுபடுத்த விரும்புகிறேன். இல்லை, நான் புன்சுக் வாங்சுக் அல்ல. நான் சோனம் வாங்சுக்” என்று கூறினார்.

“நான் திரைப்படங்களில் பணியாற்றுவதில்லை, நிஜ வாழ்வில்தான் பணியாற்றுகிறேன். இந்தியா பெருமைப்படக்கூடிய புதிய கண்டுபிடிப்புகளையும் சோதனைகளையும் உருவாக்குவதற்காக நான் பணியாற்றுகிறேன்” என்றும் அவர் குறிப்பிட்டார்.

3 இடியட்ஸ் படம் தமிழில் சங்கர் இயக்கத்தில் விஜய் நடிப்பில் நண்பன் என்ற பெயரில் ரீமேக் செய்யப்பட்டது நினைவுகூரத்தக்கது.

– இது பிபிசிக்காக கலெக்டிவ் நியூஸ்ரூம் வெளியீடு