தாக்குதலைத் தொடர்ந்து மயங்கி விழுந்த செந்தில்குமாரை காவல் ரோந்துப் படையினர் மீட்டு அருகிலுள்ள தனியார் மருத்துவமனைக்குக் கொண்டு சென்றனர். பின்னர், மேல் சிகிச்சைக்காக அவர் தேனி அரசு மருத்துவக் கல்லூரி மருத்துவமனைக்கு மாற்றப்பட்டார்.

ஆனால், அவரைக் காப்பாற்ற முடியவில்லை என்றும் அவர் உயிரிழந்துவிட்டதாக மருத்துவர்கள் தெரிவித்ததாகவும் காவல்துறை கூறுகிறது.

செந்தில்குமாரின் உயிரிழப்பு அவரது குடும்பத்தினர் மற்றும் அவருடன் பணியாற்றிய காவல்துறையினர் மத்தியில் அதிர்ச்சியை ஏற்படுத்தியுள்ளது.

இந்தச் சம்பவம் குறித்து தென் மண்டல காவல்துறைத் தலைவர் விளக்கம் அளித்துள்ளார்.

சிறப்பு உதவி ஆய்வாளர் செந்தில்குமார் பணியை முடித்துவிட்டு சாதாரண உடையில் வீட்டிற்குத் திரும்பிக் கொண்டிருந்தபோது, பொது சாலையில் இளைஞர்கள் சிலர் பட்டாசுகளை வெடித்துக் கொண்டிருந்ததைக் கவனித்ததாக அவர் தெரிவித்தார். பொது மக்களுக்கு இடையூறு ஏற்படுவதைத் தவிர்க்கும் வகையில் சாலையை விட்டு விலகிச் செல்லுமாறு இளைஞர்களிடம் செந்தில்குமார் அறிவுறுத்தியதாகவும் தென் மண்டல காவல்துறைத் தலைவர் கூறினார்.

மேலும், அவர்களின் செயல்பாடுகளைத் தனது செல்போனில் காணொளியாகப் பதிவு செய்ய முயன்றுள்ளார். அப்போது இளைஞர்களில் ஒருவரைப் பிடிக்க செந்தில்குமார் முயன்றபோது, மற்றொரு நபர் தனது முழங்கையால் அவரைத் தாக்கியதாக காவல்துறைத் தலைவர் தெரிவித்தார்.

“இதில் நிலைகுலைந்து செந்தில்குமார் கீழே விழுந்துள்ளார். தகவலறிந்து சம்பவ இடத்திற்கு வந்த காவல் ரோந்துப் படையினர் அவரை மீட்டு மருத்துவமனைக்குக் கொண்டு சென்றனர். இருப்பினும் அவரைக் காப்பாற்ற முடியவில்லை” என்றும் அவர் தெரிவித்தார்.

செந்தில்குமாருக்கு ஏற்கெனவே இதயம் தொடர்பான உடல்நல பாதிப்புகள் இருந்ததாகவும் காவல்துறையினர் கூறியுள்ளனர். எனினும், அவரது உயிரிழப்புக்கான துல்லியமான மருத்துவக் காரணம் குறித்த விசாரணை தொடர்ந்து நடந்து வருகிறது.

சம்பவம் குறித்த தகவல் கிடைத்ததும் தேனி மாவட்ட காவல்துறையினர் சமதர்மபுரம் பகுதிக்குச் சென்று விசாரணை மேற்கொண்டனர். தேனி மாவட்ட காவல் கண்காணிப்பாளர் பிரவீன் கௌதமும் சம்பவ இடத்திற்கு நேரில் சென்று விசாரணையைத் தீவிரப்படுத்தினார்.

சம்பவம் நடந்த சமதர்மபுரம் மற்றும் அதைச் சுற்றியுள்ள பகுதிகளில் பொருத்தப்பட்டுள்ள கண்காணிப்புக் கேமராக்களின் பதிவுகளையும் காவல்துறையினர் ஆய்வு செய்தனர். இதையடுத்து, இந்தச் சம்பவம் தொடர்பாக உள்ளூரைச் சேர்ந்த மூன்று இளைஞர்கள் கைது செய்யப்பட்டுள்ளதாக காவல்துறை தெரிவித்துள்ளது.

செந்தில்குமார் மீது நேரடியாகத் தாக்குதல் நடத்தியவர்கள் யார், சம்பவத்தின்போது வேறு யாரேனும் உடன் இருந்தார்களா, தாக்குதலுக்கான முழுமையான காரணம் என்ன என்பது குறித்து விசாரணை நடந்து வருகிறது.

காவல் சிறப்பு உதவி ஆய்வாளர் செந்தில்குமாரின் உயிரிழப்புக்கு தமிழ்நாடு முதலமைச்சர் ஜோசப் விஜய் இரங்கல் தெரிவித்துள்ளார்.

இதுதொடர்பாக நவம்பர் 9ஆம் தேதி அவர் வெளியிட்ட அறிக்கையில், பழனிசெட்டிபட்டி காவல் நிலையத்தில் பணிபுரிந்து, தேனி காவல் துணைக் கண்காணிப்பாளர் முகாம் அலுவலகத்தில் மாற்றுப் பணியில் இருந்த செந்தில்குமார், நவம்பர் 8ஆம் தேதி இரவு சமதர்மபுரம் பகுதியில் பட்டாசு வெடித்தவர்களைக் கண்டித்தபோது தாக்கப்பட்டு உயிரிழந்த செய்தி மிகுந்த வேதனையை ஏற்படுத்தியுள்ளதாகக் குறிப்பிட்டுள்ளார்.

செந்தில்குமாரின் உயிரிழப்பு தமிழ்நாடு காவல்துறைக்கும் அவரது குடும்பத்தினருக்கும் ஈடுசெய்ய முடியாத பேரிழப்பு என்று தெரிவித்துள்ள முதலமைச்சர், அவரது குடும்பத்தினர், உறவினர்கள் மற்றும் உடன் பணியாற்றிய காவல்துறையினருக்கு ஆழ்ந்த இரங்கலையும் ஆறுதலையும் தெரிவித்துள்ளார்.

மேலும், உயிரிழந்த செந்தில்குமாரின் குடும்பத்தினருக்கு ரூ.40 லட்சம் நிவாரண நிதி வழங்க உத்தரவிட்டு இருப்பதாகவும் முதலமைச்சர் அறிவித்துள்ளார்.

தேனியில் சிறப்பு உதவி ஆய்வாளர் தாக்கப்பட்டு உயிரிழந்த சம்பவத்தைக் கண்டித்துள்ள எதிர்க்கட்சித் தலைவர் உதயநிதி ஸ்டாலின், தீபாவளியன்று தமிழ்நாட்டில் காவலர் உள்பட ஒன்பது பேர் கொல்லப்பட்டு இருப்பதாகத் தனது எக்ஸ் பதிவில் குறிப்பிட்டுள்ளார்.

பட்டாசு சத்தத்தைவிட பட்டாக் கத்திகளின் சத்தமே அதிகம் கேட்பதாக விமர்சித்துள்ள அவர், தமிழகத்தில் பொது மக்களுக்கும் அவர்களைக் காக்க வேண்டிய காவலர்களுக்கும் பாதுகாப்பு இல்லை எனக் குற்றம் சாட்டியுள்ளார். சட்டம் ஒழுங்கு பிரச்னைகளுக்குத் தமிழ்நாடு அரசு பொறுப்பேற்க வேண்டும் என்றும் அவர் வலியுறுத்தியுள்ளார்.

அதேபோல் அதிமுக பொதுச் செயலாளர் எடப்பாடி பழனிசாமி, தீபாவளியன்று தேனி, கடலூர், திருச்சி, சென்னை, சிவகங்கை, திருவள்ளூர் உள்ளிட்ட மாவட்டங்களில் ஒரே நாளில் 11 கொலைகள் நடைபெற்றுள்ளதாகக் குற்றம் சாட்டியுள்ளார். காவல்துறையினருக்கே பாதுகாப்பில்லாத நிலையில் சாமானிய மக்களுக்கு எவ்வாறு பாதுகாப்பு கிடைக்கும் என்று கேள்வி எழுப்பியுள்ள அவர், தற்போதைய தவெக ஆட்சியில் சட்டம் ஒழுங்கு சீர்குலைந்துள்ளதாக விமர்சித்துள்ளார்.

மேலும், அரசியல் என்பது திரைப்படம் அல்ல, முதலமைச்சர் பதவி என்பது வசனம் பேசுவதற்கான மேடை அல்ல என்று முதலமைச்சர் விஜயை அவர் சாடியுள்ளார். செந்தில்குமாரின் குடும்பத்தினருக்கு அறிவிக்கப்பட்டுள்ள ரூ.40 லட்சம் நிவாரணம் போதுமானதல்ல என்று தெரிவித்துள்ள எடப்பாடி பழனிசாமி, 2026 அக்டோபர் 14ஆம் தேதி வெளியிடப்பட்டதாகக் கூறும் அரசாணையின்படி ரூ.1 கோடி நிவாரணமும், குடும்பத்தில் ஒருவருக்கு அரசு வேலையும் வழங்க வேண்டும் என்றும் வலியுறுத்தியுள்ளார்.

அத்துடன், ஒரே நாளில் நடைபெற்றதாகத் தாம் குறிப்பிடும் 11 கொலைச் சம்பவங்களில் தொடர்புடையவர்கள் மீது கடுமையான சட்ட நடவடிக்கை எடுக்க வேண்டும் என்றும் கோரியுள்ளார்.

குற்றம் சாட்டப்பட்டவர்கள் தரப்பினரைத் தொடர்பு கொள்ள பிபிசி தமிழ் முயற்சி செய்தது, ஆனால் அவை பலனிக்கவில்லை. அவர்களிடம் இருந்து கருத்துகள் கிடைக்கும்பட்சத்தில் இந்தக் கட்டுரையில் அவை சேர்க்கப்படும்.

– இது, பிபிசிக்காக கலெக்டிவ் நியூஸ்ரூம் வெளியீடு