ஆசை (1995), நடிகர் அஜீத்திற்கு வணிக ரீதியில் ஒரு அடையாளத்தைக் கொடுத்த திரைப்படத்தில், தேவா இசையமைத்த அனைத்துப் பாடல்களுமே ரசிகர்களால் கொண்டாடப்பட்டன. குறிப்பாக கர்நாடக இசை, கஜல் இசைக்குப் புகழ்பெற்ற பாடகர்களின் குரலில் ஒலித்த பாடல்கள்.

தேவா, கானா பாடல்களுக்கு புகழ்பெற்றவர் தான், ஆனால் அவருக்கு மெலடி பாடல்களை இசையமைப்பதில் தான் பெரும் விருப்பம் என்பதை ‘ஆசை’ திரைப்படத்தின் பாடல்கள் மூலம் புரிந்துகொள்ளலாம். அப்பாடல்களின் ஒலித்தரம், இப்போதும் ஒரு புதுமையான அனுபவத்தைக் கொடுக்கும்.

திரைத்துறைக்கு வருவதற்கு முன்பு ‘தூர்தர்ஷன்’ நிகழ்வுகளில் தேவாவுடன் பணியாற்றிய அனுபவத்தில் இந்தப் படத்திற்கு அவரை இசையமைக்க தேர்ந்தெடுத்ததாக ஒரு நேர்காணலில் கூறியிருந்தார் ‘ஆசை’ திரைப்படத்தின் இயக்குநர் வசந்த்.

வாலியின் வரிகளில், உன்னிகிருஷ்ணன், அனுராதா ஸ்ரீராம் பாடிய ‘மீனம்மா’ பாடல் தமிழகம் முழுவதும் அப்போது ஒலித்தது என நினைவுகூர்கிறார் எழுத்தாளர் ஜா.தீபா.

“தேவா மூலமாகத் தான் எனக்கு பாடகர் உன்னிகிருஷ்ணன் அறிமுகம். அதன் பின்னர் அவருடைய கர்நாடக சங்கீத கேசட்டுகளை காசு சேர்த்து வாங்கிக் கேட்கும் அளவுக்கு பரம ரசிகையானேன்” என்கிறார் அவர்.

‘ஆசை’ திரைப்படத்தில் வைரமுத்து வரிகளில், சித்ரா, உன்னிகிருஷ்ணன் பாடிய ‘புல்வெளி…புல்வெளி’ பாடலும், ‘கானா தேவா’ என்ற அடையாளத்தை உடைக்கக்கூடிய பாடல்களில் ஒன்றாகக் குறிப்பிடலாம்.

“‘மீனம்மா’ பாடலை பெரும் தயக்கதோடு தான் பாடினேன். அதுவரை அதிகமாக கர்நாடக சங்கீத பாடல்களே பாடியிருந்ததால் இந்தத் தயக்கம். ஆனால், தேவாதான் ‘பி.சுசீலா, சித்ரா, போல நீயும் பெரிய பாடகியாக வருவாய்’ என ஊக்கப்படுத்தினார்” என ஒரு நேர்காணலில் குறிப்பிட்டிருந்தார் பாடகி அனுராதா ஸ்ரீராம்.

அதேபோல சீமான் இயக்கத்தில், பிரபு நடிப்பில், வைரமுத்துவின் வரிகளில், ‘பாஞ்சாலங்குறிச்சி’ திரைப்படத்தில் ஒலித்த ‘உன் உதட்டோர சிவப்பே’, ஹரிஹரன் – அனுராதா ஸ்ரீராம் கூட்டணியின் குரலில் உருவான மற்றொரு ஹிட் பாடல். இந்தப் பாடலுக்கு இசையமைத்தது தேவா என்பதே இன்றும் பலருக்கு ஓர் ஆச்சரியமான தகவலாக உள்ளது.

“நான் திரைத்துறைக்கு வருவதற்கு முன்பே ஹரிஹரன் பாடிய ‘கஜல்’ இசை பாடல்களை கேட்பேன். எப்படியாவது எனது இசையில் இவரை பாட வைத்துவிட வேண்டுமென ஆசைப்பட்டேன். ‘ஆசை’ படத்தில் அது நிறைவேறியது. அதன் பிறகு எனது பெரும்பாலான திரைப்படங்களில் ஹரிஹரன் இருந்தார்” என ஒரு நேர்காணலில் குறிப்பிட்டிருந்தார் தேவா.

“தேவாவின் அற்புதமான மெலடிகளில், ஹரிஹரன் – அனுராதா ஸ்ரீராம், உன்னிகிருஷ்ணன் – அனுராதா ஸ்ரீராம், இதில் எந்தக் கூட்டணி அட்டகாசமாக இருக்கும் என நாங்கள் பேசிக்கொண்டே மூன்று கிலோமீட்டர் தூரம் நடந்து பஸ் ஸ்டாண்டுக்குப் போய் பஸ் பிடித்து கல்லூரி சென்று அங்கும் ஓயாமல் பேசிக்கொண்டே இருந்திருக்கிறோம்” என நினைவுகூர்கிறார் எழுத்தாளர் ஜா.தீபா.

தேவாவின் மெலடிகளைப் பற்றி பேசும்போது, முரளி, கௌசல்யா நடித்த ‘காலமெல்லாம் காதல் வாழ்க’ (1997) திரைப்படத்தைக் குறிப்பிடாமல் இருக்க முடியாது.

‘அண்ணாநகர் ஆண்டாளு’ என தேவாவின் வழக்கமான ஒரு கானா பாடல் இப்படத்தில் இருந்தாலும், ‘ஒரு மணி அடித்தால் உன் நியாபகம்’ பாடலுக்கு இப்போதும் ஒரு ரசிகர் வட்டம் உண்டு.

“பொதுவாக பாடல்களின் ராகங்களை துல்லியமாகச் சொல்லும் எனது அப்பாவிற்கு, அக்காலத்தில் வானொலியில் கேட்பதற்கு விருப்பமான பாடலாக ‘ஒரு மணி அடித்தால் உன் நியாபகம்’ இருந்தது” என்கிறார் எழுத்தாளர் ஜா.தீபா.

அதேபோல தான் அகத்தியன் இயக்கத்தில், அஜீத், தேவயானி நடிப்பில் வெளியான காதல் கோட்டை (1996) திரைப்படத்தில், தேவா தனது ‘சிக்னேச்சர்’ குரலில் பாடிய ‘கவலைப்படாத சகோதரா…’ பிரபலமான கானல் பாடல் ஒருபுறமும், மறுபுறம் எஸ்.பி.பி., அனுராதா ஸ்ரீராம் பாடிய ‘நலம் நலமறிய ஆவல்’ என்ற மென்மையான காதல் பாடலும் இருந்தது.

தேவா இசையமைத்த ‘முகவரி’ (2000) திரைப்படத்தின் கதைப்படி நாயகன் ஸ்ரீதர் (அஜீத்), ஒரு திரைப்பட இசையமைப்பாளராக கடும் முயற்சிகளை எடுப்பவன், நடுத்தர குடும்பத்தில் பிறந்தவன்.

ஒரு காட்சியில், வாய்ப்பு கேட்டுச் செல்லும் இடத்தில், “காதலைச் சொல்ல துடிக்கும் ஒருவனின் ஏக்கத்தை கர்நாடக சங்கீதத்தில் தொடங்கி, மேற்கத்திய இசைக்கு மாறி, கஜல் இசையில் அவன் ஏக்கத்தை சொல்லி, ஹிந்துஸ்தானி இசையில் முடிக்கலாம்” என ஒரு திரைப்பட இயக்குநரிடம் விளக்குவான் ஸ்ரீதர்.

அடுத்த காட்சியில் இதே ராகங்களின் கலவையில், ‘ஏ நிலவே..’ என உன்னி மேனனின் குரலில் உச்ச ஸ்தாயியில் ஒரு பாடல் ஒலிக்கும். பல வருடங்களாக போராடும் ஸ்ரீதருக்கு, அந்த ஒரே பாடலின் மூலம் இசையமைப்பாளர் வாய்ப்பு கிடைப்பது தான் காட்சி.

அதை மக்கள் ஏற்றுக்கொள்ளும் அளவுக்கு ‘ஏ நிலவே..’ பாடலை உருவாக்கியிருந்தார் தேவா. இந்த ஒரு பாடலைக் கேட்டால், தேவா எனும் இசையமைப்பாளரை ‘கானா’ என்ற வரையறைக்குள் அடைப்பது எவ்வளவு பெரிய தவறு எனப் புரியும்.

‘கொத்தவால் சாவடி லேடி நீ கோயம்பேடு வாடி’ என்ற தேவாவின் கானா பாடல் வரிகள் பிரபலமான அளவுக்கு, ‘முகவரி’ திரைப்படத்தின், ‘உன் விழி ஈர்ப்பு விசையினிலே அன்பே அன்பே, நான் வந்து விழுந்து விட்டேன் அன்பே அன்பே’ வரிகள் பிரபலமாகவில்லை.

‘ஆஹா’ (1997) திரைப்படத்தில் இடம்பெற்ற ‘முதன்முதலில் பார்த்தேன்’ என்ற மெலடி பாடலும் தேவா இசையமைத்ததுதான். இன்றும் பல இன்ஸ்டாகிராம் ரீல்களில் ஹரிஹரன்- சித்ரா குரலில் உருவான அப்பாடல் ஒலிக்கிறது.

‘அண்ணாமலை’, ‘பாட்ஷா’ என மாஸ் திரைப்படங்களுக்கு பிறகு தேவாவுடன் ‘ஆஹா’ என்ற காதல் படத்திற்காக இணைந்தார் சுரேஷ் கிருஷ்ணா.

“வாலி, முகவரி, அவ்வை சண்முகி , ஆசை, காதல் கோட்டை, காதலே நிம்மதி திரைப்படங்களின் பாடல்கள், ஆஹா படத்தில் ‘முதன்முதலில் பார்த்தேன் காதல் வந்தது’ பாடல் என ஒவ்வொன்றுக்குமே அந்தக் கால இளம்பெண்களிடம் தனிப்பட்ட கதைகள் இருந்தன. எங்களது பள்ளி, கல்லூரி காலங்களை தேவா இல்லாமல் நினைத்துப் பார்க்கவே முடிந்ததில்லை” எனக் குறிப்பிடுகிறார் எழுத்தாளர் ஜா.தீபா.

“எனக்கு கானா பாடல்கள், குத்து பாடல்கள் தான் வரும் என முத்திரை குத்தி விட்டார்கள். ‘முதன்முதலில் பார்த்தேன்’ போன்ற பாடல்களை இதை நீங்கள் தான் இசையமைத்தீர்களா என என்னிடம் கேட்பார்கள்” என ஒரு நிகழ்வில் கூறியிருந்தார் தேவா.

கடந்த 2024இல் நடந்த அந்த நிகழ்வில், சமீப காலமாக தான் தன்னுடைய மெலடி பாடல்களுக்கு தனக்கு அங்கீகாரம் கிடைத்துவருவதாகக் குறிப்பிட்டிருந்தார் தேவா.

“ஒரு வெளிநாட்டு கச்சேரிக்கு பாடல் பட்டியலை அனுப்பியபோது, ‘புல்வெளி…புல்வெளி’ பாடலைப் பார்த்துவிட்டு, ‘சார், நீங்கள் பிற இசையமைப்பாளர்களின் பாடலையும் மேடையில் பாடுவீர்களா?’ என அந்த விழா ஒருங்கிணைப்பாளர் கேட்டார். இதை என்னவென்று சொல்வது?” என நகைச்சுவையாக தனது வலியை பகிர்ந்திருந்தார் தேவா.

2014இல், அனிருத் இசையில் ‘மான் கராத்தே’ படத்தில், நீண்ட நாட்கள் கழித்து ஒரு கானா பாடலை பாடியிருந்தார் தேவா. அந்தப் பாடல் ஹிட் ஆக, மீண்டும் தேவாவின் குரலில் ‘கானா பாடல்கள்’ ஒலிக்கத் தொடங்கின.

ஆனால், அருமையான மெலடி பாடல்களை இசையமைக்க மட்டுமல்ல, பாடவும் முடியும் என்பதை ‘மாமன்னன்’ (2023) திரைப்படத்தின் ஏ.ஆர்.ரஹ்மான் இசையில் வெளியான ‘நெஞ்சமே..நெஞ்சமே’ பாடல் (இரண்டாவது வெர்ஷன்) மூலம் நிரூபித்தார் தேவா.

“அந்தப் பாடலின் இசை மற்றும் வரிகளை கேட்டவுடன், இப்படி ஒரு அற்புதமான மெலடியைப் பாட என்னை எப்படி ரஹ்மான் அழைத்தார் என்பது இப்போது வரை எனக்கு பெரும் ஆச்சரியம். இவனுக்கு ‘கானா’ பாட தான் வரும் என்பதை அவர் மாற்றினார். இன்னும் நிறைய மெலடிகளை பாட வேண்டும்” என 2024இல் ஒரு நேர்காணலில் பேசியிருந்தார் தேவா.

– இது, பிபிசிக்காக கலெக்டிவ் நியூஸ்ரூம் வெளியீடு