லாரி தீப்பிடித்த சம்பவத்தைத் தொடர்ந்து, சம்பந்தப்பட்ட கூரியர் நிறுவனத்தின் பாதுகாப்பு மேலாளர் பி. சூர்யா, மதுரை மாவட்ட காவல் கண்காணிப்பாளரிடம் புகார் அளித்துள்ளார்.

அந்தப் புகாரில், “தேவாரம் பகுதியில் உள்ள விற்பனை அங்காடியிலிருந்து ரூ.2.56 கோடி மதிப்பிலான 162 ஏலக்காய் மூட்டைகள் மற்றும் 25 இதர சரக்குகள் லாரியில் ஏற்றப்பட்டிருந்தன. தீ விபத்துக்குப் பிறகு சரக்குகளை ஆய்வு செய்தபோது, 67 ஏலக்காய் மூட்டைகள் குறைவாக இருந்தன” என்று கூரியர் நிறுவனத்தின் பாதுகாப்பு மேலாளர் புகாரில் குறிப்பிட்டுள்ளார்.

குறைவாக இருந்த அந்த மூட்டைகள் தீயில் முழுமையாக எரிந்து சாம்பலானதற்கான அறிகுறிகள் இல்லை என்றும் அவர் தனது புகாரில் தெரிவித்துள்ளார்.

சரக்குகள் குறைவாக இருந்ததாகக் கூறப்படுவதுடன், லாரியில் பொருத்தப்பட்டிருந்த ஜிபிஎஸ் கருவிகள் தொடர்பாகவும் கூரியர் நிறுவனத்தின் புகாரில் சந்தேகங்கள் எழுப்பப்பட்டுள்ளன.

அந்த லாரியில் கூரியர் நிறுவனத்திற்குச் சொந்தமான ஒரு ஜிபிஎஸ் கருவியும், வாகன உரிமையாளருக்குச் சொந்தமான மற்றொரு ஜிபிஎஸ் கருவியும் பொருத்தப்பட்டிருந்ததாக அதில் கூறப்பட்டுள்ளது.

“இந்த இரண்டு கருவிகளின் இணைப்புகளும் தீ விபத்துக்கு முந்தைய நாளான நவம்பர் 2ஆம் தேதியே துண்டிக்கப்பட்டது. வாகன உரிமையாளரின் ஜிபிஎஸ் கருவி லாரியில் காணப்படவில்லை. இதனால், சரக்குகள் வேறு இடத்திற்கு மாற்றப்பட்டிருக்கலாம் அல்லது திருடப்பட்டிருக்கலாம் என்று நிறுவனம் சந்தேகிக்கிறது” என்று அந்த புகாரில் தெரிவிக்கப்பட்டுள்ளது.

தீ விபத்துக்குப் பிறகு லாரியைச் சம்பவ இடத்திலிருந்து அவனியாபுரத்தில் உள்ள நிறுவனக் கிளைக்குக் கொண்டு சென்றது குறித்தும் அந்த புகாரில் விளக்கமளிக்கப்பட்டுள்ளது.

லாரியைச் சம்பவ இடத்திலேயே நிறுத்தினால் மேலும் சேதம் ஏற்படக்கூடும் என்று காவல்துறையினர் அறிவுறுத்தியதன் அடிப்படையிலேயே அதை நிறுவனக் கிளைக்குக் கொண்டு சென்றதாக கூரியர் நிறுவன பாதுகாப்பு மேலாளர் தனது புகாரில் தெரிவித்துள்ளார்.

வாலாந்தூர் கண்மாய் கரை அருகே சரக்கு வாகனத்தில் தீப்பிடித்தது தொடர்பாக பாலகிருஷ்ணன் அளித்த புகாரின் பேரில், வாலாந்தூர் காவல் நிலையத்தில் தற்செயலான தீ விபத்து தொடர்பான பிரிவுகளின் கீழ் வழக்குப் பதிவு செய்யப்பட்டுள்ளது.

“விசாரணை தொடர்பாக, பாலகிருஷ்ணன் வழக்குடன் தொடர்புடைய சிசிடிவி பதிவுகளை ஆய்வு செய்ய விசாரணை அதிகாரிக்கு உதவ செக்கானூரணி காவல் நிலையத்திற்கு வந்துள்ளார். ஆரம்பக்கட்ட தகவலின்படி, இறந்த நபர் காவல் ஆய்வாளரின் அறையில் இருந்தபோது, காலை சுமார் 6.00 மணியளவில் கழிவறைக்குச் சென்றவர், கழிவறையில் தற்கொலைக்கு முயன்று மயக்க நிலையில் இருந்துள்ளார்.

உடனடியாக அவர் அவசர சிகிச்சைக்காக மதுரை அரசு இராஜாஜி மருத்துவமனைக்குக் கொண்டு செல்லப்பட்டு, அங்கு அவரைப் பரிசோதித்த மருத்துவர்கள் அவர் ஏற்கனவே உயிரிழந்துவிட்டதாகத் தெரிவித்துள்ளனர்.” என்று மதுரை மாவட்ட காவல்துறை வெளியிட்டுள்ள அறிக்கையில் தெரிவிக்கப்பட்டுள்ளது.

“இச்சம்பவம் தொடர்பான காவல் நிலைய சிசிடிவி காட்சிகள் பாதுகாக்கப்பட்டுள்ளன. பணியில் இருந்த காவல் நிலையப் பொறுப்பு அதிகாரியான காவல் ஆய்வாளர் மற்றும் தொடர்புடைய காவலர்கள் பணியிடை நீக்கம் செய்யப்பட்டுள்ளனர். வெளிப்படைத்தன்மை மற்றும் பாரபட்சமற்ற விசாரணையை உறுதி செய்யும் வகையில், இச்சம்பவம் குறித்து நீதித்துறை நடுவர் விசாரணை நடத்தப்பட்டு உள்ளது. மேலும், இவ்வழக்கின் விசாரணை சிபிசிஐடி பிரிவுக்கு மாற்றப்பட்டுள்ளது” என்று அதில் தெரிவிக்கப்படுகிறது.

பாலகிருஷ்ணனின் உயிரிழப்பு தொடர்பாகச் செக்கானூரணி பகுதியில் பொதுமக்கள் போராட்டத்தில் ஈடுபட்டனர். சுமார் 100க்கும் மேற்பட்ட அவரது உறவினர்கள் மற்றும் பொதுமக்கள் காவல் நிலையத்தை முற்றுகையிட்டனர். இந்த சம்பவம் குறித்த உண்மையான தகவல்களை வெளியிட வேண்டும் என்றும், இதற்கு பொறுப்பான காவல்துறையினர் மீது நடவடிக்கை எடுக்க வேண்டும் என்று அவர்கள் வலியுறுத்தினர்.

இந்த போராட்டத்தின்போது பொதுமக்களுக்கும் காவல்துறையினருக்கும் இடையே வாக்குவாதம் ஏற்பட்டது. இதனால் அப்பகுதியில் கூடுதல் காவல்துறையினர் பாதுகாப்புப் பணியில் ஈடுபடுத்தப்பட்டனர்.

போராட்டத்திற்கு பிறகு செய்தியாளர்களிடம் பேசிய அகில இந்திய பார்வர்ட் பிளாக் கட்சியின் மாவட்டத் தலைவர் மணிகண்டன், காவல் நிலையத்தில் பாலகிருஷ்ணன் உயிரிழந்தது குறித்து வெளிப்படையான விசாரணை நடத்தப்பட வேண்டும் என்று வலியுறுத்தினார். பாலகிருஷ்ணனின் உயிரிழப்புக்கான உண்மையான காரணம் தெரியும்வரை அவரது உடலைப் பெற்றுக்கொள்ள மாட்டோம் என்று அவர் திட்டவட்டமாக கூறினார்.

மதுரை அரசு மருத்துவமனையில் செய்தியாளர்களிடம் பேசிய பாலகிருஷ்ணனின் மனைவி, நவம்பர் 13ஆம் தேதி இரவு தனது கணவர் தொலைபேசியில் தொடர்புகொண்டு பேசியதாகத் தெரிவித்தார்.

“என் மீது வழக்குப் பதிவு செய்யப் போவதாகக் கூறுகிறார்கள் என்று நேற்று இரவு என்னிடம் தெரிவித்தார். எதுவாக இருந்தாலும் பார்த்துக் கொள்ளலாம் என்று அவருக்கு தைரியம் கூறினேன். ஆனால், காலையில் காவல் நிலையத்திலிருந்து என்னைத் தொடர்புகொண்டு, என் கணவர் இறந்துவிட்டதாகக் கூறினார்கள்” என்றார்.

“தற்கொலை செய்துகொள்ளும் அளவுக்கு அவர் கோழை இல்லை. காவல் நிலையத்தில் என்ன நடந்தது என்பதை நாங்கள் தெரிந்துகொள்ள வேண்டும். என் கணவரின் உயிரிழப்புக்கு நீதி வேண்டும்” என்றும் அவர் தெரிவித்தார்.

பாலகிருஷ்ணனின் வழக்கறிஞர் பாண்டியராஜன், அவரது உயிரிழப்பு தொடர்பாகப் பல்வேறு சந்தேகங்களை எழுப்பியுள்ளார்.

“மற்ற ஓட்டுநர்கள் அனைவரையும் அனுப்பிவிட்டார்கள். என்னை மட்டும் காவல் நிலையத்தில் அமர வைத்திருக்கிறார்கள் என்று நேற்று இரவு பாலகிருஷ்ணன் என்னிடம் தொலைபேசியில் தெரிவித்தார்” என்று பாண்டியராஜன் கூறினார்.

இரவு வரை தொலைபேசியில் பேசிக் கொண்டிருந்த பாலகிருஷ்ணன், மறுநாள் காலையில் உயிரிழந்துவிட்டதாகக் கூறப்படுவது சந்தேகத்தை ஏற்படுத்துவதாகவும் அவர் தெரிவித்தார்.

இதுகுறித்து தென்மண்டல காவல்துறை ஐஜி விஜயேந்திர பிதாரி கூறுகையில், காவல் நிலையத்தில் பதிவான சிசிடிவி காட்சிகளை ஆய்வு செய்வதன் மூலம் சம்பவம் நடைபெற்ற விதம் குறித்து மேலும் தெளிவு கிடைக்கும் என்று தெரிவித்தார்.

பாலகிருஷ்ணனின் உடல் உடற்கூறாய்வுக்காக மதுரை அரசு ராஜாஜி மருத்துவமனையில் வைக்கப்பட்டுள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு