சென்னைக்கு கிழக்கு – வடகிழக்கே சுமார் 260 கிலோமீட்டர் தொலைவிலும், ஆந்திரப் பிரதேசத்தின் நெல்லூருக்குக் கிழக்கு-தென்கிழக்கே 290 கிலோமீட்டர் தொலைவிலும் புயல் மையம் கொண்டிருந்தது.

மச்சிலிப்பட்டினத்துக்கு தென்கிழக்கே 320 கிலோமீட்டர், காவலிக்கு தென்கிழக்கே 310 கிலோமீட்டர், ஓங்கோலுக்கு தென்கிழக்கே 330 கிலோமீட்டர் தொலைவிலும் அது இருந்தது. விசாகப்பட்டினத்துக்கு தெற்கே சுமார் 470 கிலோமீட்டர் தொலைவில் புயல் நிலைகொண்டிருந்தது.

தொடர்ந்து வடமேற்கு திசையில் நகரும் முரசு புயல், நவம்பர் 2-ஆம் தேதி இரவு 11.30 மணிக்கும் நவம்பர் 3-ஆம் தேதி அதிகாலை 4 மணிக்கும் இடைப்பட்ட நேரத்தில் தெற்கு ஆந்திரக் கடற்கரையைக் கடக்க வாய்ப்புள்ளது.

நெல்லூருக்கும் நரசபூருக்கும் இடையே, ஓங்கோலுக்கு அருகில் கரையைக் கடக்கக்கூடும் என்று வானிலை ஆய்வு மையம் கணித்துள்ளது.

அப்போது மணிக்கு 100 முதல் 110 கிலோமீட்டர் வேகத்தில் காற்று வீசக்கூடும். இடையிடையே காற்றின் வேகம் மணிக்கு 120 கிலோமீட்டர் வரை அதிகரிக்கலாம்.

புயல் கரையைக் கடக்கும் பகுதிகளில் பலத்த காற்றுடன் கனமழை பெய்யக்கூடும். நவம்பர் 2, 3 ஆகிய தேதிகளில் கடலோர ஆந்திரப் பிரதேசத்தின் பல இடங்களில் மிதமானது முதல் கனமழை வரை பெய்ய வாய்ப்புள்ளது. சில இடங்களில் மிகக் கனமழையும், ஓரிரு இடங்களில் அதி கனமழையும் பெய்யக்கூடும். நவம்பர் 4ஆம் தேதியும் சில இடங்களில் கனமழை பெய்யலாம்.

நெல்லூர், பிரகாசம், பாபட்லா, கிருஷ்ணா உள்ளிட்ட கடலோர மாவட்டங்களில் புயலின் தாக்கம் அதிகமாக இருக்கக்கூடும். தெற்கு ஆந்திராவின் தாழ்வான கடலோரப் பகுதிகளில் கடல் நீர் புகும் அபாயமும் உள்ளது.

முரசு புயல் தெற்கு ஆந்திராவை நோக்கி நகர்ந்தாலும், அதன் தாக்கத்தால் தமிழகத்தின் வட மாவட்டங்களில் மழை பெய்யக்கூடும் என வானிலை ஆய்வு மையம் தெரிவித்துள்ளது.

நவம்பர் 2-ஆம் தேதிக்கான மாவட்ட வாரியான எச்சரிக்கையின்படி, சென்னை மற்றும் திருவள்ளூர் மாவட்டங்களுக்கு மிகக் கனமழைக்கான ஆரஞ்சு எச்சரிக்கை விடுக்கப்பட்டுள்ளது.

வேலூர், காஞ்சிபுரம், செங்கல்பட்டு, நீலகிரி மாவட்டங்களுக்கு கனமழைக்கான மஞ்சள் எச்சரிக்கை விடுக்கப்பட்டுள்ளது.

தமிழகத்தின் பல இடங்களில் லேசானது முதல் மிதமான மழை பெய்ய வாய்ப்புள்ளது. சில இடங்களில் கனமழை முதல் மிகக் கனமழை வரை பெய்யக்கூடும். நவம்பர் 3-ஆம் தேதியும் தமிழகத்தின் பல பகுதிகளில் மழை தொடரலாம் எனக் கணிக்கப்பட்டுள்ளது.

கனமழை எச்சரிக்கை காரணமாக சென்னை மற்றும் திருவள்ளூர் மாவட்டங்களில் பள்ளி, கல்லூரிகளுக்கு விடுமுறை அறிவிக்கப்பட்டுள்ளது.

வடக்கு தமிழ்நாடு மற்றும் புதுச்சேரி கடலோரப் பகுதிகளில் நவம்பர் 1-ஆம் தேதி பிற்பகல் முதல் காற்றின் வேகம் அதிகரிக்கத் தொடங்கியுள்ளது. நவம்பர் 2-ஆம் தேதி மணிக்கு 55 முதல் 65 கிலோமீட்டர் வேகத்திலும், இடையிடையே 75 கிலோமீட்டர் வேகத்திலும் காற்று வீசக்கூடும் என வானிலை ஆய்வு மையம் தெரிவித்துள்ளது

நவம்பர் 2-ஆம் தேதி மாலை முதல் நவம்பர் 3-ஆம் தேதி காலை வரை காற்றின் வேகம் மணிக்கு 60 முதல் 70 கிலோமீட்டராகவும், அவ்வப்போது 80 கிலோமீட்டராகவும் அதிகரிக்க வாய்ப்புள்ளது. நவம்பர் 3-ஆம் தேதி பிற்பகல் முதல் காற்றின் வேகம் படிப்படியாகக் குறைந்து மணிக்கு 40 முதல் 50 கிலோமீட்டராகவும், அதிகபட்சம் 60 கிலோமீட்டராகவும் இருக்கக்கூடும்.

தமிழ்நாடு பேரிடர் அபாயக் குறைப்பு முகமையின் கூற்றுப்படி நவம்பர் 1-ஆம் தேதி பிற்பகல் முதல் நவம்பர் 4-ஆம் தேதி காலை வரை வடக்கு தமிழகக் கடலோரப் பகுதிகளிலும் புதுச்சேரியிலும் கடல் மிகக் கொந்தளிப்பாக இருக்கும் என எச்சரிக்கப்பட்டுள்ளது.

இந்தக் காலகட்டத்தில் 4 முதல் 6 மீட்டர் உயரம் வரை அலைகள் எழக்கூடும். கடல் கொந்தளிப்பு காரணமாகப் பார்வைத்திறனும் குறைய வாய்ப்புள்ளது. நவம்பர் 4-ஆம் தேதிக்குப் பிறகு கடல் நிலைமை படிப்படியாகச் சீராகும் என எதிர்பார்க்கப்படுகிறது.

இதனால் வடக்கு தமிழகக் கடலோரப் பகுதிகள், புதுச்சேரி மற்றும் தென்மேற்கு வங்கக்கடல் பகுதிகளில் நவம்பர் 4-ஆம் தேதி காலை வரை மீனவர்கள் கடலுக்குச் செல்ல வேண்டாம் என்று அறிவுறுத்தப்பட்டுள்ளனர்.

மீன்பிடிப் பணிகள் அனைத்தையும் முழுமையாக நிறுத்தி வைக்குமாறும் தெரிவிக்கப்பட்டுள்ளது.

ஏற்கெனவே ஆழ்கடலில் மீன்பிடித்துக் கொண்டிருக்கும் மீனவர்கள் உடனடியாக அருகிலுள்ள துறைமுகம் அல்லது கரைக்குத் திரும்ப அரசு அறிவுறுத்தியுள்ளது.

புயல் மற்றும் கனமழையை முன்னிட்டு பொதுமக்கள் சில முன்னெச்சரிக்கை நடவடிக்கைகளை மேற்கொள்ள வேண்டும் என்று தமிழக அரசு அறிவுறுத்தியுள்ளது. மேலும் பொதுமக்களுக்கான வழிகாட்டுதல்கள்களையும் வெளியிட்டுள்ளது.

புயல் தொடர்பான அவசர உதவி தேவைப்படுவோர் மாநில அவசர உதவி எண்ணான 1070 அல்லது மாவட்ட அவசர உதவி எண்ணான 1077 ஆகியவற்றைத் தொடர்புகொள்ளலாம் என தமிழக அரசு கூறியுள்ளது.

புயலின் நகர்வு, காற்றின் வேகம், மழை எச்சரிக்கை ஆகியவற்றில் மாற்றங்கள் ஏற்படக்கூடும் என்பதால், பொதுமக்கள் இந்திய வானிலை ஆய்வு மையம் மற்றும் மாவட்ட நிர்வாகங்கள் வெளியிடும் அறிவிப்புகளைத் தொடர்ந்து கவனிக்க வேண்டும் எனவும் கடலோரப் பகுதிகளில் வசிப்பவர்கள் உள்ளூர் அதிகாரிகள் வழங்கும் பாதுகாப்பு அறிவுறுத்தல்களைப் பின்பற்ற வேண்டும் எனவும் தமிழக அரசு கூறியுள்ளது.

– இது, பிபிசிக்காக கலெக்டிவ் நியூஸ்ரூம் வெளியீடு