பாக்டீரியா ஸ்போர்கள் விண்வெளியில் ஆயிரக்கணக்கான ஆண்டுகள் உயிர்வாழும் சாத்தியம் இருப்பதாக சில கோட்பாடுகள் தெரிவிக்கின்றன என்று முசிலோவா கூறுகிறார். ஆனால், சர்வதேச விண்வெளி நிலையத்தில் விஞ்ஞானிகள் இவற்றை நீண்ட காலமாகப் பரிசோதிக்கவில்லை என்பதால், இத்தகைய கோட்பாடுகள் அனுமான நிலையிலேயே உள்ளன என்றும் அவர் குறிப்பிடுகிறார்.

விண்வெளியில் இருக்கக்கூடிய நுண்ணுயிர் உயிரினங்களை பூமிக்குக் கொண்டு வர முடியுமா என்பதையும், அவை ஏதேனும் வகையில் நமக்கு ஆபத்தானவையாக இருந்தால் நம்மை நோய்வாய்ப்படுத்துமா என்பதையும் விஞ்ஞானிகள் கண்டறிய வேண்டியுள்ளது. இது பூமிக்கு மற்ற கோளிலிருந்து வரும் மாசுபாடு (backwards contamination) என்று அழைக்கப்படுகிறது.

செவ்வாய் கிரகத்தின் மேற்பரப்பிலிருந்து பெறப்படும் மாதிரிகள் பூமியில் பாதிப்பை ஏற்படுத்தும் ஆபத்து ‘மிகவும் குறைவு’ என்று நிபுணர் குழுக்கள் ஏற்கெனவே தெரிவித்துள்ளன. இருந்தபோதிலும், நாசா போன்ற விண்வெளி நிறுவனங்கள் இந்த அச்சுறுத்தலை ‘மிகவும் தீவிரமாக’ எடுத்துக்கொள்வதாக முசிலோவா கூறுகிறார்.

உதாரணமாக, தற்போது நிறுத்திவைக்கப்பட்டுள்ள மார்ஸ் சாம்பிள் ரிட்டர்ன்’ (Mars Sample Return) திட்டத்தில் இதற்கான முன்னெச்சரிக்கைத் திட்டங்கள் இருந்தன. நாசாவும் இஎஸ்ஏ-வும் இணைந்து மேற்கொண்ட இந்தத் திட்டத்தின் மூலம், செவ்வாய் கிரகத்தின் மாதிரிகளை முதல்முறையாக பூமிக்குக் கொண்டு வரத் திட்டமிடப்பட்டது.

“பூமியில் பிரத்யேக ‘கட்டுப்பாட்டு ஆய்வகங்களை’ அமைத்து, அங்கு இந்த மாதிரிகளை முதலில் சேமித்து, பிறகு பரிசோதிக்க அவர்கள் திட்டமிட்டிருந்தனர்,” என்று முசிலோவா குறிப்பிடுகிறார்.

இந்தத் திட்டத்தில் பணியாற்றிய விஞ்ஞானிகளில் ஒருவர் சில்வியோ சினிபால்டி ஆவார். இவர் இஎஸ்ஏ-வின் கோள் பாதுகாப்பு அதிகாரி.

மாதிரிகள் மட்டுமே அச்சுறுத்தலாகக் கருதப்படவில்லை என அவர் கூறுகிறார்.

“விண்கலத்தின் வெளிப்புறத்தில் மாசுபாட்டை ஏற்படுத்தக்கூடிய துகள்கள் சென்றடைய வாய்ப்புள்ளதா என்பதையும் நாங்கள் ஆய்வு செய்தோம். அவை பூமியின் வளிமண்டலத்துக்கு அருகில்கூட செல்லக்கூடாது என்று நாங்கள் விரும்பினோம்,” என்று சினிபால்டி விளக்குகிறார்.

நுண்ணுயிரிகள் விண்வெளியில் உயிர்வாழ முடியும் என்றால், நாம் அவற்றை அங்கு எடுத்துச் செல்கிறோமா என்பதையும் சிந்திக்க வேண்டும் என, அமெரிக்காவின் பிட்ஸ்பர்க் பல்கலைக்கழக நுண்ணுயிரியல் ஆய்வாளரும் முன்னாள் நாசா விண்வெளி வீரருமான கேட் ரூபின்ஸ் கூறுகிறார்.

மனிதர்கள் விண்வெளிக்குச் செல்லும்போது தவிர்க்க முடியாமல் நுண்ணுயிரிகளையும் தங்களுடன் எடுத்துச் செல்கின்றனர். மேலும், சுற்றுச்சூழலில் ஏற்படும் மாற்றங்களை உணரும் தனித்துவமான திறன் நுண்ணுயிரிகளுக்கு உள்ளது என்று ரூபின்ஸ் குறிப்பிடுகிறார்.

“மன அழுத்தம் போன்ற விஷயங்களுக்கு அவை மிகவும் உணர்திறன் கொண்டவை. விண்வெளிப் பயணச் சூழலும், குறைந்த ஈர்ப்பு விசை கொண்ட சூழலும் அதிகளவு அழுத்தம் நிறைந்தவை,” என்று அவர் கூறுகிறார்.

குறைந்த ஈர்ப்பு விசைக்கு உட்படுத்தப்பட்ட சில பாக்டீரியாக்களில், நோயை ஏற்படுத்தும் திறனுடன் தொடர்புடைய மரபணுக்கள் செயல்படத் தொடங்குவதாக ஆய்வுகள் கண்டறிந்துள்ளன.

“இது சற்று கவலையளிக்கிறது… அவை சற்று அதிக நோய்க்கிருமித் தன்மை கொண்டவையாக மாறுகின்றன,” என்று ரூபின்ஸ் குறிப்பிடுகிறார்.

விண்வெளிப் பயணம் மனிதர்களின் நோய் எதிர்ப்பு மண்டலத்தையும் எதிர்மறையாகப் பாதிக்கக்கூடும் என்று சில ஆய்வுகள் காட்டியுள்ளன.

ஷிங்கிள்ஸ் நோயுடன் தொடர்புடையவை உள்பட செயலற்ற நிலையில் இருந்த வைரஸ்கள், விண்வெளியில் சில சந்தர்ப்பங்களில் மீண்டும் செயல்படத் தொடங்கியதை நாசா கண்டறிந்துள்ளது. “இதன் பொருள் நோய் எதிர்ப்பு மண்டலம் பாதிக்கப்பட்டிருக்கலாம்…அந்த வைரஸ் மீண்டும் செயல்படத் தொடங்கியிருக்கலாம்,” என்று ரூபின்ஸ் கூறுகிறார்.

நுண்ணுயிரிகளை விண்வெளிக்குக் கொண்டு செல்வது நம்முடைய அறிவியல் ஆய்வுகளுக்கும் அச்சுறுத்தலாக இருக்கலாம் என முசிலோவா கூறுகிறார். ஏனெனில், நாம் ஆய்வு செய்ய விரும்பும் விஷயத்தையே நாமே மாசுபடுத்திவிடக்கூடும்.

“செவ்வாய் கிரகத்தில் உயிர்கள் வாழ்வதற்கு ஏற்ற சூழ்நிலைகள் எப்போதாவது இருந்தனவா என்பதை ஆய்வு செய்யும் நோக்கில் பல்வேறு ஆய்வுக் கருவிகளை நாம் செவ்வாய் கிரகத்துக்கு அனுப்பி வருகிறோம்,” என்று அவர் கூறுகிறார்.

“சில நுண்ணுயிரிகள் பூமியிலிருந்து செவ்வாய் வரை ‘இலவசமாக பயணம் செய்து சென்றிருப்பது’ கிட்டத்தட்ட உறுதி. ஒரு நாள் செவ்வாய் கிரகத்தில் உயிரினங்களைக் கண்டுபிடித்தால், அது பூமியிலிருந்து வந்த மாசுபாடா என்பதை முதலில் நாம் உறுதி செய்ய வேண்டியிருக்கும்.”

இந்த ஆபத்தைக் குறைப்பது, ‘பிற கோள்களில் நுண்ணுயிரிகள் பெருகுவதைத் தடுப்பதற்கும்’ உதவும் என்று சினிபால்டி கூறுகிறார்.

விண்கலத்தின் வடிவமைப்பும் இதில் முக்கிய பங்கு வகிக்கிறது.

இஎஸ்ஏ-வின் எக்ஸோமார்ஸ் ரோவரான ‘ரோசலிண்ட் ஃபிராங்க்ளின்’ 2028-ஆம் ஆண்டு ஏவப்படத் திட்டமிடப்பட்டுள்ளது. மாசுபாட்டின் அபாயத்தைக் குறைக்கும் வகையில் அது வடிவமைக்கப்பட்டு வருகிறது.

இஎஸ்ஏ-வின் கூற்றுப்படி, அது மிகவும் தூய்மையான சூழலில் உருவாக்கப்பட்டது. உலர் வெப்பத்தின் மூலம் நுண்ணுயிரிகளைக் குறைக்கும் முறையும், புற ஊதா மற்றும் காமா கதிர்வீச்சும் பயன்படுத்தப்பட்டுள்ளன. இதன் மூலம், பாக்டீரியாக்களின் எண்ணிக்கையை முடிந்தவரை குறைக்க முடியும். எனினும், அவற்றை முற்றிலும் அகற்ற முடியாது.

“முழு ரோவரின் வெளிப்புறப் பரப்பிலும் 10,000-க்கும் குறைவான பாக்டீரியா ஸ்போர்கள் இருக்க வேண்டும் என்று நிர்ணயிக்கப்பட்டிருந்தது. பொதுவாக, ஒரு ஊசிமுனையின் எட்டில் ஒரு பங்கு அளவிலான பகுதியில் காணப்படும் எண்ணிக்கை அது,” என்று எக்ஸோமார்ஸ் பொறியாளர் பால் மீச்சம் கூறுகிறார்.

“நாங்கள் உண்மையில் அந்த எண்ணிக்கையில் 10% மட்டுமே இருக்கும் அளவை எட்டினோம்,” என்று அவர் கூறுகிறார்.

இந்த ஆண்டு ஆகஸ்ட் மாதம், பூமியில் காணப்படும் சில நுண்ணுயிரிகள் நிலவின் தென் துருவப் பகுதியில் நிழலில் உள்ள சிறிய இடுக்குகளிலும் பிளவுகளிலும் உயிர்வாழக்கூடும் என்று நாசா விஞ்ஞானிகள் கண்டறிந்தனர்.

விண்வெளியில் நுண்ணுயிரிகள் எவ்வாறு செயல்படுகின்றன என்பதை நன்கு புரிந்துகொள்ள வேண்டியதன் அவசியத்தை இந்தக் கண்டுபிடிப்புகள் எடுத்துரைத்துள்ளதாக அவர்கள் தெரிவித்தனர்.

விண்வெளியில் நுண்ணுயிரிகள் உயிர்வாழக்கூடியவை அல்லது அதிக நோய்க்கிருமித் தன்மை கொண்டவையாக மாறக்கூடியவை என்பதுடன், விண்வெளிப் பயணம் மனிதர்களின் நோய் எதிர்ப்பு மண்டலத்தைப் பலவீனப்படுத்தக்கூடும் என்பதும் சேரும்போது, அவை விண்வெளி வீரர்களின் உடல்நலத்தையும் விண்வெளிப் பயணங்களின் வெற்றியையும் பாதிக்கக்கூடும்.

பூமியிலிருந்து நீண்ட காலத்துக்குப் பயணம் செய்ய மனிதர்கள் திட்டமிடும் நிலையில், இந்தப் பிரச்னைகள் மேலும் முக்கியத்துவம் பெறுகின்றன. சர்வதேச விண்வெளி நிலையத்தில் ஒருவர் நோய்வாய்ப்பட்டால், மருத்துவ சிகிச்சைக்காக 24 மணி நேரத்துக்குள் அவரை பூமிக்குத் திருப்பி அனுப்ப முடியும். ஆனால் நிலவில் இருந்து திரும்புவதற்கு பல நாட்கள் ஆகும்.

“இது பெரிய விஷயமாகத் தெரியாமல் இருக்கலாம், ஆனால் உங்களுக்கு தீவிரமான தொற்று ஏற்பட்டால், அது உண்மையில் ஒரு பிரச்னையாக இருக்கக்கூடும்,” என்கிறார் ரூபின்ஸ்.

பிபிசி உலக சேவையின் கிரவுட்சயின்ஸ் நிகழ்ச்சியின் ஒரு அத்தியாயத்தை அடிப்படையாகக் கொண்டது. கூடுதல் தகவல்கள்- டெய்சி ஸ்டீபன்ஸ்.

– இது, பிபிசிக்காக கலெக்டிவ் நியூஸ்ரூம் வெளியீடு