കരുനാഗപ്പള്ളി: ലോകത്തിലെ ആദ്യത്തെ ‘ഗ്ലോബല് കോണ്ഷ്യസ് ഫുഡ് സിസ്റ്റംസ് ഉച്ചകോടി’ക്ക് ഭൂട്ടാനിലെ പാറോയില് തുടക്കമായി. മാതാ അമൃതാനന്ദമയീ ദേവി വീഡിയോ കോണ്ഫറന്സ് വഴി മുഖ്യപ്രഭാഷണം നടത്തി.
നയങ്ങളും നിയമങ്ങളും കൊണ്ടുമാത്രം സുസ്ഥിര വികസനം സാധ്യമല്ലെന്നും മനുഷ്യന്റെ മനോഭാവത്തില് മാറ്റം വരണമെന്നും അമ്മ വ്യക്തമാക്കി. ലോകത്തില് രണ്ടുതരത്തിലുള്ള ദാരിദ്ര്യമുണ്ട്. ഭക്ഷണം, വസ്ത്രം, പാര്പ്പിടം എന്നിവയുടെ അഭാവം മൂലമുള്ള ദാരിദ്ര്യവും സ്നേഹത്തിന്റെയും അനുകമ്പയുടെയും അഭാവം മൂലമുള്ള ദാരിദ്ര്യവും. ഇതില് രണ്ടാമത്തെ ദാരിദ്ര്യത്തിനാണ് ആദ്യം പരിഹാരം കാണേണ്ടത്. ഹൃദയത്തില് സ്നേഹവും കരുണ്യവും വളര്ത്തിയെടുത്ത് മറ്റുള്ളവരുടെ വിശപ്പും പ്രയാസങ്ങളും പരിഹരിക്കാന് സമൂഹം മുന്നോട്ടുവരുമെന്നും അമ്മ പറഞ്ഞു.
ഭൂട്ടാന് സര്ക്കാരും യുണൈറ്റഡ് നേഷന്സ് ഡെവലപ്മെന്റ് പ്രോഗ്രാമും കോണ്ഷ്യസ് ഫുഡ് സിസ്റ്റംസ് അലയന്സും സംയുക്തമായി സംഘടിപ്പിക്കുന്ന ഉച്ചകോടിയില് 65 രാജ്യങ്ങളില് നിന്നായി നാനൂറോളം പ്രതിനിധികള് പങ്കെടുക്കുന്നുണ്ട്. ഭക്ഷ്യ ഉത്പാദനത്തിലും വിതരണത്തിലും ആധ്യാത്മിക മൂല്യങ്ങള് കൊണ്ടുവരുന്നതിനൊപ്പം മനുഷ്യന്റെ മാനസിക വികാസം, സുസ്ഥിരത എന്നിവ സംയോജിപ്പിക്കുന്നതില് ശ്രദ്ധ കേന്ദ്രീകരിക്കുക എന്ന ലക്ഷ്യത്തോടെയാണ് ഉച്ചകോടി സംഘടിപ്പിക്കുന്നത്.
യുഎന് മുന് സെക്രട്ടറി ജനറല് ബാന് കി മൂണ്, ഭൂട്ടാന് പ്രധാനമന്ത്രി ത്സെറിങ് തോബ്ഗെ, ശ്രീലങ്കന് പ്രധാനമന്ത്രി ഹരിണി അമരസൂരിയ എന്നിവരും പങ്കെടുത്തു. ഉച്ചകോടി ഇന്ന് സമാപിക്കും.