ഹൈദരാബാദ് : ഇന്ത്യൻ പൗരത്വത്തിന് വേണ്ടി യുഎസ് പൗരത്വം ഉപേക്ഷിക്കാൻ തയ്യാറായി 94 കാരി കോണ്ട്രഗുണ്ട മഹാലക്ഷ്മി . ആന്ധ്രാപ്രദേശിൽ നിന്നുള്ള മഹാലക്ഷ്മി 2000 മുതൽ യുഎസ് പൗരത്വമുള്ളവരാണെങ്കിലും, ഇനിയുള്ള കാലം സ്വന്തം രാജ്യത്ത് ജീവിക്കാനാണ് ഇഷ്ടപ്പെടുന്നത്.

ഈ ആഗ്രഹം നിറവേറ്റുന്നതിനായി അമേരിക്കൻ പൗരത്വം ഉപേക്ഷിക്കാനും അവർ തയ്യാറാണ്. ഒരു ഇന്ത്യക്കാരിയായി തന്റെ ഗ്രാമത്തിൽ സമാധാനപരമായി ജീവിച്ച് മരിക്കാൻ ആഗ്രഹിക്കുന്നുവെന്ന് മഹാലക്ഷ്മി പറയുന്നു. 2018 മുതൽ ഇന്ത്യയിലെ തന്റെ ഗ്രാമത്തിലാണ് അവർ താമസിക്കുന്നത്. അടുത്തിടെ, ഡോക്ടറായ മകനോടൊപ്പം, ബാപട്‌ല ജില്ലാ കളക്ടർ വിനോദ് കുമാറെ കാണാൻ അവർ എത്തിയിരുന്നു.

അവരുടെ പ്രായം കണക്കിലെടുത്ത്, ആവശ്യമായ എല്ലാ നടപടിക്രമങ്ങളും പൂർത്തിയാക്കുന്നത് ഭരണകൂടം വേഗത്തിലാക്കി. മഹാലക്ഷ്മിക്ക് നിലവിൽ OCI കാർഡ് ഉണ്ട്. അവരുടെ എല്ലാ രേഖകളും പരിശോധിച്ച ശേഷം, ജില്ലാ ഭരണകൂടം കൂടുതൽ അംഗീകാരത്തിനായി ആഭ്യന്തര മന്ത്രാലയത്തിന് (MHA) അയച്ചിട്ടുണ്ട്. ഇന്ത്യൻ പൗരത്വം അനുവദിക്കുന്നത് സംബന്ധിച്ച അന്തിമ തീരുമാനം ഇനി ആഭ്യന്തര മന്ത്രാലയത്തിന്റേതാണ്.