മുംബൈ: വിഎഫ് എക്സ് മാജികും അനവദ്യസംഗീതവും മത്സരിച്ചുള്ള അഭിനയവും നിറയുന്ന ‘രാമായണ’ ആദ്യ മൂന്ന് ദിവസത്തിനുള്ളിൽ ഇന്ത്യയിൽ 150 കോടി രൂപയ്‌ക്കപ്പുറം വരുമാനം നേടി കുതിയ്‌ക്കുന്നു.  ദീപാവലിയ്‌ക്ക് ഇന്ത്യയിലും പുറത്തും തീയറ്ററുകള്‍ നിറഞ്ഞുകവിയുകയാണ്. ത്രീഡിയില്‍ ബ്രഹ്മാണ്ഡ വിഎഫ് എക്സില്‍ ഒരുക്കിയ ചിത്രം വിസ്മയാനുഭവമാണ് പ്രേക്ഷകര്‍ക്ക് സമ്മാനിക്കുന്നത്.

രാമനും രാവണനുമായി രണ്‍ബീര്‍ കപൂറും യഷും മത്സരിച്ചഭിനയിക്കുന്ന നിതേഷ് തിവാരി സംവിധാനം ചെയ്ത ഈ ബൃഹത്തായ ഇതിഹാസ ചിത്രത്തെ വാഴ്‌ത്തിപ്പാടുകയാണ് സമൂഹമാധ്യമങ്ങളും സിനിമാവിമര്‍ശകരും. നവംബർ 5-ന് റിലീസ് ചെയ്ത ചിത്രം വിവിധ ഭാഷകളിൽ പ്രദർശനത്തിനെത്തിയിട്ടുണ്ട്. രണ്ട് ഭാഗങ്ങളിലായി ഒരുങ്ങുന്ന ഈ ചിത്രത്തിന്റെ നിർമ്മാണച്ചെലവ് ഏകദേശം 4000 കോടി രൂപയാണ്. ഇതില്‍ ഒന്നാം ഭാഗമാണ് ഇപ്പോള്‍ പുറത്തിറങ്ങിയിരിക്കുന്നത്. ഇതില്‍ രാമരാവണ യുദ്ധം ഇല്ല. അതിന് വഴിയൊരുങ്ങുന്ന ശ്രീരാമന്റെയും രാവണന്റെയും ആദ്യകാലജീവിതമാണ് രാമായണ ഒന്നാം ഭാഗം പറയുന്നത്. ഹനുമാന്റെ കടന്നുവരവോടെ ഒന്നാം ഭാഗം അവസാനിക്കുന്നു.

ഇന്ത്യയില്‍ ഹിന്ദി, കന്നഡ, തെലുങ്ക്, തമിഴ് വിപണികളിൽ ചിത്രം മികച്ച പ്രകടനം കാഴ്ചവെക്കുന്നുണ്ട്. റിലീസ് ചെയ്തതുമുതൽ ബോക്സ് ഓഫീസിലെ ചിത്രത്തിന്റെ പ്രകടനമാണ് ഏവരും ഉറ്റുനോക്കുന്നത്. ചിത്രത്തിന്റെ ഓരോ ദിവസത്തെയും വരുമാന കണക്കുകൾ താഴെ നൽകുന്നു.

രാമായണ ഒന്നാം ഭാഗം: മൂന്ന് ദിവസത്തെ ഇന്ത്യയിലെ വരുമാനമെത്ര?

ട്രേഡ് ട്രാക്കറായ ‘സാക്‌നിൽക്’ (Sacnilk) നൽകുന്ന പ്രാഥമിക കണക്കുകൾ പ്രകാരം, മൂന്നാം ദിവസമായ ശനിയാഴ്ച (നവംബർ 7) ഇന്ത്യയിൽ 42.57 കോടി രൂപയാണ് (നെറ്റ് കളക്ഷൻ) ചിത്രം നേടിയത്. 16,311 ഷോകളിലായി പ്രദർശിപ്പിക്കുന്ന ചിത്രത്തിന് 35.8% ഒക്യുപൻസി (പ്രേക്ഷക സാന്നിധ്യം) രേഖപ്പെടുത്തി. ഈ ദിവസത്തെ ഇന്ത്യയിലെ മൊത്തം വരുമാനം (ഗ്രോസ് കളക്ഷൻ) 50.23 കോടി രൂപയാണ്. ഇതൊരു ഏകദേശ കണക്കാണ്; കൃത്യമായ കണക്കുകൾ നവംബർ 8 രാവിലെ 11 മണിയോടെ ലഭ്യമാകും.
റിലീസ് ദിവസമായ വ്യാഴാഴ്ച (നവംബർ 5) 64.85 കോടി രൂപ നെറ്റ് കളക്ഷനും 77.50 കോടി രൂപ ഗ്രോസ് കളക്ഷനുമാണ് ചിത്രം നേടിയത്. രണ്ടാം ദിവസമായ വെള്ളിയാഴ്ച (നവംബർ 6) വരുമാനം 48.05 കോടി രൂപ (നെറ്റ്), 57.30 കോടി രൂപ (ഗ്രോസ്) എന്നിങ്ങനെയാണ്. പുതിയ കണക്കുകൾ പ്രകാരം, ഇന്ത്യയിൽ ചിത്രത്തിന്റെ മൂന്ന് ദിവസത്തെ ആകെ നെറ്റ് കളക്ഷൻ 155.47 കോടി രൂപയാണ്. ഗ്രോസ് കളക്ഷൻ 185.03 കോടി രൂപ.