ബെംഗളൂരു: ധര്‍മസ്ഥലക്കെതിരായ ഗൂഢാലോചന കേസില്‍ പ്രത്യേക അന്വേഷണ സംഘം (എസ്ഐടി) അന്തിമ അന്വേഷണ റിപ്പോര്‍ട്ട് സമര്‍പ്പിച്ചു.

7,000 പേജുകളുള്ള ഈ റിപ്പോര്‍ട്ടിനൊപ്പം അന്വേഷണത്തിനിടെ പിടിച്ചെടുത്ത എല്ലാ വസ്തുക്കളും തെളിവുകളും സഹിതം എസ്ഐടി കോടതിയില്‍ സമര്‍പ്പിച്ചു. 1995 നും 2014 നും ഇടയില്‍ നിരവധി സ്ത്രീകളെയും പ്രായപൂര്‍ത്തിയാകാത്തവരെയും നിയമവിരുദ്ധമായി കൂട്ട ശവസംസ്‌കാരം നടത്താന്‍ തന്നെ നിര്‍ബന്ധിച്ചുവെന്ന് അവകാശപ്പെട്ട എന്‍. ചിന്നയ്യയുടെ ആരോപണങ്ങളെത്തുടര്‍ന്നാണ് കേസ് ദേശീയ ശ്രദ്ധ നേടുന്നത്. കേസ് ആദ്യം ധര്‍മസ്ഥല പോലീസും പിന്നീട് എസ്‌ഐടിയും അന്വേഷിക്കുകയായിരുന്നു. ചിന്നയ്യയുടേത് വ്യാജ വെളിപ്പെടുത്തലാണെന്ന് കണ്ടെത്തിയതോടെ കേസില്‍ ഇയാളെ പ്രതിചേര്‍ത്തു.

എന്നിരുന്നാലും കര്‍ണാടക സംസ്ഥാന വനിതാ കമ്മീഷന്റെ ഇടപെടലിനെത്തുടര്‍ന്ന്, മേഖലയില്‍ പതിറ്റാണ്ടുകളായി നടന്ന വിശദീകരിക്കപ്പെടാത്ത മരണങ്ങള്‍, തിരോധാനങ്ങള്‍, ലൈംഗിക പീഡന ആരോപണങ്ങള്‍ എന്നിവ അന്വേഷിക്കാന്‍ കര്‍ണാടക സര്‍ക്കാര്‍ 20 അംഗ പ്രത്യേക അന്വേഷണ സംഘം രൂപീകരിച്ചു. ധര്‍മസ്ഥലയെയും അതിന്റെ ഭരണകൂടത്തെയും അപകീര്‍ത്തിപ്പെടുത്താന്‍ സാമൂഹിക പ്രവര്‍ത്തകരും മറ്റുള്ളവരും തന്നെ സമ്മര്‍ദ്ദത്തിലാക്കുകയും തെറ്റായ ആരോപണങ്ങള്‍ ഉന്നയിക്കാന്‍ നിര്‍ബന്ധിക്കുകയും ചെയ്തുവെന്ന് പിന്നീട് ചിന്നയ്യ കര്‍ണാടക ഹൈക്കോടതിയില്‍ വെളിപ്പെടുത്തി. ഇയാള്‍ക്ക് പിന്നീട് മംഗളൂരു കോടതി ജാമ്യം അനുവദിക്കുകയും ചെയ്തു. ചിന്നയ്യയ്‌ക്ക് വ്യാജ ആരോപണം ഉന്നയിക്കാന്‍ പണം നല്‍കിയവരുടെ കൂട്ടത്തില്‍ നടന്‍ പ്രകാശ്‌രാജിന്റെ പേരും ഉള്‍പ്പെട്ടിരുന്നു. നിലവില്‍ ചിന്നയ്യയുടെ വ്യാജ വെളിപ്പെടുത്തലുമായി ബന്ധപ്പെട്ട അന്വേഷണം പുരോഗമിക്കുകയാണ്.