തിരുവനന്തപുരം: ജനാധിപത്യ മര്യാദയിൽ ഒരു സമരമുണ്ടായപ്പോൾ അതിന്റെ ധാർമികമായ ഉത്തരവാദിത്തം ഏറ്റെടുത്ത് ബിജെപി നേതാക്കള്‍ രാജിവെയ്‌ക്കുന്നത് ഞങ്ങളുടെ ജനാധിപത്യ മര്യാദയാണെന്ന് ബിജെപി സംസ്ഥാന സെക്രട്ടറി പി. ശ്യാം രാജ്.

“തൊണ്ണൂറുകളിൽ എൽ കെ അദ്വാനിജി എം പി ആയിരിക്കുമ്പോൾ ഹവാല ഇടപാടിൽ അദ്ദേഹത്തിന്റെ പേര് വന്നപ്പോൾ അദ്ദേഹം എം പി സ്ഥാനം രാജിവെച്ചു. “എന്നെ നാട്ടിലെ നിയമസംവിധാനങ്ങൾ കുറ്റവിമുക്തനാക്കാതെ ഞാൻ ഇനി പാർലമെന്‍റിന്റെ പടികയറില്ല” എന്ന് പറഞ്ഞ് എം പി സ്ഥാനം രാജിവെച്ച്, കോടതി കുറ്റവിമുക്തനാക്കിയതിനു ശേഷം മാത്രം വീണ്ടും ആ പടികയറിയ നേതാവുള്ള പ്രസ്ഥാനമാണ് ഞങ്ങളുടേത്. ഇവിടെ കർഷക സമരം നടന്നപ്പോഴും, ജനങ്ങൾക്ക് നിയമങ്ങളെക്കുറിച്ച് അസംതൃപ്തിയുണ്ടെന്ന് കണ്ടപ്പോൾ ആ നിയമങ്ങൾ പിൻവലിച്ചു. നീറ്റുമായി ബന്ധപ്പെട്ട് നടന്ന സമരത്തിന്റെ ഉത്തരവാദിത്തം ഏറ്റെടുത്തിട്ട് ധർമേന്ദ്ര പ്രധാൻ രാജിവെച്ചു. അത് ഞങ്ങളുടെ ജനാധിപത്യ മര്യാദയാണ്”.- പി. ശ്യാം രാജ് പറയുന്നു.

“ശബരിമല സമരം നടന്നുകൊണ്ടിരിക്കുകയാണല്ലോ. കഴിഞ്ഞ സർക്കാരിലെ ദേവസ്വം ബോർഡ് മന്ത്രി രാജിവെച്ചോ? മൂന്ന് ദേവസ്വം പ്രസിഡന്റുമാരാണ് അറസ്റ്റ് ചെയ്യപ്പെട്ടിട്ടുള്ളത്. ഓൾ ഇന്ത്യ പ്രീ മെഡിക്കൽ എൻട്രൻസ് ടെസ്റ്റിന്റെ ചോദ്യപേപ്പർ 2008-ൽ ചോർന്നപ്പോൾ അന്നത്തെ എച്ച് ആർ ഡി മന്ത്രി രാജിവെച്ചിരുന്നോ? 2012-ൽ എയിംസിന്റെ ചോദ്യപേപ്പർ ചോർന്നു. അന്നത്തെ എച്ച് ആർ ഡി മന്ത്രി രാജിവെച്ചിരുന്നോ? 2008-ൽ സി ബി എസ് ഇ പ്ലസ് ടുവിന്റെ ചോദ്യപേപ്പർ ചോർന്നു. അന്നത്തെ എച്ച് ആർ ഡി മന്ത്രി രാജിവെച്ചിരുന്നോ? ഒന്നും ചെയ്തിട്ടില്ല!- പി. ശ്യാം രാജ് പറയുന്നു.

മൂന്ന് തവണ സമരം ചെയ്യുന്നവരുമായി ചർച്ച നടത്തി. ബിജെപി യുടെ മുതിർന്ന നേതാവും കേന്ദ്ര മന്ത്രിസഭയിലെ തന്നെ മുതിർന്ന മന്ത്രിയുമായിട്ടുള്ള ജെ പി നഡ്ഡ അദ്ദേഹം നേരിട്ട് മൂന്നുതവണ സമരക്കാരുമായി സംസാരിച്ചു. വിദ്യാർത്ഥികളുടെ ആശങ്കകൾ കേൾക്കാൻ പ്രധാനമന്ത്രി ശ്രമിച്ചു. 10 വർഷം തടവും ഒരു കോടി രൂപ പിഴയും ചുമത്തുന്ന പുതിയ ബില്ല് അവതരിപ്പിക്കുന്നു, പുതിയ ബില്ല് കൊണ്ടുവരുന്നു. ഇതിൽ കൂടുതൽ നിങ്ങൾക്ക് എന്താണ് പറയാനുള്ളത്?- ശ്യാം രാജ് ചോദിക്കുന്നു.