• Sat. Nov 21st, 2026

24×7 Live News

Apdin News

നാഗർകോവിലിൽ ട്രെയിൻ കൊലപാതകം: യുവതിയെ ലൈംഗികമായി പീഡിപ്പിച്ച് കൊന്നു; 31-കാരൻ അറസ്റ്റിൽ

Byadmin

Nov 21, 2026



നാഗർകോവിൽ: റെയിൽവേ യാർഡിൽ അറ്റകുറ്റപ്പണികൾക്കായി നിർത്തിയിട്ടിരുന്ന ട്രെയിനിൽ യുവതിയെ ലൈംഗികമായി പീഡിപ്പിച്ച് കൊലപ്പെടുത്തിയ സംഭവത്തിൽ പ്രതി പിടിയിലായി. ചെമ്പകരാമൻപുത്തൂർ സ്വദേശി ജെ. അയ്യപ്പനെയാണ് (31) നാഗർകോവിൽ ജംഗ്ഷൻ റെയിൽവേ പോലീസ് വെള്ളിയാഴ്ച അറസ്റ്റ് ചെയ്തത്.

നവംബർ 11 മുതൽ അറ്റകുറ്റപ്പണികൾക്കായി യാർഡിൽ നിർത്തിയിട്ടിരുന്ന ട്രെയിനിലെ ഭിന്നശേഷിക്കാർക്കായുള്ള കോച്ചിൽ നിന്നാണ് നവംബർ 18-ന് അഴുകിയ നിലയിൽ യുവതിയുടെ മൃതദേഹം കണ്ടെത്തിയത്. സംഭവത്തിൽ കേസെടുത്ത റെയിൽവേ പോലീസ് ഇൻസ്പെക്ടർ കാതറിൻ സുജാതയുടെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ച് അന്വേഷണം ഊർജ്ജിതമാക്കിയിരുന്നു.

റെയിൽവേ സ്റ്റേഷനിലെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ പരിശോധനയാണ് കേസിൽ നിർണ്ണായകമായത്. നവംബർ 14-ലെ ദൃശ്യങ്ങളിൽ വെള്ള മുണ്ടും ഷർട്ടും ധരിച്ച ഒരാൾ ഭിന്നശേഷിക്കാർക്കുള്ള കോച്ചിൽ നിന്ന് ഇറങ്ങിപ്പോകുന്നത് പോലീസിന്റെ ശ്രദ്ധയിൽപ്പെട്ടു. തുടർന്ന് നടത്തിയ അന്വേഷണത്തിലാണ് പ്രതി അയ്യപ്പനാണെന്ന് തിരിച്ചറിഞ്ഞതും ഇയാളെ പിടികൂടിയതും.

നവംബർ 14-ന് പുലർച്ചെ 12.30-ഓടെ അഞ്ചാം നമ്പർ പ്ലാറ്റ്‌ഫോമിലൂടെ നടന്നുപോവുകയായിരുന്ന യുവതിയെ പ്രതി ബലമായി പിടിച്ചുകൊണ്ടുപോയി ആളൊഴിഞ്ഞ കോച്ചിലെത്തിക്കുകയായിരുന്നു. തുടർന്ന് യുവതിയെ ലൈംഗികമായി പീഡിപ്പിക്കുകയും ക്രൂരമായി മർദ്ദിക്കുകയും ചെയ്തു. മർദ്ദനമേറ്റതാണ് മരണകാരണമെന്നാണ് പോലീസിന്റെ പ്രാഥമിക കണ്ടെത്തൽ.

കൊല്ലപ്പെട്ട യുവതിയെ ഇതുവരെ തിരിച്ചറിയാനായിട്ടില്ല. യുവതിയെ തിരിച്ചറിയുന്നതിനുള്ള നടപടികൾ പോലീസ് ഊർജ്ജിതമാക്കിയിട്ടുണ്ട്. സംഭവത്തിൽ കൂടുതൽ അന്വേഷണം നടന്നുവരികയാണെന്ന് പോലീസ് അറിയിച്ചു.

By admin