ന്യൂഡൽഹി: ഇന്ത്യ – ന്യൂസിലൻഡ് ടി-20 പരമ്പരയിലെ നിർണ്ണായകമായ മൂന്നാം മത്സരത്തിന് മുന്നോടിയായി കിവീസ് നിരയിൽ മികച്ച പ്രകടനം കാണാൻ ആഗ്രഹിക്കുന്ന താരങ്ങളെക്കുറിച്ച് തുറന്നുപറഞ്ഞ് മുൻ ഇന്ത്യൻ നായകനും ടെസ്റ്റ് സ്പെഷ്യലിസ്റ്റുമായ അജിങ്ക്യ രഹാനെ.

ഓപ്പണർമാരായ ഫിൻ അലനും ടിം സീഫെർട്ടിനുമൊപ്പം ന്യൂസിലൻഡിന്റെ ഫാസ്റ്റ് ബൗളിങ് നിരയും ഫോമിലേക്ക് മടങ്ങിയെത്താൻ ആഗ്രഹിക്കുന്നുണ്ടെന്നാണ് സോണി ലിവ്-ലെ മാച്ച് അനാലിസിസിൽ രഹാനെ വ്യക്തമാക്കിയിരിക്കുന്നത്.

മുൻ സഹതാരങ്ങളെക്കുറിച്ച് രഹാനെ പറഞ്ഞത്:

ടിം സീഫെർട്ടും ഫിൻ അലനും എത്രയും പെട്ടെന്ന് ഫോമിലേക്ക് മടങ്ങിയെത്തട്ടെയെന്നാണ് തന്റെ ആഗ്രഹമെന്ന് രഹാനെ പറയുന്നു. ഐ.പി.എല്ലിൽ കൊൽക്കത്ത നൈറ്റ് റൈഡേഴ്സിൽ (കെ.കെ.ആർ) തനിക്കൊപ്പം കളിച്ചിട്ടുള്ളവരാണ് ഇരുവരും.

“ആ രണ്ട് ഓപ്പണർമാരെയാണ് ഞാൻ തിരഞ്ഞെടുക്കുന്നത്, കാരണം ഞാൻ അവർക്കൊപ്പം കളിച്ചിട്ടുണ്ട്. അവർ കെ.കെ.ആറിൽ എന്നോടൊപ്പം ഉണ്ടായിരുന്നു. രണ്ടുപേരും മികച്ച കളിക്കാരാണെന്ന് മാത്രമല്ല, മികച്ച മനുഷ്യരുമാണ്.

പൊതുവെ എല്ലാ ന്യൂസിലൻഡ് കളിക്കാരും മികച്ച മനുഷ്യരാണ്. അതുകൊണ്ട് ഒരു നല്ല മത്സരം കാണാൻ അവരുടെ ആ വെടിക്കെട്ട് ബാറ്റിങ് തിരിച്ചുവരണമെന്ന് ഞാൻ ആഗ്രഹിക്കുന്നു.

അവർ രണ്ടുപേരും തകർപ്പൻ പ്രകടനം പുറത്തെടുത്താൽ ന്യൂസിലാൻഡ് വൻ സ്കോർ നേടുമെന്ന് നമുക്കറിയാം,” രഹാനെ കൂട്ടിച്ചേർത്തു.

ഫാസ്റ്റ് ബൗളർമാരുടെ തിരിച്ചുവരവ് അനിവാര്യം

പരമ്പരയിൽ ജീവൻ നിലനിർത്താൻ ജയം അനിവാര്യമായ ന്യൂസിലാൻഡിന് അവരുടെ ഫാസ്റ്റ് ബൗളർമാരുടെ പ്രകടനം നിർണായകമായിരിക്കുമെന്ന് രഹാനെ ചൂണ്ടിക്കാട്ടി. സ്പിന്നർമാർ മികവ് പുലർത്തുമ്പോഴും പേസർമാർ റൺസ് വഴങ്ങി ബുദ്ധിമുട്ടുന്നുണ്ടെന്നും അദ്ദേഹം വിലയിരുത്തി.

“ഇരുവരും പുറമെ, ന്യൂസിലാൻഡിന്റെ ഫാസ്റ്റ് ബൗളർമാർ നന്നായി പന്തെറിയുന്നത് കാണാൻ ഞാൻ ആഗ്രഹിക്കുന്നു, കാരണം അവർ കുറച്ച് ബുദ്ധിമുട്ടുന്നുണ്ട്. ന്യൂസിലൻഡ് സ്പിന്നർമാർ വളരെ മികച്ച രീതിയിലാണ് പന്തെറിഞ്ഞത്.

അതിനാൽ ന്യൂസിലൻഡിന്റെ ഫാസ്റ്റ് ബൗളിങ് യൂണിറ്റും രണ്ട് ഓപ്പണർമാരും നന്നായി തിളങ്ങുന്നത് കാണാൻ ഞാൻ ആഗ്രഹിക്കുന്നു, അതൊരു നല്ല മത്സരമായിരിക്കണം,” രഹാനെ പറഞ്ഞു.

കഴിഞ്ഞ രണ്ടാം ടി-20യിൽ ന്യൂസിലൻഡ് സ്പിന്നർമാരായ സാന്റ്നർ നാല് ഓവറിൽ 21 റൺസിന് 4 വിക്കറ്റും, ബ്രേസ്വെൽ മികച്ച രീതിയിലും പന്തെറിഞ്ഞപ്പോൾ, കിവീസ് പേസർമാർ 11.5 ഓവറിൽ 123 റൺസ് വഴങ്ങി 2 വിക്കറ്റുകൾ മാത്രമാണ് വീഴ്ത്തിയത്.

പരമ്പരയിലെ ആദ്യ രണ്ട് മത്സരങ്ങളിലും വിജയിച്ച ഇന്ത്യ നാളത്തെ വെല്ലിംഗ്ടൺ മത്സരത്തിലും വിജയിച്ചാൽ പരമ്പര സ്വന്തമാക്കാം. അതേസമയം, പരമ്പര കൈവിട്ടുപോകാതിരിക്കാൻ ആതിഥേയരായ ന്യൂസിലൻഡിന് വിജയം അനിവാര്യമാണ്.